Pomulanya 35

Sarita Tempo i Yakub Pasi Joanya Malimba Muni ri Betel

1Wali yako etu, i Pue Allah mampogomboka i Yakub, Ia manganto’o, “Aku semo i Allah anu to narata resi korom nja’u Betel seore tempo korom nampiyaika tukakamu, i Esau. Wali pakaroso damalimba muni njo’u Betel etu pei damaroo nja’u ria. Ojo karata ngkorom nja’u ria, ika palampa watu darapake mampue mampakabae Aku.” Etu semo to nato’oka i mPue Allah i Yakub.

2-3Wali ojo karoonya i Pue Allah mampogomboka ia etu, i Yakub mampasiromunaka tau to maroo ri banuanya pasi samparia joanya to yusa, panewa ia manganto’oka sira, “Pakaroso ruyu apa kita damalimba muni njo’u Betel. Rata nja’u ria aku damangawangu palampa watu to kita damangampake mampue mampakabae i Pue Allah. Apa Ia semo to nangansawang aku seore tempo aku ri re’e raya ngkasusa. Pasi yako tempo etu, nempo bara imbanjo kukanjo’u, Ia sangkani mangararamaka aku. Wali taa masipato kita mampue pue to yusa, see naka taji yau samparia tau-tau to re’e resi komi. Roo see, yau pei pandiu panewa pasunsuka wo’u pake to mayongo.” Etu semo to nato’oka i Yakub joanya.

4Wali ojo pangandonge nsira gombo i Yakub etu, sira yau mangoko samparia tau-tau to re’e resi sira pei mangkenika ia. Pasi sira seja mangayali yau nganti-nganti to napake nsira mampakabae pue to yusa pei mangawaika seja resi i Yakub. Wali i Yakub mangoko samparia tau-tau pasi nganti-nganti to nakeni nsira etu pei mampongkeli yau ri ara ntuwa ngkaju poli to bae to mosu ri kota Sikhem etu.

5Wali roo see sira mayoko yako ri lipu etu dayau njo’u Betel. Tempo sira mayoko yako kota Sikhem etu, tau to maroo ri kota-kota to ri awenya mangangkita. Tau etu mangansani palaong to maja’a to naika ngana i Yakub resi tau ri kota Sikhem, pei nempo ewa see sira taa yau mangalambong damampansawaka apa meka kojo raya nsira. Kameka ndaya nsira etu i Pue Allah semo pu’unya.

6Wali i Yakub pasi samparia joanya malinja rata nja’u Betel to rato’oka seja Lus. Betel etu re’e ri tana Kana’an. 7Wali rata nja’u ria i Yakub mangawangu palampa watu to darapake mampue mampakabae i Pue Allah. Roo see ia mangansangaka tampa etu El-Betel, batuanginya etu semo Allah nu Banua i mPue Allah. Naka pei ia mangansangaka tampa etu El-Betel apa nja’u ria semo i Pue Allah rata resi ia seore tempo ia mampiyaika tukakanya.

8Wali yako etu, tempo sira tiroowa nja’u Betel, tempo etu mate yau i Debora. I Debora etu, ia to papolaong i Ribka, indo i Yakub. Pasi i Debora semo to nangkampang i Ribka tempo ia dakodiwa. Wali tempo i Debora mate yau, ia nakeni nu yununya lo’u tuwa ngkaju poli to bae to re’e ri sambalinya lipu to rato’oka Betel etu. Rata la’u ria ia napongkeli yau nsira ri awe mpu’u ngkaju etu. Mawo kojo raya nsira mampongkeli yau ia, see naka kaju etu nasangaka nsira “Kaju Poli Katumangi nTau”.

9Wali seore tempo i Yakub owo rata muni ri Betel yako nja’u Mesopotamia, tempo etu i Pue Allah rata wo’u resi ia. Wali i Pue Allah mampogomboka wo’u i Yakub pei mampakasanang katuwunya. 10Ia manganto’o, “Manasamo resi korom sangamu si’amo i Yakub, apa Aku mangansangaka wo’u korom i Israel.” Wali ewa wetu naika i mPue Allah mangawali yau sanga i Yakub pei mangansangaka ia i Israel. 11Yako etu i Pue Allah manganto’oka wo’u ia, to’oNya, “Aku semo i Pue Allah anu Makuasa. Wali si’i patuungKu resi korom. Kasimesemo danakaboros wiyaamu ri lino. Wiyaa ngkorom etu kanjo’u-njo’u kaboro-boros sampe mawali yau bansa to bae. Pei ri tempo to darata sira damawali yau malagi bansa ntau. Pasi ri tempo to darata, malagi wiyaa ngkorom to damawali makole.”

