Pomulanya 14

Sarita Tempo i Abram Mampalaes i Lot

1-9Wali tempo i Abram maroo mosu ri kota Hebron etu, tempo etu re’e makole-makole ntau to yusa to mamula masimusu. Wali tempo etu tau to sanganya i Bera, ia makole ri kota Sodom. Pasi re’e opo yununya to mawali makole ri kota-kota to yusa. Etu semo i Birsya to makole ri kota Gomora, i Syinab, makole ri kota Adma, i Syemeber, makole ri kota Seboim, pasi re’e wo’u samba’a tau to makole ri kota Bela, to rato’oka seja kota Soar. Wali makole to lima mba’a etu paka mangkeni joa nsira yau siromu nja’u lemba nSidim, etu semo tana to ri awe nTasi Mate. Nja’u ria sira mampakaroso damangamusu bali nsira.

Naka pei makole to lima mba’a etu siromu damamusu apa ri rayanya sampuyu pei dua nto’u sira lima re’e ri ara mporenta i ngKedorlaomer, makole ri tana Elam. Pei ri to’u to kasampuyu togo sira mosam, wali see naka sira mula mangewa ia. Wali sira mangampeas mangamusu ia ri lemba nSidim etu.

Wali i Makole Kedorlaomer mampasiromunaka yunu to si ia, etu semo i Amrapel, makole ri tana Babilonia, pasi i Ariokh, makole ri tana Elasar, pasi i Tideal, makole ri tana Goy. Wali makole to opo mba’a etu pasi joa nsira, sira yau mangampago damangamusu makole to lima etu. Pei ri raya mpalinja nsira yau ri lemba nSidim, sira mangamusu pei manganangi to Repa nja’u Asyterot-Karnaim. Yako etu sira mangamusu pei manganangi to Susi nja’u Ham, panewa to Emi nja’u Syawe-Kiryataim. Roo see sira mangamusu wo’u to Hori to maroo nja’u tongku Edom, rataka nja’u kota El-Paran, to mosu ri pada bone. Wali sira manganangi seja to Hori etu. Panewa yako etu sira mawolili muni ri tondo utara, panewa rataka nja’u kota En-Mispat, to rasangaka wo’u kota Kades, sira mangamusu wo’u samparia to Amalek, pasi to Amori seja, to maroo nja’u Haseson-Tamar. Wali sira manganangi seja samparia tau to etu.

Wali ojo karoonya i Makole Kedorlaomer sira opo pasi joa nsira manganangi samparia tau to etu, yako etu, sira polas wo’u njo’u lemba nSidim. Nja’u ria nja’u yami i Makole Bera pasi yununya mangampeas sira. Wali ojo karata makole to opo etu pasi joanya, sira mula masimusu. Wali opo makole pasi joanya masimusu pei lima makole pasi joa nsira.

10Tempo sira mamusu makole to opo mba’a pasi joanya etu mula manganangi makole to lima mba’a pasi joa nsira, see naka tau to nangi etu paka miyai. Tempo makole Sodom pasi makole Gomora pasi taunya miyai etu, re’e to masou yau ri limbo aspal to mapuyu kojo apa malagi limbo aspal nja’u lemba nSidim etu. Pei tau to taa masou yau ri limbo aspal etu, sira miyai yau nto’u tongku. 11Wali makole to opo mba’a to manganangi sira, sira mangoko yau samparia ngaya-ngaya pasi samparia pangkoni nto Sodom pasi to Gomora. 12Wali tempo etu i Lot, pinuana i Abram, re’e maroo nja’u kota Sodom, wali sira mansoko seja ia pasi yununya pasi mangoko samparia to ia puenya, panewa sira miyai.

13Pei re’e samba’a tau ri oyonya tau to nasoko i Makole Kedorlaomer pasi yununya etu to miyai yau. Wali ia mansaka yau mangampago i Abram, to nato’oka ntau to Ibrani apa ia tau Ibrani semo. Tempo etu i Abram tiroowa maroo nja’u kaju poli to i Mamre puenya. I Mamre etu ia to Amori to sintua’i pei i Eskol sira dua i Aner. Wali sira opo i Abram roomo mangika parajanji damasisawang ane damamusu.

