Matiu 16

Vano Parisio Iri Pene Zazu Vari Vapoloso De Koe Jesu

(Maka 8.11-13; Luka 12.54-56)

1Kakia ro ria vano Parisio mana vano Sadusi iri lama ego de i koego Jesu iri soko pada va soru na ia, iago iri pene zazu vari vapoloso de ikoego Jesu, go tina vasadake God tane i turine me go ia. 2Do Jesu i vataule ne qira, igo, “Ṉalu saṉa ne i vele zunu, ‘Qamu go tiniki nare kaega, tanego kulumu ne i mesara.’ 3Mana ṉalu i sarusaruku lolotoro me qamu go, ‘Tina nare tanego toba ne i mesara mana i poṉo go,’ Ramu qamu mazala so mia rove zena toba ne de tina gogo musaqara ne, do i makuru qamu mia rove na talupasana lala ro na ninidena. 4Ava igoto tane ka lete sakata qira basoero na ṉalu ninidena, iriki soko kaega rove na de igogo God, do iri soko mia na zazu vari vapoloso ro. Kameka zazu vari vapoloso tuna vamia qamue go era i ke ia propeta Zona.” Iago i kasi ne qira mana zaza to igo.

Vano Parisio Mana Sadusi Iri Gere Isti Ne

(Maka 8.14-21)

5Ṉalu iri dokae kene tepa na masi pipika ne, ria disipoloro ia, iri nanao kasupe ne pala na bureri. 6Gonae Jesu i sine ne qira, “Muna miasoka, mana bara ne tanuqamu, de ikoego isti ria vano Parisio mana vano Sadusi go.”

7Pasi nae disipoloro ne iri tupia vari sine ne tanuqira, “Jesu i sine pata igogo ne, tanego ita qatiki pala me kaega bureri,” iri go.

8Do Jesu i rove pata iri vari sine ne, iago i tana ne qira, “Avigo tane qamu vari sine ne tanuqamu, i kaega go bureri? Vaogoto ramu i suka so! 9Avigo qamuki nanao rove so kaega? Avigo qamu nanao kasupe to ava via ebata qamu vapurake go, ṉalu qa va ṉaṉa qira ego kalima mao basoero, kalima bureri? 10Avigo qamu nanao kasupe napu neso, ava via ebata qamu vapurake go, ṉalu qava ṉaṉa qirae go kavitu bureri de iri koe vasi mao basoero ne? 11Era qaki sine ne qamu kaega ramu sauna bureri. Avigo qamuki nanao rove kaega? Era qa sine ne qamu, go muna miasoka mana bara ne tanuqamu de ikoego isti ria vano Parisio mana vano Sadusi go.”

12Pasi nae to disipoloro ne iri ara nanao rove to, Jesu iki sine ne qirae kaega muna bara ne qamue isti iri zazu zego bureri, do de ikoego vari vatatana ria vano Parisio mana vano Sadusi go.

Pita I Sine Vasadake Jesu I Tuna God

(Maka 8.27-30; Luka 9.18-21)

13Ṉalu Jesu i za dokae kena i garogaro komala Kaesaria Pilipae, i tana ne qira disipoloro ia, “Avigo, basoero ne iri nanao akena tane era Tuna basoe?”

14Iri vataule, “Kakiaro iri go aro Jon na bapitema, kakiaro iri go aro Ilaiza, kakia ria iri go aro Jeremaia, ba kaki Propeta ṉalu bana go.”

15Gonae Jesu i tana napu ne qira, “Do avigo ramu? Akena tane era qamu go?” 16Saimon Pita i vataule, “Aro qo Kristo, qo Tuna go God i too sivala go.”

17Jesu i vataule ne ia, “Saimon tuna Jon, kula sivala de qo koego aro. Kaega ka basoe na vudu pua dena i va rove zigoe aro, tarove ogoto nae, do Mamae i koe rani ne tane i teke vatotoloṉo nigo aro. 18Iago ma sine nigo Saimon ninidena vitoṉomu, Pita mana aro qo bakoso, mana popokona to bakoso nae era tuna va degere ze go zazu na eklesia era, go karaputa ia le ba kaki pata napu tiniki sivala ne kaega eklesia era. 19Era tuna teke nigo aro kii na Too de ikoego vari miasoka ia God, iago pata qoki vamao zego kaega aro vudu pua dena, God i vakaega napu ze tepa rani ne, mana pata qo va mao zego aro vudu pua dena, God tina vamao napu ze tepa rani ne.”

20Goto nae i sine vakaraputa ne qira disipoloro ia, muniki sine ne qira basoero ne tanuna i Kristo go.

Jesu I Sine De Tina Gogo Vokara Mana Le Ia

(Maka 8.31—9.1; Luka 9.22-27)

21Tupi to ṉalu nae, Jesu i lete vatatana velaka qira disipoloro ia igo, “Era tuna za bana eso Jerusalema, tuna za pala ze vokara de iri koego vano kazigarata, vano batu ria patere ro mana vano vari vatatana na Tamana go. Tarina vae vale ava, do taramuzina so kapisa musaqara era tuna too napu me.”

22Pasi nae Pita i pala vamiki a Jesu mana i sine va moqere ne, “Batu, kasi sine na seko nae! God mara kasi vamao na pata nae na doka go aro!”

23Do Jesu i tabali mana i sine ne Pita, “Kasi ne de, Satana! Oniki pada ne vanoto ava era, pata go sine go aro ne, iki nanao na kaega God do i nanao na so basoe na vudu pua dena.”

24Gonae Jesu i sine ne qira disipoloro ia, “Ṉalu ka basoe i soko lulu ava era, ia tina vaqoqore tanuna, ina pala koluse ia, mana lulu ava era go. 25Tanego ka basoe i soko va kavele na too ia, tiniki pala kaega, do ka basoe i va riqo ze too ia sauqu era, tinara za pala too ogoto. 26Avana to voli na ṉalu kaki basoe i kone osina pata velaka na kolabana pua ne, go i vana ne too velaka ia na? Kaega so kapata! Mana i kaega napu to kapata tina voli vaule ze go too ianae go. 27Tanego era Tuna basoe tuna ule me loborona karaputa mazala ia Mamae mana ria aqeloro iago, ṉalu nae tuna voli qira basoero ne lulua so pataro iri zazu ne go. 28Ma sine ne qamu pata ogoto, kakiaro ria iri kogo dena, tariniki le kaega go na doka go ṉalu tarina miava era Tuna basoe na lama Batu lavata go.”

Currently Selected:

Matiu 16: VRSNT

Highlight

Copy