12Pasi i Pue Allah manganto’oka wo’u i Yakub, Ia manganto’o, “Tempo owi Aku roomo mamparajanjika damangawaika tana si’i resi buemu, i Abraham, pasi resi pa’amu, i Ishak. Wali si’i-si’i Aku mangawaika yau tana si’i resi korom damawali korom puenya pasi wiyaamu puenya rataka ri singkasaenya.” Etu semo to nato’oka i mPue Allah i Yakub. 13Wali ojo karoonya i Pue Allah mampogomboka i Yakub nja’u Betel etu, Ia nto’u muni mampiyaika i Yakub nja’u ria.

14Wali ojo karoonya i Pue Allah mampiyaika ia, i Yakub mangoko watu pei mampapokore watu etu njau Betel. Roo see ia mangawubu tule anggur pasi indol nsaitun ri wawo nu watu etu mangika tondong tampa etu i Pue Allah puenya. 15Wali apa saba i Pue Allah mampogomboka ia nja’u ria, see naka i Yakub mangansangaka tampa etu Betel, batuanginya banua i mPue Allah. Wali ewa wetu nawali seore tempo i Yakub yau muni ri Betel yako Mesopotamia.

Sarita Tempo i Yakub Pasi Joanya Malimba Yako Nja’u Betel

16Wali yako etu i Yakub pasi joanya mayoko yako Betel etu damalinja wo’u mangampago kota Eprata. Ri raya mpalinja nsira etu, tempo sira tamo longko kojo yako ri kota Eprata, tempo etu i Rahel mula makiki komponya apa damoana see naka ia mandasai kojo nepenya. 17Wali tempo ia moana, tempo mapari kojo nepenya etu, tempo etu tau we’a to mampapoana ia manganto’oka ia, to’onya, “Ne’e meka Indo, anamu si’i seja ana to langkai!” Etu semo to nato’o ntau we’a etu. 18Wali ojo karoonya i Rahel mampoanaka ana langkai etu panewa ia mangepe ia damate yaumo. Pei ri katawanya pura nosanya ia mangansangaka ananya etu i Ben-oni, batuanginya “ana ngkamawo ndayangku” pei i Yakub mangansangaka wo’u ia i Benyamin, batuanginya “ana to raramakangku”.

19Wali yako etu, i Rahel ia puramo nosanya panewa ia rapongkeli yau. I Yakub pasi yununya mampongkeli yau ia ri wii njaya to nalulu nsira yau njo’u kota Eprata. Kota etu rato’oka seja kota Betlehem. 20Wali ojo karoonya mampongkeli yau i Rahel etu, i Yakub mangoko watu to bae pei mampapokore watu etu ri wawo nu dayonya. Wali sampe tempo si’i watu etu tiroowa mangantondong dayo i Rahel etu.

21Wali ojo pangampongkeli i Rahel etu, i Yakub pasi joanya mangampolasaka palinja nsira. Sira malinja rata nja’u pada to re’e banua to malangan to napake ntau tempo mangkampang binatang-binatang nsira. Banua to malangan etu rato’oka Toal Eder. Wali i Yakub pasi joanya mandoo pei mangawangu tenda-tenda nsira ri pada ri sambali banua to malangan etu.

22Wali ri rayanya sira maroo nja’u ria, re’e seore i Ruben, ana i Yakub, ia masala. Ia maturu siwaka pei samba’a indo nu ana mpa’anya, sanganya i Bilha, indo wokunya semo. Wali palaong etu nasaritaka ntau resi i Israel, i Yakub semo, see naka ia mangansani sira dua roomo masala.

Wali i Yakub, ia sampuyu pei dua mba’a ananya to langkai. 23Ananya to yako resi i Lea, etu semo i Ruben, to tu’anginya, panewa re’e wo’u i Simeon, i Lewi, i Yehuda, i Isakhar pasi i Sebulon. 24Pasi ananya to yako resi i Rahel, etu semo i Yusup sira dua i Benyamin. 25Pasi ananya to yako resi i Bilha, to papolaong i Rahel, etu semo i Dan sira dua i Naptali. 26Panewa ananya to yako resi i Silpah, to papolaong i Lea, etu semo i Gad sira dua i Asyer. Wali etu semo sanga nu ngana i Yakub to sampuyu pei dua to rapoanaka tempo ia maroo nja’u Mesopotamia.

Sarita Mangkonong Kapate i Ishak

27Wali yako etu, i Yakub pasi joanya mampolasaka wo’u palinja nsira pei rata nja’u banua mpa’anya, i Ishak. Banuanya etu nja’u Mamre to mosu ri kota Kiryat-Arba to rato’oka seja Hebron. Etu semo tampa nakaroo i Abraham tempo owi panewa i Ishak maroo seja nja’u ria.

28-29Wali tempo i Yakub rata resi i Ishak, tempo etu i Ishak ia tu’a kojomo. I Ishak etu ia masae pasi masanang katuwunya, panewa tempo ia satu pei wayu mpuyu nto’u ia puramo nosanya. Wali ia mate yau sewaju ewa bue-buenya tempo owi. Wali ia napongkeli yau nu ananya, i Esau sira dua i Yakub.

Currently Selected:

Pomulanya 35: WNT

Highlight

Copy