DUUCA 23

Pidaato je’taca Jesuuquidiito wei’jödö

1Yaawä ñanno jooja’como soto cönammöicho, Jesuuquidiito cönaadoicho Pidaato wwadäädä. 2Iiña cönaajäntoicho yaawä ementädö; cönä’döa’to:

—Määdhä ñaa cöneedantäi soto i’jedäädöcoomoje. Töwö chäwwäiñe jödaata äntujo’da acu’shänä wwä. Äwaanacaaneije töwäätä’tä weneene, cajiichaanaje mmaja; quee cönä’döa’to.

3Yaawä Pidaato Jesuuquidiito cöneecamma’joi:

—¿Judhío Cajiichaanaichomo amäädä? quee cönä’döaacä.

Jesuuquidiito cöneccujä’acä:

—Ee, ñäädä öwö, mecammaadö; quee cönä’döaacä.

4Yaawä Pidaato cönä’döaacä Wanaadi wwä töwa’deuwaamo edhaajotoncomo wwäiñe, soto wwäiñe mmaja:

—Conemjönö määdhä nödö’jödö aneejodö’da weiya; quee cönä’döaacä.

5Tönwanno jooje’cä mma cöna’deuwa’to yaawä; cönä’döa’to:

—Tameedä Judheea ñancomo töni’jedäiñe weneene töwwä owaanomaadö que, Caadideea ña yaajäntä’jödö sadä tödööene; quee cönä’döa’to ñanno Wanaadi wwä töwa’deuwaamo edhaajotoncomo.

Edoodhe je’taca Jesuuquidiito wei’jödö

6Yää eta’jäcä Pidaato wwä, töwö soto cöneecamma’joicho Caadideea ñanooje Jesuuquidiito weichö jäcä. 7Cajiichaana Edoodhe nonoodö de’wonooje Jesuuquidiito weichö eta’jäcä töwwä, chäwwadäädä cönaadojoi yaawä, yää anooto awä Edoodhe Jeduusadén ña yei’jödö weijäcä. 8Jesuuquidiito töwwä eneea’jäcä, Edoodhe jooje cöna’cwainchai, ene’se töwei’jödö weijäcä. Jooje chääcadö töneeta töwei’jödö weijäcä, töwö ene’se cönä’jaacä täneemö tödöödö chäwwä. 9Yääje yeijäcä jooje cöneecamma’jojä’acä. Jesuuquidiito aneccujäätö’da cöneiyacä. 10Yäätä cönä’ja’to dea Wanaadi wwä töwa’deuwaamo edhaajotoncomo, judhío owaanomannamo mmaja; tönwanno jooje Jesuuquidiito cöneementa’to. 11Yaawä Edoodhe, shootoi suddau mmaja, Jesuuquidiito cönquimmajä’a’to. Tönwanno enno’jätöödöje cönwontoicho cajiichaana womö awä. Yaawä Edoodhe cöniiñacaanö’joi chea Pidaato wwadäädä. 12Yää anooto awä Pidaato cöneeconeecaicho Edoodhe acä, äätu’dedööje töweichöcoomo jonno.

Tämaamöje Jesuuquidiito ecamma’jödö

13Yaawä Pidaato cöni’jummaicho ñanno Wanaadi wwä töwa’deuwaamo edhaajotoncomo, cajiichaanaja’como mmaja, jooje anejjacoomo soto mmaja. 14Töwö cönä’döaacä chäwwäiñe:

—Änwanno määdhä mene’to öwwadäädä soto i’jedääneichomooje e’tancädä. Öwö wecamma’jojäätöi aneetadööcomooje. Aneejodö’da weiya conemjönö iiñö’jödö, mementaatoodöje’da. 15Edoodhe mmaja a’que necamma’joi chea, cöwwadäädäiñe niiñacaanö’joichö naane’. Tämamje’da dajaane na, conemjönö iiñö’jödö töweiye yeichöjöönö. 16Imaaminchadö’jo mmaane wishaaca’de; quee cönä’döaacä Pidaato.

17Yää comjedensiya tödöödawä tooni jedeeso u’catoojo Pidaato wwä cönä’jaacä, töweichö nöngeedä. 18Yaawä tameedä soto aacoodaane cöncä’tömjä’a’to:

—Adoojocä mä’dä. Wadaawaane u’cacä; quee cönä’döa’to.

