Luka 20

Iri Tana Ne Karaputa Ia Jesu

(Matiu 21.23-27; Maka 11.27-33)

1Kaki kameka musaqara ṉalu Jesu iza va tatana qira basoero ne loborona Pade Lotu ne, mana i tarama ne de go, Tarama Velaka ia God, batubatu ro ria patere ro, vano tarove na tamana, mana vano kazigarata go iri lama. 2Mana iri tana ne ia, “Ono sine ne qemu remu, ava karaputa na tane qo pala go aro, go qo zazu ne pataro dena? Mana akena tane i teke nigo karaputa dena?”

3Jesu i va taule ne qira, “Era do matana napu ne qamu ramu, sine nava. 4Avigo, akena tane i teke ne karaputa Jon, goni vari va bapitema nego, ireqe me dekoe God ba dekoe basoero?”

5Gonae iri tupi vari valegu tanuqira, avana to tatana sine go, “Ṉalu go i reqe me God tatana go ita ne, ia tina go, Avigo tane qamuki vaogote go kaega Jon?’ 6Do ṉalu go i reqe me so basoe tatana go ita, ria basoero iri koego dena, tarina vana qitae nini ipaka, tanego basoero dena iri vaogote Jon i kakia propeta.” 7Iago iri vataule iri go, “Remu qiki rove kaega kade iza reqe mego.”

8Jesu gonae i sine ne qira, “Era napu do qaki mazala kaega tuna sine ne qamu ramu, ava karaputa na tane qa pala go mana qava zazua go dena.”

Seko Vapadapada Qira Basoero Iri Miasoka Go Barue

(Matiu 21.33-46; Maka 12.1-12)

9Gonae Jesu i sine qira basoero ne seko vapadapada dena, “Iko kakia valeke i leba barue vain ia, gonae iva miasoka qirae kakiaro basoero barue vain ia, mana i kasi ne komala ia mana iza ko va umatae de izae go. 10I lama doka to ṉalu urena vain ne i velaka go, go tarina vae go, ia i vazao, valeke seka ia, go mara za pala todona pata lebaleba ne igo do iriki tekene kaega kapata mana i ule so. 11Gonae iva zao napua kakia valeke seka ia, do vano iri miasoka go barue vain ne, iri vae va paleka ia mana iri vanaqe ia. 12Gonae iva zao napua vapisana basoe seka ia, vano iri miasoka go barue vain ne, iri vae va paleka napua ia mana iri vanaqe ia. 13Valeke ni toṉove go barue vain ne igo, ‘Avana to tuna zazu ne? Kade go era mava zao to sale era qa lete mamaligara nego, ianae to go tarinara va mazale go ria,’ 14Do ṉalu vano iri miasoka go barue vain ne, iri miasoba ia, iri vari sine ne, ‘Iato dena sale ia valeke ni toṉove go barue vain ne. Aria mata vae vale ia, mana pataro i toṉove go ia tinara ke ita to.’ 15Gonae iri raqasa vakasi ze ia barue vain ne, mana iri za vae vale iago.” Gonae Jesu i tana ne qira, “Avana to tina zazu ne go valeke ni toṉove go barue vain ne, de iri koego vano iri miasoka go barue vain ne? 16Tina lama mana vae vale lupo qira so ria iri zazue go barue ne, mana tina teke napu ne qira kaki vano napu tarina miasoka go barue vain nae.” Do ṉalu basoero ne iri gata iadena iri go, “Ke kaega!”

17Do Jesu i reṉa vale ne qira, mana i tana ne qira, “Do avana to tane i talupase go seko ro dena ni koego Buka tabo ne,

‘Ipaka iri soko go kaega vano zazu pade ne,

iato ipaka ni lete mazalae go pade ne.’

18Osina basoero iri soru poka go ipaka dena ne, tarina tatakoboro lupo so, mana ṉalu ipaka ni gogo ne tina soru poka go kakia basoe, basoe nae tina tatamuzala go za lodu so.”

Tana Ne Dego Voli Takisi

(Matiu 22.15-22; Maka 12.13-17)

19Vano tarove na tamana mana batu ria patere ro iri pada ne pala ze Jesu sauna pataro ni sine go, tanego iri rove seko vapadapada dena iva pala qirae tanuqira iri go, do iri sareki ne qira basoero ne. 20Gonae iri piri ne ka ṉalu tina malumu ne qira, gonae iri voli qira kakiaro basoero ria, go tarina gere qira vano velaka, mana iri vazao qirae dekoe Jesu go tarina za tana va sorua ia, go tarina mazala go pala vazao ze ia loborona karaputa mana mazala ia batu lavata na Rom. 21Basoero iri voli qira go iri sine ne Jesu, “Valeke vari vatatana remu qi rove, pataro qo sine go aro mana qo vari vatatana nego i velaka lupo so. Qi rove aro qoki tavisi kale ne kaega kakia basoe, do qo sine so pata mara zazu ne basoero, igogu God. 22Iago, sine ne qemu remu avigo i totoloṉe Tamana ita tane tatana volia takisi de ikoego batu lavata Siza, ba kaega?”

