DUUCA 7
7
Suddau edhaajotoncomo anoonö adonca’jödö
1Yää ’jeje, soto netaadöcomooje töwa’deuwödö töwä’ca’jäcä, Jesuuquidiito cöntämä Cajeedamu ña. 2Yäätä cönä’jaacä suddau edhaajotoncomo, domaano töwö. Töwö dhanoonö cädäije cönä’jaacä, wäämanääje. Imjummadö ñäädä cönä’jaacä. 3Jesuuquidiito ecaadö eta’jäcä ñäädä suddau edhaajotoncomo wwä, töwö cönaanontoicho inchoncomo, ñanno judhío edhaajotoncomo, Jesuuquidiito a’dejja, tanoonö adoncajoodö wetä chäwwä. 4Jesuuquidiito döiña töwä’döa’comjäcä, ñanno inchoncomo cöna’deuwa’to chäwwä, cönä’döa’to:
—Ñaa anontänei’jödö nijummadö woije tödööjai ma, aashichaato töwö yeijäcä. 5Judhíocoomo yaacö’je töwö, cöwe’jummato’como cönnöjoichö naane’; quee cönä’döa’to Jesuuquidiito wwä.
6Yaawä Jesuuquidiito cöntämä chääjadäiñe. Amoinche’da yä’döa’comjäcä, suddau edhaajotoncomo töjimmä cönaanontoicho Jesuuquiidito wwä ecamma:
—Mädääje nei’ñojo, Cajiichaana. Aashichaatojöönö öwö; ömmai chaca omomjai’cha ma; quee ecamma.
7Edääje mmaja suddau edhaajotoncomo cöneecammaja’dea töjimmä wwäiñe:
—Aashicha’da weijäcä öwö dea adöiña tä’da weiya. Töwa’deuwe mmaane adha’deucä, yaanonö aadoncaiye. 8Tädhaajäcaato mmaja öwö dea. Yaanonö mmaja töweiye naicho dea, suddau. “Äjääne,” ca’jäcä öwwä anejja wwä, töötä yaawä ñäädä. “Ä’cäde,” ca’jäcä, töwe’e yaawä. “Mädä tödööcä,” ca’jäcä öwwä yaanonö wwä, tönnöe yaawä töwö; quee mmaja suddau edhaajotoncomo cöneecammaja’dea tanoonö wwäiñe.
9Jesuuquidiito wacö’je cönäätaacä yääje ya’deuwö’jödö. Töwö cönä’jedennacai; cönä’döaacä ñanno töncäconcomo weejödö wwäiñe.
—Chäänönge yääje wä’döa äwwäiñe, mädääjato ecaanö’nei aneene’da wäänene, iisadaaediitacoomo jadä’jödöödä; quee cönä’döaacä.
10Cönennacaicho yaawä ñanno suddau edhaajotoncomo anoonö’jödö. Tadoiñe cöneedantoicho ñäädä cädäijato’jödö.
Iiño wääma’jödö nnedö adonca’jödö
11Yää ’jeje Jesuuquidiito Naín ña cöntaacä, tönoowanoomadö jadäiñe, jooje anejjacoomo soto jadäiñe mmaja. 12Jata jäcä amoinche’da töwä’döa’comjäcä, soto wötäädöcoomo Jesuuquidiito cöneeneaacä, yäämaajä dha’me, ewaaca iichädööcomo. Ñäädä yäämaajä cönä’jaacä ñäädä mma yeenö nnedö. Yeenömjödö cönä’jaacä iiño wääma’jödö. Jooje soto cönä’ja’to chääjadä, yää jataawoncomo. 13Ñäädä wodi töwwä eneea’jäcä, Cajiichaana Jesuuquidiito wentumje cöneeneaacä; cönä’döaacä chäwwä:
—Maamoi; quee.
14Yaawä äqueejö ewöötö wwadäädä Jesuuquidiito cöntämä; cönaajojoi. Adännamo cöneedennaicho yaawä. Jesuuquidiito cönä’döaacä äqueejö wwä:
—Dhanwa, edääje wä’doa äwwä, aanöncä; quee cönä’döaacä.
15Yääje mma yaawä ñäädä yääma’jödö shuucu cönammöi; töwa’deuwödö cönaajäntäi. Jesuuquidiito cuntui yaawä yeenö wwä. 16Yää eneea’jäcä tameedä soto cönääcatoncaicho yaawä; aashicha Wanaadi jäcä cöna’deuwa’to; cönä’döa’to:
—Wanaadi wa’deuwödö ecammanei täneejucaato määdhä cantawäiñe naadö. Tösootoi töneene dämma töwö Wanaadi; quee cönä’döa’to.
17Jesuuquidiito ecaadö cöneecatai yaawä Judheea ña, tameedä yää weichö wa’cä.
