Luka 18
18
Vapadapada Na Qole Nanaro Mana Valeke Gatagata Koti
1Jesu i sine ne qira disipoloro ia vapadapada dena, go ria tarina pene taru so mana mara ria kasi pela go. 2“Kaki kameka komala ikoe kameka valeke batu varitanae, valeke dena iki sareki ne so kaega God mana iki va kapata qira so kaega basoero ne. 3Mana komala igogo ne iko napu kameka qole nanaro. Qole nanaro nigogo ne iza tarue so de ikoego valeke batu varitanae ne, mana iza pene ia igo, ‘Tavisi nava mana va totoloṉo nava pata makuru ro dena, de ikoego ria kana ro era,’ 4I lete umata sakata to valeke batu varitanae ne, i kasina zazu ne na pata ni sine ne go qole nanaro ne, do taramuzina i vane dena tanuna, ‘Pata volomo era qaki sareki ne kaega God ba va mazala qira kaega basoero ne do, 5era ma tavisi neto ia sauna va totoloṉo na pata ni soko go. Tanego ṉalu tuniki zazu ne kaega era, iane tina poro lama taru so, gogo tina ara vasakate to nanao qu era!’ ”
6Jesu i sine napua, “Ramu qamu gata to pata ni sine go valeke batu varitanae ne. 7Iago avigo qamu nanao God tiniki va totoloṉo kaega makuru ro ria vano i vine qira go, iri dae taru zaqe ia nogotona kuse mana musaqara? Avigo qamu nanao God tiniki tavisi katikili ne qira kaega? 8Ma sine ne qamu. Ia tina tavisi katikili ne qira va totoloṉo na makuru ro ria. Do era Tuna basoe, avigo tuna soba ze kolabana pua dena vano iri vaogoto go, ṉalu tuna za lama go?”
Va Padapada Na Valeke Parisio Mana Valeke Palapala Takisi
9Jesu gonae i sine napu ne qira seko vapadapada dena, tanego kakiaro basoero iri go, iri lete totoloṉo, mana iri mia va qoqoro qira kero ne basoero ne. 10“Kaki kameka ṉalu, karua valeke iru zae Pade Lotu go tiruna na za pene, kameka valeke Parisio varuana ne valeke palapala takisi go. 11Valeke Parisio ne i degere mana i pene, igo ‘Batu! Qa seko velaki go, tanego qaki valeke ṉaṉa siko kaega, qaki poqepoqe kaega, qaki taunata kaega gere qira basoero topuro ne, qa seko velaki go, tanego qaki gere kaega valeke palapala takisi ni ko mego taramuzi dona. 12Qa qaniqani karua musaqara nogotona kameka vuiki, mana kaki takoboro suka na vavagado era qa sosovolomo ne go,’ 13Do valeke palapala takisi ne, iza degere va laqalaqa me so, iki kadeka qe kaega rani ne, do ipuda bebenuna mana i sine, ‘God, nanao ule nava me, era qa valeke vasakata pata,’ 14Ma sine ne qamu pata ogoto, valeke palapala takisi dena i gado ule za pade ia, mana i lete totoloṉoe matana God, ba valeke Parisio dena ne, kaega! Tanego ka basoe i vazaka tanuna, God tinara va qoqore ia mana ka basoe iva qoqore go tanuna, God tinara va popoka ia.”
Jesu Iva Tabo Qira Sale Suka Ro
(Matiu 19.13-15; Maka 10.13-16)
15Kakiaro basoero ne iri pala me salero ria de ikoego Jesu go tina, taru ze karisina kuzuku qira mana vatabo qira go. Ṉalu disipoloro ne iri mia iadena, iri muma ne qira basoero ne. 16Do Jesu i koru qira salero ne mana igo, “Valame qira salero de qa koego era, mana kasi va kaega qira, tanego Too ikoego vari miasoka ia God ike ia ka basoe i gere qira go salero dena. 17Nanao tarua iadena! Ṉalu ka basoe iki soko kaega toṉove na Too ikoego vari miasoka ia God, gerena sale suka, basoe nae tiniki ara keba za kaega.”
Valeke Vavagado
(Matiu 19.16-30; Maka 10.17-31)
18Kaki kameka valeke batu ria vano Jiu i tana ne Jesu, “Valeke vari vatatana vtlaka!” igo, “Avana to tuna zazu ne go era, go tuna pala go too iki rove go kaega lupo?”
19Jesu i tana ne ia, “Avigo qo koru ve go era velaka? Kaega ka basoe i velaka go, do tanuna so God, ni velaka go. 20Qo rove bana so Tamana ne, oniki taunata, oniki vae vale basoe, oniki siko, oniki sine pata poqe de iri koego kero ne basoero, vamazala qira tamaqamu mana sinaqamu ro.”
