Zazu Ria Apostoloro 13

Banabasi Mana Pol Iri Vine Qirue Zaza

1Eklesia ikoego Antiok i koe kakia ro vano vari vatatana. Banabasi, Simion, iri vitoṉo ze Pono, Lusiu valeke na Saerina, Manea iru lavata varitora me Erode Antipas, mana Sol go. 2Ṉalu iri vazaka God mana iri qaniqani go, Spirit tabo ne i sine ne qira, “Muna taru vakakavata qiru Banabasi mana Sol, go tiruna zazu nego zazu qa koru qirue go era.”

3Iri qaniqani mana lotu, taramuzina iri sapu qirue karisiqira mana iri vatabo qiru, mana iri turi va zazao qiru go.

Banabasi Mana Sol Iru Zae Saeprus

4Turi ia Spirit tabo, Banabasi mana Sol iru za vosoroe komala lavata Silisia, kasi ne de gogo ne iri toka, kavaza ṉugu Saeprus. 5Ṉalu iri za dokae go komala lavata Salamisi iru tamana ne seko ia God loborona Pade Lotu ria vano Jiu. Mana ṉalu nae Jon Maka to ilulu qiru, go tina tavisi ne qiru go.

6Ria tarapisa iri piqata mana siporo za kene tepana nugu Papose. De gogo ne iri soba ze kameka valeke Jiu vitoṉona Bar-Gesu, i vazazua manumanuru ia, mana igo, tanuna i valeke propeta. 7Ia ivakitaka ia Qavuna ikoego ṉugu dena, vitoṉona Sezius Paulusi i valeke tarove, gonae i koru me qiru Banabasi mana Sol de ikoego tanuna, tanego isoko gata na seko ia God. 8Do valeke i va zazua manumanuru ia, vitoṉo va Qrik na valeke ne Elimasi ilete seko vari valegue de iru koego riru, go Qavuna ne mara kasi vaogote na God igo. 9Gonae Sol kene vitoṉo na Pol i purake Spirit tabo ireṉa vale totoloṉo ne zaqe Elimasi, 10mana igo dena, “Aro qo sale ia manuru! Aro to qo kana ne go osina pata velaka ro ne. Puṉumu i purake osina pata tatakiu sakata, mana osina ṉalu qo pada ne vapoqe na seko ogoto ia Batu ne. 11Karisina Batu ne tina posari go ninidena, aro tono kodo toniki mia kaega tatavatana musaqara ro.” Pasi so nae Elimasi i gata rove gausu poṉo i sapua matana mana i kodo, i siba taqia basoe go mara toqo vazao igo. 12Ṉalu qavuna i mia pata i sadaka go dena i vaogote to God. Tanego ilete poloso ne vari vatatana dena sauna Batu ne.