Juan Wautiita nanonto’jocoomo
18Juan nowaanomaadö tameedä yää cöneecammajäätöicho tädhaajotoncomo wwä. 19Juan cöna’dejjaicho yaawä aacä tönoowanoomadö; cönenno’jaicho Jesuuquidiito ecamma’jo: “ ¿Ñäädä ca amäädä Äwaanacaanei, töwe’emööje tacaade naadö, anejjaane ñaa niyoomo’canä?” quee ecamma’jo. 20Jesuuquidiito döiña ñanno cöntonto yaawä; cönä’döa’to chäwwä:
—Juan Wautiita ñaa anontäne adheecamma’jo, ¿ñäädä ca amäädä Äwaanacaanei, töwe’emööje tacaade naadö, anejjaane ñaa niyoomo’canä? quee adheecamma’jo; quee cönä’döa’to.
21Ñanno wä’dödaawäiñe ñeenedööcomooje Jesuuquidiito jooje cädäija’como cönaadoncaicho, jooje yäntunamjödööcomo mmaja, odo’sha ’ja’como mmaja. Jooje tänuuquemjöncomo cöneenu’täjä’a’to dea. 22Yaawä Jesuuquidiito cönä’döaacä Juan anoonö wwäiñe:
—Aneene’jocoomo ecammajä’tantäcä Juan wwä, aneeta’jocoomo mmaja. Chäwwä ecammajä’täcä’de tänuuquemjöncomo enu’tädööcomo, secumja’como sheecuncadööcomo mmaja, woi ’ja’como ejiichö’tädööcomo mmaja, töjaanaquemjöncomo ijaana’ducaadöcoomo mmaja, yäämaajä adoncadö mmaja, aashichaato wätunnä ecammajäätödö mmaja wentumja’como wwä. 23Ta’cwaiñe eijai ña ñäädä chäänöngeedä yeecanö’nei; quee cönä’döaacä Jesuuquidiito Juan nowaanomaadö wwäiñe.
24Juan anoonö wöta’comjäcä Jesuuquidiito cönaajäntäi Juan jäcä töwa’deuwödö ñanno soto wwäiñe. Töwö cönä’döaacä:
—¿Ane’cäämö ene meiya’quene jata ’jemjönö aca? ¿Cudaata nönge yeiyatäi mecaanö’a’quene, jejeichä awä töwäätu’me? 25Yääje’da yeiya’jäcä, ¿ane’cä döe yöiña töötä mä’ja’quene? ¿Dhanwa täjeeto yoomö ene ’ja? Ñanno täje’como yoomö, aashicha’como yääwashinchädö mmaja, cajiichaana mmai chacaiñeene töweiye naato. 26¿Ane’cä döe yöiña töötä mä’ja’quene? ¿Wanaadi wa’deuwödö ecammanei ene ’ja? Ee, Wanaadi wa’deuwödö ecammaneiñe yeiyajä. Wanaadi wa’deuwödö ecammanei mmajöönö töwö. 27Juan ñäädä chääjäcä Wanaadi a’deddu imennaajä naadö:
Öwö, Wanaadi, yaanonö wanonta’de odhoowajo,
adheemadö choonecaaneije; quee naadö.
28Chäänönge yääje wä’döa, Juan ñäädä tameedä Wanaadi wa’deuwödö ecammannamo e’jodha’como. Yääje yeichaame tameedä Wanaadi töcaajichaanaije tödöönei, mäccö mmädä mma yeichaame, Juan e’jodhe na; quee cönä’döaacä Jesuuquidiito.
29Yää eta’jäcä töwwäiñe tameedä soto Wanaadi chäänöngatooje cöne’toicho, acu’shänä jödaatai i’jummannamo jadä’jödöödä. Ñanno cönä’ja’to Juan wwä wautisaaje cönä’döjoichodö. 30Jaadiseeocoomo mmaane, judhío owaanomannamo mmaja, Juan wwä wautisaaje ä’döjo’jöncomo, Wanaadi wwä töwäätuujadööcomo cönquiiñemeecöicho. 31Yaawä Cädhaajotoncomo cönä’döaacä:
—¿Ane’cäämö yö’senno joi canno soto eduuwa naatoodö tacammamje naichö jääcä? ¿Änääcöömä nönge naicho? 32Mudeeshi’chä töwä’shiquiija naichodö nönge naato, jödoodo annawä yaatajiima’como, jiichu etöödöje. Tönwanno ä’döjai ñaatoodö naane’ töjimmä wwäiñe: “Äwänwato’comooje jiichu etöötaame ñaa wwä, änwa’da maato. Wentumje ñaa wecanta’ñätaame, aamo’da maato;” queeto nönge naato. 33Ñäädä Juan cönä’ja’dö naane’, jooje ääwashinchä’da, jooje töwoocödö aneenö’da mmaja. Yääje yeichaame odo’sha ’je töne’tä mä’ja’quene. 34Yää ’jeje Soto nnedö cöneeja, öwö waadö. Öwö mmaane soto jadäiñe töwääwashinchä wäänene, woocödö tönenque mmaja. Ämiijatooje daja ye’tätä määnetääne, töwä’dau’cwatooje mmaja. “Conemjöncomo wacöötö mä’dä, acu’shänä jödaatai i’jummannamo wacöötö mmaja;” quee töwä’döe määnetääne jääcä. 35Yääje yeichaame wätunnä ecannö’nnamo aashicha yeiya’comjäcä owaanäcä yaawä yää wätunnä chäänönge yeichö; quee cönä’döaacä Jesuuquidiito.