21Valeke ne ivataule, “Pasi qara suka mego mana lama doka to ninidena gogo ne, era qa vaogoto lupo so Tamana ro nae.”
22Ṉalu Jesu i gata pataro dena, i sine ne ia, “Kameka so pata iara ko ni go, tono zazu ne. Ono volivoli ne osina pataro qo toṉove go mana ono teke ne qira vano situ, kesa na patapataro aro, mana aro tono ara pala vavagado tepa rani, mana lama luluava era.” 23Do ṉalu valeke ne igata seko ro dena, i lete maqata sivala, tanego i lete vavagado.
Pata Ne Makurue Go Sauna Vaogoto
24Jesu i reṉa ne ia, ilete maqata mana i sine ne ia, “I makuru ria vano iri vavagado tarina keba zago Too ikoego vari miasoka ia God. 25I makuru sivala napu kamolo tina surae go talopana nila sisira, do ilete makuru sivala ne basoe vavagado tina keba zago Too ikoego vari miasoka.”
26Basoero iri gata go pataro i sine go Jesu iri tana ne ia, “Akena go to tina za kavale?”
27Jesu ivataule ne qira igo, “Pataro ni makuru qira go basoero zazu nena, i lete malumua so God zazu nena.”
Voli Qira Disipoloro
28Gonae Pita i tana ne Jesu, “Mia avigo remu, remu qi kasi ne komala remu, patapataro remu mana qi lulu go aro.”
29Iago Jesu i sine ne qira, “Masine ne qamu pata ogoto, ka basoe i tarua, qole ia, ba togana, ro ba vanovano ia, ba salero ia sauna Too ikoego vari miasoka ia God. 30God tinara teke ne ia topuna pata velaka torana dena, mana ṉalu muzi ia tinara pala too iki rove kaega za lupo.”
Vapisana to Ṉalu Jesu I Sine Napua De Tina Gogo Le Ia Ne
(Matiu 20.17-19; Maka 10.32-35)
31Jesu i pala vamiki qira ria manoga karua disipoloro ia mana i sine ne qira, “Gata! Ita mata zae Jerusalema, de igogo ne osina seko ro iri sine bana go ria propeta ro ne, tina lama sadaka ogoto. 32Tarina vazao ve era de iri koego ria vano iriki Jiu go kaega go tarina vakari nava, tarina damu ava, tarina suelapava, 33tarina simava, mana vae vale ava, do taramuzina kapisa musaqara, era tuna too napu me tepa le.”
34Do disipoloro ia iriki nanao rove so kaega talupasana pata ni sine go Jesu, tanego i pipika ne qira, iago iriki rove so kaega talupasana pataro ni sine go Jesu.
Jesu Iva Mimia Kameka Valeke Kodo
(Matiu 20.29-34; Maka 10.46-52)
35Jesu i lama garogaro to Jeriko, de igogo ne ikoe kameka valeke kodo i kolokue rikisina zuka mana i pene kesa, ba pata gege, de iri koego basoero iri zaza sivala ego zuka ne. 36Ṉalu i gata qira basoero ne iri lama sivala, i tana ne qira, “Avana tane i sadaka go?”
37Basoero ne iri sine ne ia, “Jesu na Nazaret, i lama sivala za go nae.”
38Valeke kodo ne i koru valavata igo, “Jesu, Tuna Davita! Nanao ule nava era!”
39Basoero iri koego kenaqana ia ne, iri muma ne ia mana iri sine ne mara duduli. Do ilete koru valavata napu igo, “Jesu! Tuna Davita! Nanao ule nava era!”
40Go nae Jesu i noto mana i sine ne qira, tarina lulu valame valeke kodo ne de ikoego tanuna, ṉalu valeke kodo ne i lama garogaro, Jesu i tana ne ia, 41“Avana tane qo soko ve go era tuna zazu ni goe na?” Valeke kodo igo, “Qa soko ma mimia napu qa go.”
42Jesu i sine ne ia, “Mimia to aro! Vaogoto aro iva velaki go.”
43Katikili so valeke kodo ne i mimia napu, i lulua Jesu mana ivazaka God. Ṉalu basoero ne iri mia pata dena, iri vazaka God.
Currently Selected:
Luka 18: VRSNT
Highlight
Share
Copy
Want to have your highlights saved across all your devices? Sign up or sign in
The New Testament in Varisi, Solomon Islands © Bible Society of the South Pacific, 1994, 2004.
