Luka 16

Valeke Zazu Tatakiu

1Jesu i sine ne qira ria disipoloro ia, “I ko kameka valeke vavagado i ko ne kameka valeke zazu ia, i kenaqa ne miasoka na patapata ro ia. Kakiaro basoero ne iri sine ne valeke vavagado ne, ‘Valeke ni miasoka go pata vavagado aro i gole qiso ne kesa ro aro.’ 2Iago valeke vavagado ne i koru va keba valeke ne mana i sine ne, ‘Avigo tane pata qa gata go era saumu aro? Ono karo vatotoloṉo lupo de igogo zazao na osina pataro qo zazu bana nego, tanego ninidena aro iki torago to kaega tono kenaqa ne miasoka na patapata ro rera.’ 3Valeke ne ivane dena tanuna, ‘Batu era tina vamamanava ve zazu era. Avana to tuna zazu ne? Era qaki moqere kaega, go tuna sola go kakako ro, mana qa agava ne, pene kesa qira basoero ne. 4O, ninidena qa rove pata tuna zazu ne, go ṉalu tuna mamanava go koe na zazu dena, era tinara ko nava kakiaro vakitaka ro, iri mazala go va keba ve pade ro ria.’ 5Iago i koru vekeba qira osiqira basoero iri lepulepu bana ego de i koego batu ia, mana i tana ne kaki kameka ria, ‘Ava via tane qo lepulepu bana zego aro batu era na?’ 6Valeke ne i vataule igo, ‘Kameka vasa daramu tala na oliv.’ Valeke zazu ne igo, ‘Pala pepa lepulepu aro dena, koloku mana karo ze neqo.’ 7Gonae i tana napu ne kaki valeke, ‘Do aro, ava via qo lepulepu ne go?’ Valeke ne igo, ‘Kameka mao kuza na vuiti.’ Valeke zazu ne igo, ‘Ono pala pepa lepulepu aro dena, mana karo ze zaluvasa kuza.’ 8Taramuzina nae batu ia valeke tatakiu ne, i vazaka ia, tanego i tarove ne zazu na pataro igogo ne. Tanego basoero na pua dena iri rove dego miasoka na pata vavagado ro ria, iri sivala ne qira basoero iri koego tatavata.”

9Gonae Jesu i sine napua, “Ma sine ne qamu muna vazazu velake vavagado na pua dena, go basoero ne tarina vakitaka qamu, go ṉalu tamuna mamanava go va zazu na vavagado na pua dena, ria tarina ra vakitaka napu qamu so loborona komala ikoego too iki rove go kaega lupo. 10Ka basoe iri ruruqe ze ia miasoka na pata suka, tarina ruruqe napu zeso ia miasoka na pata lavata ro, mana ka basoe iriki ruruqe ze kaega ia miasoka na pata suka ro, tariniki ruruqe napu ze so kaega ia, miasoka na pata lavata ro. 11Iago ṉalu iriki ruruqe qamu go kaega sauna miasoka na vavagado na pua dena, akena tinara ruruqe qamue go miasoka na vavagado ogoto na rani ne? 12Mana ṉalu tariniki ruruqe qamue kaega miasoka na patapata ia basoe kakavata, ava tina go God, tina teke nigo patapata ro aro tanumu?

13I kaega ka basoe zazu tina mazala go osaka ne karua batu, tina vasasakata ne kakia mana mamaligara ne kakia, tina nanao vamazale kakia mana taru va qoqore kakia. Iago i makuru qamu tamuna vamazale God mana pata vavagado na pua dena.”

Kakiaro Seko Ro Ia Jesu

(Matiu 5.31-32; 11.12-13; Maka 10.11-12)

14Ṉalu vano Parisio iri gata pataro dena, iri vakari ne Jesu, tanego iri mamaligara ne kesa. 15Jesu i sine ne qira, “Ramu qamu pada taru ne to vamimia velaka na tanuqamu, tarakenaqa qira basoero topu, do God i rove bana pata ikoego loborona puṉu qamu. Tanego pataro qamu nanao go ramu basoero i pata lavata go, de ikoego God, i patavolomo so.

16Tamana ro ia Mosese, mana karo ro ria propetaro iko so go i lama doka ṉalu ia Jon na bapitema. Torana ṉalu nae Tarama Velaka na de igogo Too ikoego vari miasoka ia God iri vari vagata ne, mana topu basoero iri pada ne go tarina lamae too dena. 17Tanego ilete malumu so rani mana pua tiruna lupo go, do kaega kaki desuka na Tamana tina vana go.”

Jesu I Sine Sauna Busi

(Matiu 5.32)

18Jesu igo, “Ka valeke i kasi ne qole ia, mana i busi napua kaki qole kakavata, valeke nae i taunata, mana ka valeke i busia go qole i busi kasi go, valeke nae i taunata napu so.”

Valeke Vavagado Mana Lazarus

19Jesu i sine napu ne qira, “I ko kameka valeke i vakeba ne poga i lete voli makuru go, i kone topu na pata velavelaka mana i ge pata gege velaka osina ṉalu. 20De go, i ko napu kameka valeke situ vitoṉona Lazarus, i kukuru lupo tokamana. Iri poro pala vazao ze so siporaṉa na pade ia valeke vavagado ne. 21Nanaona go tina mazala ge na tatamuzalana pata gege tina soru ego tevolo ia valeke vavagado ne, sika ro iri lama alope kukuru ro i koego tokamana iago. 22Ṉalu valeke situ dena i le, aqelo ro iri lama sua ia mana iri vakoluku ze rikisina Abra-am tepa rani ne. Valeke vavagado ne i le, mana iri za vou ia, 23mana loborona nako ne, valeke vavagado ne i lete za kimata, i reṉa popoka mana i miasoba Abra-am i lete ko valaqalaqa mana Lazarus i koe rikisina go. 24Gonae i koru aqe, ‘Mamae Abra-am, nanao ava me, turi me Lazarus mara vaboma ze karisina besi mana mara lama va lolomua kalamiaqu tanego era qa lete lama vokara e nako dena!’ 25Do Abra-am i vataule ne ia igo, ‘Nanaotarua sale era, ara too qo vaego qo pala lupo bana to osina pata velaka, mana Lazarus i pala topu na pata sakata ro. Do ninidena Lazarus i lama koe kulakula, mana aro qo pala to vokara. 26Kameka pata napu, i midiki ne qita kameka bolu lavata ikoego vari lobori qita, iago i makuru qemu remu timuna garetu ego deqamu koego ramu, mana ramu i makuru napu qamu so lama na deqi koego remu.’ 27Valeke vavagado ne igo, ‘Mamae Abra-am qa pene go ono vazao ze Lazarus tepa pade ia mamae, 28de go iri koe kalima togaqu, go mara za sine bana ne qira, go mara kasi lama na komala vokara dena.’ 29Abra-am igo, ‘Togamu i ko Mosese mana propeta ro iri sine bana ne qira, iago togamu ro mara ria gata pataro iri sine go ria ne.’ 30Valeke vavagado ne i vataule, ‘Ianae iki tora kaega mamae Abra-am! Do ṉalu kaki basoe tara too napu me tepa le, mana za sine ne qira ṉalu nae, ria iri mazala manava sakata ne vasakata pata ro ria.’ 31Do Abra-am igo, ‘Ṉalu iriki gata go kaega pataro iri sine go Mosese mana propeta ro, patavolomo ṉalu kaki basoe i za too napu me tepa le ne, ria iriki mazala kaega vaogote na ia.’ ”

Currently Selected:

Luka 16: VRSNT

Highlight

Copy