MAADOCO 2

Secumjato adonca’jödö

1Äächädä anooto yä’döa’jäcä Jesuuquidiito cöntännea Cajeedamu ña. Tä’saca yeichö cöneecatai yaawä. 2Yaawä jooje soto cöne’jummaicho yöiña. Maa tu’que cönä’jaacä, mönaatata jona tödööene. Töwö Jesuuquidiito Wanaadi a’deddu cöneecammajä’acä chäwwäiñe. 3Yaawä cöneejoto dea aacäichea dhanwaacomo, secumjato dha’me. 4Tönwanno Jesuuquidiito döiña ä’döjai’cha cönä’ja’to, jooje soto yeichomjäcä. Yääje yeijäcä maa cöninwa’tocaicho Jesuuquidiito ejoodhe. Yää ai cöneenö’toicho ñäädä cädäijato, chä’wötö joodä. 5Chäwwäiñe täcamjödö eneea’jäcä Jesuuquidiito cönä’döaacä cädäijato wwä:

—Dhanwa, ocoone’nadiiyö täncwanno’jo na; quee cönä’döaacä.

6Yäätä cönä’ja’to anejjacoomo judhío owaanomannamo, shuucu. Tönwanno cöntö’tajä’a’to: 7“ ¿Ane’cotoojo mä’dä mädääje nä’döannea? Cone’da na’deuwa Wanaadi jäcä. Anejja conemjönö encwanno’jojai’cha na, Wanaadi mmaane;” quee cöntö’tajä’a’to. 8Jesuuquidiito dhowaanäcä cönä’jaacä yääje chö’tajäätödööcomo. Töwö cönä’döaacä chäwwäiñe:

—¿Ane’que’nei mädääje ätö’tajä’ato dea? 9¿Äshono ätääcammacoije nai määdhä secumjato wwä: “Ocoone’nadiiyö täncwanno’jo na”, quee ’ja? ¿Edääjeene’: “Aanöncä; adhe’wötö adääcä; oojoimacä”, queene’ ? 10Edä wödööa odhoowanääcäiñe yeichö wetä Soto nnedö soto cone’nadiiyö encwanno’jojai yeichö edä nono de’wä; quee cönä’döaacä Jesuuquidiito.

Yaawä töwö cönä’döaacä secumjato wwä:

11—Äwwä yääje wä’döa, aanöncä; adhe’wötö adääcä; ämmai chaca äjääne; quee cönä’döaacä.

12Yaawä dea mma ñäädä dhanwa cönammöi. Tä’wötö shoomadö’jo cöntämä yaawä tameedä ñeenedööcomooje. Tameedä ñanno soto cönääcatoncaicho. Aashicha Wanaadi jäcä cöna’deuwa’to; cönä’döa’to:

—Mädääjato aneene’da töweiye caato; quee cönä’döa’to.

Dewí a’dejja’jödö

13Yää ’jeje Jesuuquidiito cöntännea chu’jä döiña. Yaawä tameedä soto cöne’jummaicho yöiña. Töwö cönoowanooma’to yaawä. 14Yaawä töötädaawä töwö Jesuuquidiito Dewí cöneejodöi, ñäädä Aadeujeeo nnedö. Shuucu cönä’jaacä acu’shänä jödaatai i’jummannamo weicho’como taca. Jesuuquidiito cönä’döaacä chäwwä:

—Ma’che jaadä.

Dewí cönammöi yaawä, chääjadä töötädöje mma.

15Yaawä Dewí mmai chaca Jesuuquidiito wääwashinchädaawä jooje acu’shänä jödaatai i’jummannamo mmaja cönoomomöicho dea, anejjacoomo conemjönö dönnamo mmaja. Tönwanno Jesuuquidiito jadä cönääwashincha’to, ñoowanoomadö jadäiñe mmaja. Jooje cönä’ja’to ñanno Jesuuquidiito jadoncomo. 16Yaawä judhío owaanomannamo, jaadiseeo mmaja, cöneenea’to ñanno jadäiñe Jesuuquidiito wääwashinchädö. Tönwanno cönä’döa’to Jesuuquidiito nowaanomaadö wwäiñe:

—¿Ane’que’nei mmaja odhoowanoomaneichomo nääwashinchannea acu’shänä jödaatai i’jummannamo jadä mmädä, conemjönö dönnamo jadä mmaja? quee cönä’döa’to.