Simón ñäädä jaadiseeo mmai chaca Jesuuquidiito wääwashinchä’jödö
36Yääje mma yaawä jaadiseeo Jesuuquidiito cöna’dejjai ewanshinchädö wetä. Ñäädä jaadiseeo mmai chaca töwoomonga’jäcä, Jesuuquidiito cönaatajiimai meesa dö’tä. 37Yaawä yää jataawono wodi cöneejä; masuudui töwö cönä’jaacä. Töwö cöneetai jaadiseeo mmai chaca Jesuuquidiito wääwashinchädö. Yääje yeijäcä juu shimi’jotoojo dha’me cönoomomöi, jeteiya tajääde’dato chääwötö’cä. 38Yaawä töwaamoancädä töwö cönä’döi Jesuuquidiito ncadheedä, i’judu dö’tä. Cönaajäntäi yaawä i’judu töjöödö tänaacudu que; tuju’jädö que cöncocaacä. Shuumajä’ancädä tönnejöödö juu shimi’jotoojo que i’judu cömjöi yaawä. 39Yää eneea’jäcä jaadiseeo wwä, ñäädä ääwashinchä Jesuuquidiito a’dejjanei’jödö wwä, töwö cöntö’tajä’acä: “Wanaadi wa’deuwödö ecammanei ñeeneje määdhä weiya’jäcä, dhowaanäcä eichö määdhä wodi tajoojonei masuuduije yeichö;” quee cöntö’tajä’acä. 40Yaawä Jesuuquidiito cönä’döaacä jaadiseeo wwä:
—Simón, she’caasa wa’deuwö’se wa äwwä; quee cönä’döaacä.
—Adha’deucä, Owaanomaanei; quee cönä’döaacä ñäädä jaadiseeo.
41Jesuuquidiito cönä’döaacä:
—Soto cönä’jaacä, tönwacaamaamöje jödaata u’nei. Aacä cönä’ja’to ñäädä ejeeque’nä’nnamo. Tooni cöneejeque’nä’acä tooni soto soto jödaata; yeichacoono cöneejeque’nä’acä aacä soto jödaata mma. 42Täjeematoojo ’je’da yeijäcä chäwwäiñe, ñäädä täjeeque’nä’emö täjeeque’näjöödö cönencwanno’joi, a’nädäncädä. ¿Äshono ñäädä täjeeque’nä’emö jooje’cä ijummajai nichö’taanä äwwä? quee cönä’döaacä Jesuuquidiito Simón wwä.
43Simón cöneccujä’acä:
—Ñäädä ’cännä, jooje’cä ñeejeque’näjöödö cönencwanno’joichö.
Jesuuquidiito cönä’döaacä:
—Chäänönge michö’tammecöi.
44Yaawä wodi wwadäädä töwä’jedennaca’jäcä Jesuuquidiito cönä’döaacä Simón wwä:
—Määdhä wodi naadö naane’. Öwö yoomomöi ämmai chaca. Tuna äntu’da meiya u’judu coccatoojo. Määdhä mmaane, tänaacudu que töjöödö’jo, tuju’jädö que u’judu nichoccai. 45Suuma’da meiya amäädä. Määdhä mmaane, woomomöödö jonnoto’jödöödä u’judu shuumadööje nä’jaanä. 46Amäädä juu shimi’jotoojo que ju’jädö ämjö’da meiya. Määdhä mmaane u’judu nöjöi juu shimi’jotoojo que. 47Yääje yeijäcä edääje wä’döa äwwä, töwö choone’nadiiyö täncwanno’jo na, töwö chäwwä jooje jummadö weijäcä. Ñäädä she’caasa choone’nadiiyö encwanno’jaajä, jummatä’daiche; quee cönä’döaacä Jesuuquidiito.
48Yääwä wodi wwä Jesuuquidiito cönä’döaacä:
—Ocoone’nadiiyö täncwanno’jo na; quee.
49Ñanno chääjadä cönääwashincha’todö tönwannoje dea cönä’döa’to:
—¿Änääcööne mä’dä, mädä wa’cä conemjönö tönencwanno’jo nai? quee.
50Yaawä Jesuuquidiito cönä’döaacä wodi wwä:
—Äwwä ecamjödö weijäcä määwanaacai. Täncanoode’da äjääne eduuwä; quee cönä’döaacä Jesuuquidiito.
Currently Selected:
DUUCA 7: MCH
Highlight
Share
Copy
Want to have your highlights saved across all your devices? Sign up or sign in
© 2014 Reservados todos los derechos
