MAADOCO 7

Soto choone’majaicho

1Yaawä Jesuuquidiito döiña jaadiseeo cöneejoto, anejjacoomo judhío owaanomannamo mmaja, Jeduusadén ñancomo we’a’como. 2Tönwanno cöneene’ma’to dhantai Jesuuquidiito nowaanomaadö tuna que tamäädöcoomo amoichadö’jo’da yääwashinchädööcomo. Yääje yeijäcä cönquiimajä’a’to. 3Ñanno jaadiseeo, tameedä anejjacoomo judhío mmaja, tuna que tamäädöcoomo amoichadö’joone töwääwashinchä weneeneto, jenaado’jocoomo wätunnäichomo nönge töweichöcoomo wetä. 4Töwäätätöijato’como ñano’jödö töwennaca’comjäcä ääwashinchä’da mmaja weneeneto dea tuna que tamäädöcoomo amoichadö wa’cä. Yää ’jeje anejja mmaja tönnöe weneeneto dea, yää sunuuji aquiiyanoocadö, jadancaana mmaja, ädiiñä mmaja, ä’wätä aquiiyanoocadö mmaja, jenaado’jocoomo wätunnäichomo nönge dea. 5Yaaje mma yaawä ñanno jaadiseeo, judhío owaanomannamo mmaja, Jesuuquidiito cöneecamma’joicho:

—¿Ane’que’nei onoowanoomadö ei’cha naicho jenaado’jocoomo wätunnäichomo nönge? Tönwanno tamäädöcoomo amoichadö’jo’da töwääwashinchä weneeneto; quee cönä’döa’to.

6Jesuuquidiito cöneccujä’a’to:

—Chäänönge Isaía adheecammatääne, änwanno yääjönö wa’co’como wäänejoodö. Edääje töwö cömmennäi:

Canno soto aashicha jääcä töwa’deuwe weneeneto,

chö’tajäätödööcomo mmaane amoinche na jääcä.

7Töwäädä mma wa’deme’tä weneeneto.

Tönwanno tönoowanooma weneeneto soto wätunnäichomo que mma; quee cömmennäi Isaía.

8Änwanno Wanaadi waanontädö tömja’do’jo määnetääne, soto wätunnäichomo mma tödöödö wetä, yää jadancaana aquiiyanoocadö, sunuuji mmaja, anejjacoomo mädä nöngato mmaja; quee cönä’döaacä Jesuuquidiito jaadiseeo wwäiñe.

9Edääje Jesuuquidiito cönä’döa’dea chäwwäiñe:

—Chäänönge jaiño mädääje maatoode, äwäätunnäichomo tödöödö wetä Wanaadi waanontädö me’nomjaatoodö. 10Edääje Moisé cönä’döaacä: “Oomo aashicha tödööcä, aanö mmaja. Ñäädä tumö eunei, senö eunei mmaja, tämaane emaatäcä ñäädä;” quee cönä’döaacä Moisé. 11Änwanno mmaane edääje äwä’dödööcomo: Yääje soto ä’döjai ña tumö wwä, senö wwä jeiñe mma: “Ä’wa’täjai’cha wa. Tameedä önnödö, äwwä tu’emööjato’jödö, coodowaanaje na;” quee äwä’dödööcomo änwanno. (Wanaadi wwä tu’e na; quee töwä’dö’se yeichö mädä coodowaana, quee naadö.) 12Yääje soto wä’döa’jäcä yuumö ani’wa’tojo’da maato yaawä chäwwä, senö ani’wa’tojo’da mmaja. 13Mädääje ema’jödööje Wanaadi waanontädö mödööato äwäätunnäichomo que, yää chääque ännacontoncomo tönoowanooma määnetäänedö. Jooje anejjacoomo mädä nöngato mmaja tönnöe määnetääne dea; quee cönä’döaacä Jesuuquidiito.

14Yääje mma yaawä Jesuuquidiito cöna’dejjaicho dea ñanno soto; cönä’döaacä chäwwäiñe:

—Aashicha cätaatäcä tameedä änwanno; chäänönge chö’tamme’täcä wa’deuwödö. 15Jönaawono womongajä soto choone’majai’cha na. Mänööne, yo’tacaano weja’caajääne, töncone’ma. 16Eta’sato neta’ñojo; quee cönä’döaacä Jesuuquidiito.

17Yaawä ä’saca yoomonga’jäcä, soto jadäiñe’da yeichö, ñoowanoomadö cöneecamma’joicho yää yö’seeno ñeecamma’jödö jäcä. 18Jesuuquidiito cönä’döaacä chäwwäiñe:

—¿Änwanno jadä’jödöödä äntö’tammecö’da maato dea? ¿Odhoowanääcäiñe’da ca’ nai tameedä jönaawono womongajä soto choone’majai’cha yeichö? 19Chö’tajäätödö aca yoomomöödöjöönö, iwenwacaane yoomongajä. Yää neja’ca yaawä wecaanawä; quee cönä’döaacä Jesuuquidiito.