17Yää eta’jäcä Jesuuquidiito cönä’döaacä chäwwäiñe:

—Cädäijemjönö täjiichö’tänei ämjumma’da töweiye nai; cädäijato mmaane tumjumma. Chäänönga’como a’dejja’da we’ne, conemjöncomoone; quee cönä’döaacä Jesuuquidiito.

Wäänemaanä jäcä Jesuuquidiito ecamma’jo’jödö

18Yaawä Juan Wautiita nowaanomaadö, jaadiseeo nowaanomaadö mmaja cönäänema’to. Anejjacoomo soto cönä’döa’to Jesuuquidiito wwä:

—¿Aaquene Juan nowaanomaadö töwäänema weneeneto, jaadiseeo nowaanomaadö mmaja; amäädä onoowanoomadö mmaane äänema’da? quee cönä’döa’to.

19Jesuuquidiito cönä’döaacä chäwwäiñe:

—¿Aaquene mmaja jötaanä enennamo äänemaadöto deeade’ töjöötaamö töjaadäiñe yeichaame? Töjöötaamö töjaadäiñe yeichawä äänemaajai’cha naato. 20Aneedawä anooto na’de choojonnoiñe töjöötaamö wataadojootojo; yaawä näänemaato’de.

21“Töwoomö jenaado’jä ana’tä’da weiñä nai eduuwaato sedei’jödö que. Eduuwaato que a’ta’jäcä eduuwaato töwaacö’ca yaawä jenaado’jä shiichajoodöje. Töwaataucwa’cä jeene yaawä yeeshiicha’jödö. 22Eduuwaato chääjedöödö eccudu döaajä anacca’da weiñä nai jenaado’jä chääwötö iji’jä döaajä aca. Mädääje tödööa’jäcä chääwötö neshiicha yaawä, chääjedöödö eccudu nemaacuda yaawä, iji’jä mmaja. Eduuwaato iji’jä acaane chääjedöödö eccudu eduuwaato döaajä shoomadö; quee cönä’döaacä Jesuuquidiito.

Wäädeetatoojo anooto awä tödööemjönö tödö’jödö Jesuuquidiito nowaanomaadö wwäiñe

23Yaawä wäädeetatoojo anooto awä Jesuuquidiito cönta’to audaajä ai. Töötädaawäiñe ñoowanoomadö täu’cwemö cönaiyoa’to. 24Yaawä jaadiseeo cönä’döa’to Jesuuquidiito wwä:

—¿Aaquene onoowanoomadö wäädeetatoojo anooto awä tödööemjönö nödööanto? quee cönä’döa’to.

25Jesuuquidiito cönä’döaacä chäwwäiñe:

—¿Ana’de’tä’da ca meiya’quene Dawí nödö’jödö ämiije töweichö, chääjadoncomo mmaja? 26Aawiyataade Wanaadi wwä töwa’deuwaamo edhaajotoncomooje yeichö töwö Dawí cönoomomöi Wanaadi weichojo taca. Uu täneemöje tödööajä cönäu’cwai yaawä, töjaadoncomo wwä cuntui chea. Yää uu cönä’jaacä mäccö mmädä uduuje tödööajääjönö, Wanaadi wwä töwa’deuwaamo uduucomooje tödööajä mma; quee cönä’döaacä Jesuuquidiito jaadiseeo wwäiñe.

27Edääje cönä’döa’dea töwö:

—Wäädeetatoojo anooto tödööajä na soto jäcäinchädä; soto döaajä mmaane wäädeetatoojo anooto jäcäinchädootoje’da. 28Yääje yeijäcä Soto nnedö na wäädeetatoojo anooto edhaajäje jadä’jödöödä; quee cönä’döaacä Jesuuquidiito.

Currently Selected:

MAADOCO 2: MCH

Highlight

Copy