Banabasi Mana Sol Iru Zae Antiok Vudu Pisidia

13Pol mana vakitaka ro ia, iri age koluka iri kasine Papose mana za dokae Pega, kaki kameka komala lavatana Pampilia. De gogo ne to Jon Maka ikasi ne qirue go riru mana i gado ule za Jerusalema. 14Tanuqiru Pol mana Banabasi iru piqata me Peqa mana za dokae komala Antiok, vudu na Pisidia. Mana i musaqara Sabat iago iru za kolokue Pade Lotu ria vano Jiu. 15Taramuzina iri toere Tamana ia Mosese mana karo ria propetaro ne. Ria batuna ro Pade Lotu ne iri sine ne qiru, “Karua vakitaka remu, ṉalu ikone qaburu seko vakaraputa de iri koego basoero dena, remu qimu soko raburu buruna sekoe de iri koego.” 16Pol i degere mana i pae va notu qirae karisina. Mana i vatupia seko, igo dena, ‘Ramu turaquro Izirel mana ramu basoero topu qamuki Jiu go kaega do qamu vazaka go God, muna gata va me era! 17God ria basoero na Izirel i vine qira kazigarata ro ita, mana i vazadava qira ṉalu iri koego Izipito gere gira go vano kakavata, mana karaputa lavata ia God ilulu vasiporo bana qirae go Izipito. 18Mana loborona vasiṉaulu ave, ia i kotavisi qirae sasaniqa kadala ikaega go pata podopodo lavatana ne. 19Ia i pero kavitu sinaqe iri ko banae go vudu na Kenani mana i teke ne qira basoero iago tina vudu ria igo. 20Osina pataro dena idokae to loborona vasivasa neqo ave. Mana taramuzina pata ro dena, God i tekene qira batu vivine ria go i lama dokae go ṉalu ia propeta Samuela. 21Mana ṉalu ria iri pene Samuela mara tekene qira kameka batu lavata, God iteke ne qira Sol sale ia Kisi ireqeme sinaqe ia Bejamani. Mana ia i batu lavata ria torana vasiṉaulu ave. 22Taramuzina God i pala vakuziki ne Sol, ia iteke napu ne qira Davita tina batu lavata napu ria go. Mana ia to dena pata i sine bana ne go ia God, ‘Ninidena era qa soko Davita sale ia Jese ia to adona basoe qa soko go, tina zazu ne go pataro qasoko ze go era de ikoego. 23Popodo ia Davita tina reqeme kameka basoe tina vakavele go vano na Izirel gerena ipui bana nego, ‘Iato valeke dena Jesu!’ 24Mana Jon to i vanama ne go lama na Jesu, i sine kenaqa ne qira vano Izirel, go mara ria vanama mana nanao vanane vasakata pataro ria mana mara ria bapitema go. 25Mana ṉalu Jon i garogaro to valupo na zazu ia, i sine ne qira igo, ‘Akena tane era qamu nanao ze go ramu? Iki era kaega tane qamu piri ne go ramu. Iago muna gata! Ia tina lamae go muziqu era, era do iki torana kaega tuna ozuke go makebotu ia ne.’

26Ramu turaquro vano Izirel qamu reqe mego sinaqe ia Abra-am mana ramu topuro qamuki Jiu go kaega qamu vazaka go God. Ita to tane God i turine me ze go tarama dena go tina vakavele qita. 27Do basoero iri koego Jerusalema mana vano kenakenaqaro ria gogo ne, iriki miarove kaega Jesu to tina vakavele qira go. Mana iriki mia rove napua so kaega sekoro ria propetaro ne, iri toere go osina musaqara Sabat. Do tanuqira to iri vavoto go sekoro dena ṉalu iri vine go Jesu tina le go. 28Mana i pata ogoto, iriki mia kaega ka pata sakata, de ikoego iago tina le nego, do iri pene ze Pilato go mara toqene vae vale na ia, iri go. 29Mana ṉalu iri zazu lupone osina pataro dena de ikoego Jesu, gerena i sine go Buka tabo, iri sipa ze ia koluse ne mana va kekele ze ia loborona leṉa ne. 30Do God ivatoo napu me ia tepa lene. 31Mana topu musaqara taramuzina ia i sadaka qira basoero iri lulu bana me ze go ia Qalili lama dokae go Jerusalema. Mana basoero nae to iri tarama ne go ia, de iri koego basoero na Izirel. 32Mana raru qaru lamae dena, qaru palame Tarama Velaka, de qamu koego ramu, iato pata ni pui bana ne go God de iri koego kazigarata bana ro ita, ia tina zazu ne go igo. 33Iago ninidena izazu ne qita to ita, ṉalu i vatoo napu mego Jesu tepa lene, gerena i sine ze go varuana buka na Kera.

‘Aro qo sale ogoto era,

ninidena era qa Tamamu.’

34Mana ia dena pata i sine taru bana mego God sauna ia, ivatoo napu me ia tepa lene go tiniki noli kaega tokamama.

‘Pata ogoto sivala, era tuna teke nigo aro too mana makaolo,

gerena qa pui bana me ze go Davita.’