23Do Jesu i gata rove, tanego iri pada ne ia, gonae i sine ne qira, 24“Va mia ve era kesa ramu. Ake tarakenaqana mana vitoṉo na tane ikoego kesa dena?” Ria iri go, “Vitono na mana tarakenaqa na batu lavata Siza.”

25Jesu gonae i sine ne qira, “Velaka, teke vaule ne batu lavata Siza pata i todo go Siza, mana teke vaule ne God, pata i todo go God.”

26Iago i makuru qira pala na ia sauna seko ivataule ne qira, de koego tarakenaqa qira basoero ne, iriki seko kaega mana iri lete nureke ne, seko niva taule ne qira go Jesu.

Iri Tana Ne Jesu Zazao Na Too Napu Tepa Le

(Matiu 22.23-33; Maka 12.18-27)

27Gonae kakiaro vano Sadusi iri lamae dekoe Jesu. Vano iri vitoṉo qirae Sadusi, vano iriki vaogote kaega basoe tina too napu me tepa le. Iri lama tana, 28“Valeke vari vatatana iri go, Mosese i karo bana ne qemu remu tamana dena, ‘Ṉalu kaki basoe ile mana qole ia iko do i kaega ne sale gogo ne, kaena valeke ne tina busi napua qole nanaro igogo ne, go tina vapodo ze salesale ro ia valeke kenaqa ia ni le bana go.’ 29Kaki ṉalu iri ko kaki tamakena taravitu, gonae ke lavata ne i busi, do i kaega ne sale mana i le go. 30Gonae ke varuana ne i busi napua qole ne. 31Gonae ke vapisana napu, gogo osiqira to taravitu ne varitora lupo so, iri busia kameka so qole, do osiqira ne i kaega ne qira so ka sale. 32Valupolupo na, qole ne i le napu. 33Aria tina lama doka ṉalu osiqira vano le tarina too napu me, akena to tina busia go qole nae, tanego ria tamakena taravitu dena, iri busia so kameka qole nae.”

34Jesu ivataule ne qira, “Valekero mana qolero na ninidena iri busi, 35do valeke ro mana qolero itora qira go tarina too napu me tepa le ne mana tarina koego vudu voru tinara lama go, ria nae tariniki ara busi to kaega. 36Tarina gere qira aqelo ro mana tariniki le kaega, iri salesalero ia God, tanego iri too napu me tepa le. 37Mana Mosese i vasadaka va velaka bana vano le iri too napu me tepa le ne, pepeu na moki ni subi e go sasaniqa ne, Mosese i sine qira, ‘God ia Abra-am, God ia Aisak, mana God ia Jekop.’ 38Iago, i God ria vano too, iki God ria kaega vano le, tanego de ikoego ia basoero iri too.”

39Kakiaro ria vano tarove na tamana iri go dena, “Valeke vari vatatana iva taule velaka ne tana nae.” 40Mana iriki ara tana napu ne kaega kaki tana napu go.

Tana Sauna Mesia

(Matiu 22.41-46; Maka 12.35-37)

41Jesu i tana ne qira, “Avigo tane iri sine go Mesia tina reqe mego popodo ia Davita? 42Do Davita tanuna i sine ze buka na Kera,

‘God i sine ne Batu era,

kolokue tepa rikisi matauqu.

43Go era tuna taru qirae vano iri kana nigo polana karaputa aro.’

44Davita i koru ze ia Batu, do ava tina goto tane Mesia tinara reqe mego vapopodo ia Davita na?”

De Igogo Too Ria Vano Tarove Na Tamana

(Matiu 23.1-36; Maka 12.38-40)

45Ṉalu basoero ne iri gatagatae de ikoego ia, Jesu i sine ne qira ria disipoloro ia, 46“Muna miasoka, de iri koego vano tarove na tamana, iri vakeba nego roku loda ro ria, mana iri ara telo go, iri soko basoero tarina va mazala qirae de iri vari vavolivoli ego, mana iri vine vesu kenakenaqa ṉalu iri zae go Pade Lotu, mana de koko velaka ṉalu iri zae go kelo ne. 47Iri va bulaṉoe qira qolero nanaro mana iri pala siko qirae patapataro ria, mana ṉalu iri pene, iri vazakanapu ne pepene loda ro! Qamu rove, lepulepu ria ne tina lete lavata sivala.”

Currently Selected:

Luka 20: VRSNT

Highlight

Copy