Yääje töwä’dödö que töwö Jesuuquidiito tameedä äwanshi amoije’da coneecammai. 20Edääje mmaja Jesuuquidiito cönä’döa’dea:

—Soto do’tacaano weja’caajääne cone’matä töweiye nai, 21soto do’tacaano we’ajääne conemjönö weiyajä, yää cone’da tö’tajä’nä, anejja jiñamo ajoojodö mmaja, masuuduichanä mmaja, soto emaadö mmaja, 22wemeenönnä mmaja, anejja nödöödö ijummadö mmaja, conemjönö mmaja, wätäncu’tänä mmaja, tujummamjönö ijummadö mmaja, we’neimmanä mmaja, wätunnä dha’me weiñä mmaja, o’jodhe töwei’she weiñä mmaja, töwäätuujacoone’da weiñä mmaja. 23Tameedä mädoocomo conemjönö ne’a soto do’tacanno; mädääne soto töncone’ma; quee cönä’döaacä Jesuuquidiito.

Jesuuquidiito ecamjö’jödö wodi siidoujeniisiyaano wwä

24Yäätonno Jesuuquidiito cönääma’täi yaawä. Tiido ña cöntämä, Sidhón ña mmaja. Yaawä ä’saca töwä’döa’jäcä töwääcadeeme’jojo’se’da cönä’jaacä. Yääje yeichaame tacaade’da eijai’cha cönä’jaacä. 25Yaawä dea mma chääcadö cönäätaacä wodi odo’sha ’jano iiñedö wwä. Ñäädä cöneejä yaawä; Jesuuquidiito je’taca tä’mudhe cönä’döi. 26Töwö cönä’jaacä judhíojöönö, siidoujeniisiyaano cönä’jaacä. Töwö tönnedö wodi’chä acanno odo’sha cömja’canö’jajaacä Jesuuquidiito wwä. 27Yaawä Jesuuquidiito cönä’döaacä chäwwä:

—Mudeeshi’chääne nääwashinchä’ña’to awa’de. ¿Cone’da jönca töweiye nai mudeeshi’chä cataadöcoomo utuudu sö’na’cä wwäiñe? quee cönä’döaacä.

28Ñäädä cöneccujä’acä yaawä:

—Yääjönca. Yääje yeichaame sö’na’cä mmaja tönäu’cwe weneeneto meesa o’nä mudeeshi’chä uduucomo wä’me’jödö; quee cönä’döaacä ñäädä wodi.

29Yaawä Jesuuquidiito cönä’döaacä chäwwä:

—Chäänönge yääje mä’döa; äjääne eduuwa. Odo’sha töweeja’ca na eduuwa ännedö acanno; quee cönä’döaacä Jesuuquidiito.

30Yaawä tömmai chaca ñäädä wodi wä’döa’jäcä tönnedö cöneedantäi ä’wäto jo; odo’sha ’je’da cönä’jaacä yaawä.

Töjaanaquemjönö ejiichö’tä’jödö

31Yääje mma yaawä Tiido ñanno Jesuuquidiito cöntännea. Sidhón chäcä cöneeja’dätäi, Decaapodi chäcä mmaja. Caadideea cu’jäi ña cönä’döi yaawä. 32Yäätä chäwwadäädä soto cönnejooto dhanwa töjaanaquemjönö; ta’deucone’da mmaja cönä’ja’dea ñäädä. Tönwanno Jesuuquidiito amäädö cönnöja’to ñäädä de’wä, ejiichö’tädö wetä. 33Yaawä Jesuuquidiito ñäädä cönaadäi soto jonnoiñe. Tamäädö dhadaadö cöneewaacai ijaanaca, ääjato. Töwö cönääta’däi yaawä; ñäädä ta’deuconemjönö nudu cönaajojoi yaawä. 34Caju ña ene’mancädä Jesuuquidiito cönäädemmai; cönä’döaacä yaawä töjaanaquemjönö wwä:

—Eujaata; quee. Nejaana’duca’ñojo; quee töwä’dö’se yeichö.

35Yaawä dea mma ñäädä cöneejana’ducai; ñuudu mmaja aashicha cönä’döi chea. Ta’deude cönä’jaacä yaawä. 36Yaawä Jesuuquidiito cönä’döaacä soto wwäiñe:

—Anejjacoomo wwä maneecadeeme’täi’che mädä; quee.

Yääje töwäätuuja’jocoomo weichaame jooje’cä mma töneecammajä’e cönä’ja’to. 37Tönwanno jooje töwääcatonca cönä’ja’to. Edääje töwä’döe cönä’ja’to:

—Töwö Jesuuquidiito tameedäädä aashicha tönnöe. Töjaanaquemjönö jadä’jödöödä tömjana’duca, ta’deudemjönö töna’deudeme’jo mmaja; quee töwä’döe cönä’ja’to.

Currently Selected:

MAADOCO 7: MCH

Highlight

Copy