35Mana kaki dia napu Buka tabo i sine ze,

‘Aro qoki vamao kaega basoe zazu tabo aro dena tina nolie go kukubo.’

36Tanego Davita i osaka ne so God lodana ṉalu ia. Mana ṉalu ile iri vou tavise ze ia de iri koego kazigarata ro ia mana tokama ne i nolie loborona kukubo ne. 37Do God i vatoo mego Jesu tepa lene, tokamana iki noli kaega. 38-39Iago ramu onotoquro na Izirel. Remu qimu soko ramu muna rove vavelaka zazaona pata dena, tanego loborona to Jesu remu qimu tarama ne go Tarama Velaka sauna nanao ule na vasakata pata de qamu koego. Mana muna rove, osiqira ria iri vaogote go Jesu, vasakata pataro ria iri talukasa lupo. Do Tamana ia Mosese iki mazala kaega lukasena vasakatapataro ramu. 40Iago ramu muna miasoka, niki go pataro iri sine bana go propetaro ne lama ogote de qamu koego,

41‘Ramu qamu vakari ne go God!

Muna reṉa ninidena go muna poloso mana taramuzina tamunara le.

Tanego pata qa zazu ne go era ninidena ramu tamuniki vaogote to kaega,

mana patavolomo tarina sine lupasa ne qamu go, do tina varipada so.’ ”

42Ṉalu Pol mana Banabasi iru siporo kasi ne Pade Lotu ria vano Jiu, basoero ne iri pene napu qiru go mara riru ule napu me ṉalu Sabat muzi, go mara riru sine velaka napua zazaona pataro dena. 43Ṉalu basoero iri kasi lupo ne to de iri teṉoe go, topu ria vano Jiu mana vano iriki Jiu go kaega iri ko banae go lotu ria vano Jiu iri gabu ne qiru to Pol mana Banabasi. Iago karua apostolo iru vapepeu qira, mana sine vakaraputa qira go mara ria ko vanadue ruruqe ria loborona mana ia God.

44Musaqara Sabat muzi, i garogaro to osiqira vano iri koego komala lavata dena iri lama teṉo ne to gata na seko ia God. 45Ṉalu vano batu ro ria vano Jiu iri mia go topuna basoero iri lama teṉo go, iri qora sasakata, gonae iri vari valegue de ikoego Pol sauna pataro ni sine go, mana iri seko sakataiago. 46Do Pol mana Banabasi iru seko vakaraputa iru, go dena, “I torato raru taruna tamana kenaqa qamue ramu seko ia God. Do ramu qamu vasadake to qamu kasia pataro dena, iago iki tora bana qamu to kaega pala na too gado kutona ikaega. Ia go raru maru kasine qamu mana zae de iri koego vano iriki Jiu go kaega. 47Tanego iato dena tamana i teke bana ne qemu go God, igo dena,

‘Era qa vine bana go aro tono kameka tatavata na de iri koego vano iriki Jiu go kaega,

go osiqira basoero na vudu pua tarina kavele.’ ”

48Ṉalu vano iriki Jiu go kaega iri gata go sekoro dena, iri lete kula, mana iri seko velake God sauna Tarama Velaka dena. Mana ria iri tavine bana ego pala go too gado kutona i kaega, iri vaogote toiago.

49Mana seko ia God i zadave to osina dia kena igogo ne. 50Do vano batu batu ria vano Jiu iri vagatagata seko qira vano kenakena na ro komala lavata dena, mana qolero mazamazala ro iri vazaka go God, go mara ria vasasakata ne qiru Pol mana Banabasi mana kakale vakuziki qirue kena ria iri go. 51Karua apostolo ne iru tavoro vanaqe lodu na pua na makebotu riru, sauna vabanabana na too sakata ria, taramuzina nae, iru zae to komala Ikonium. 52Mana vano lotu iri vaogote go Jesu iri koego Antiok iri ko kula mana Spirit tabo ilama ko vakaraputae de iri koego.

Currently Selected:

Zazu Ria Apostoloro 13: VRSNT

Highlight

Copy