Wali ojo karata ntau to roomo miyai yau etu, ia mangansaritaka i Abram pei manganto’oka ia i Lot ia roomo nakeni yau ntau. 14Wali tempo i Abram mangandonge pinuananya roomo nasoko ntau, ia mampasiromunaka joanya to pande mamusu. Tau etu togo atu pei sampuyu wayu mba’a kaborosinya pasi sira paka rapoanaka ri lipu i Abram semo.

Wali i Abram pasi joanya etu yau sindara-ndara pei i Mamre sira togo sintua’i pasi joa nsira. Sira yau mangalulu i Makole Kedorlaomer pasi yununya, panewa mangarata sira nja’u kota Dan. 15Yako etu, ojo kawurinya rao, i Abram mangantilaraka yau joanya mangika bara sawei kelompok, panewa sira mangalimpung yau makole opo mba’a etu pasi joa nsira ri raya mburi. Roo see, sira kodi majoli mangamusung makole opo mba’a etu pasi joanya pei manganangi sira, see naka sira miyai yau. Pei i Abram pasi joanya mangalulak sira rataka nja’u kota Hoba. Kota Hoba etu re’e ri tondo utara yako kota Damsyik.

16Wali ojo pangarata i Abram makole-makole etu, ia mangoko muni samparia to naoko yau nsira. Ia mangalapa muni pinuananya, i Lot, pasi samparia to we’a pasi tau to yusa to nasoko nsira. Pasi ia mangoko muni samparia to i Lot puenya pasi samparia ngaya-ngaya to yusa to naoko makole-makole etu. Wali samparia to etu paka napalaes i Abram pasi yununya, roo see sira yau muni mangampago lipu i Abram.

Sarita Tempo i Abram Simparata Pei i Makole Melkisedek

17Wali ojo karata i Abram yako pangananginya i makole Kedorlaomer pasi makole to yununya, roo see ma’i i Bera, makole ngkota Sodom, ma’i damangantomu ia nja’u Lemba nSyawe to rato’oka seja Lemba Makole.

18Pasi ma’i seja i Makole Melkisedek mangantomu seja ia. I Melkisedek etu, ia makole ri kota Salem pasi ia seja to pampue i mPue Allah, etu semo i Pue Allah to Mangkuasang Samparia. Wali i Melkisedek etu mangkenika i Abram pangkoni, etu semo roti pasi tule anggur. 19Ojo karoonya ia mangawaika i Abram roti pasi tule etu, ia manganto’oka i Abram, to’onya, “I Pue Allah semo to mangkuasang samparia pasi to nampapowali yangi pasi lino. Wali kuporapika resi Ia see Ia damampakasanang katuwumu. 20Barong i Pue Allah to Mangkuasang Samparia, apa Ia semo to mangansawang korom naka pei korom manganangi balimu.” Etu semo gombo i Melkisedek resi i Abram. Wali i Abram mamporomung samparia ngaya-ngaya to inokonya tempo mamusu panewa mangika sampuyu ntila to sewaju kabaenya, panewa santila iwaikanya resi i Melkisedek.

21Yako etu makole ngkota Sodom manganto’oka i Abram, ia manganto’o, “Waika aku samparia taungku to rakeni yau seore. Pei korom semo mangoko samparia ngaya-ngaya to nukeni muni ngkorom etu.”

22Pei i Abram manganto’oka makole ngkota Sodom etu, to’onya, “Aku roomo mangika parajanji resi i Pue Yawe, Ia semo Allah to Mangkuasang Samparia, pasi to nampapowali yangi pasi lino. 23Parajanjingku resi Ia etu semo aku taa damangoko pasiwa sangkodi to korom puenya. Pasiwa sampu’a bana bara sampu’a so’o nsapatu taa dakuoko naka ne’e korom damanganto’o, ‘Aku semo to mampakasugi i Abram.’ 24Wali apa saba parajanjingku etu, see naka aku taa damangoko bara kesaa kasimbalinya yako pangkoni to roomo nakoni nu joangku. Pei ane i Aner sira togo i Eskol, pasi i Mamre, to nangalulu aku yau mamusu, biakamo sira togo mangoko tila to si sira.”

Currently Selected:

Pomulanya 14: WNT

Highlight

Copy