19Ñäädä Wadaawa cönä’jaacä jedeesoje yääwaacajo’jödö acu’shänä tu’de’tä’jödö weijäcä töwwä yää jataawä, soto ema’jödö weijäcä mmaja. 20Yaawä Pidaato cöna’deuwöi chea chäwwäiñe, Jesuuquidiito shaaca’se töweijäcä. 21Tönwanno jooje’cä mma cöncä’tömjä’a’to yaawä; cönä’döa’to:

—Cuduusa jäcä ajoijojoocä. Cuduusa jäcä ajoijojoocä; quee.

22Yaawä aaduwaawädeeto ai Pidaato cöna’deuwöi chäwwäiñe:

—¿Ane’cäämö jo’tädööje? ¿Äshono yää conemjönö iiñö’jödö? Tämamje’da dajaane na, conemjönö iiñö’jödö töweye yeichöjöönö. Imaaminchadö’jo mmaane wishaaca’de; quee Pidaato cönä’döaacä.

23Tönwanno töcä’de cöncä’tömjä’a’to yaawä; cuduusa jäcä cönaajoijoja’to. Yääje töcä’tömjätöödöcoomo que tumjummadööcomo cöneejodöicho ñanno soto, Wanaadi wwä töwa’deuwaamo edhaajotoncomo mmaja. 24Yaawä Pidaato imjummadööcomo woije cönnöjoi. 25Jedeesoje yeichö jonno töwö cunu’cajoi ñäädä acu’shänä tu’de’tänei’jödö, soto emaanei’jödö. Jesuuquidiito mmaane yoijeiñe mma cönnöi.

Cuduusa jäcä Jesuuquidiito ajoijo’jödö

26Jesuuquidiito töwwäiñe adäädawä soto cönaajoicho, audaajä awonno yeejödö; Sideene ñano cönä’jaacä ñäädä, Simónje chäätö. Ñäädä de’wä cuduusa cönnöicho Jesuuquidiito ncäcä adäädö wetä chäwwä.

27Jooje soto Jesuuquidiito ncäcä cönta’to, wodiiñamo mmaja. Ñanno wodiiñamo jooje wentumje cönä’ja’to; ijunnei cönaamoa’to. 28Jesuuquidiito chäwwadäädäiñe cönä’jedennacai; cönä’döaacä:

—Änwanno wodiiñamo Jeduusadén ñancomo, öwö junnei mma maamotäi. Änwanno aweicho’como jäcääne aamotääcä, ännacontoncomo weicho’como jäcä mmaja. 29Yeetunu eneetojo cu’nädö ne’a’de; edääje soto nä’döaato’de yaawä: “Ta’cwaiñe ñäädä ennecaajönö, ñäädä tönnedö ennuichanei’jödööjönö, ñäädä tönnedö yo’janei’jödööjönö;” quee nä’döaato’de yaawä. 30Yaawä edääje soto nä’döaato’de jöö wwä: “Ñaa de’cäi adhe’duccacä;” quee, “Ñaa nejontäcä;” quee mmaja. 31Natö sheenatoode mädääje nödööaatoone’, töwaacö’je mma yu’taajä tödööjai ñaato; quee cönä’döaacä Jesuuquidiito.

32Chääjadä cönaadäa’to dea aacä conemjönö dönnamo’jödö, chääjadä tämaamoje. 33Cönä’döicho yaawä Ye’caichö’jödö ña. Yäätä cuduusa jäcä cönaajoijoicho. Ñanno conemjönö dönnamo’jödö iiñäcä cönaajoijoicho dea, ääjato. 34Yääje mma yaawä cuduusa jäcä tajoijodaawä Jesuuquidiito cönä’döaacä:

—Jaaja, choone’nadiiyöcoomo encwanno’joca; towaanojöönöcoomo mädääje nödööaato; quee cönä’döaacä.

Yaawä ñanno suddau yoomö’jödö töwaadäiñe cöneemecantoicho, wä’cana’canä tödöödö’jo. 35Yäätä soto cönä’ja’to ene’madööje. Cajiichaanaja’como jadä’jödöödä cönenno’jä’a’to; cönä’döa’to:

—Anejjacoomo töneewanaacaiñe cönä’jaacä; töwö dea nääwanaaca’ñojo eduuwa, Äwaanacaaneije Wanaadi nanontä’jödööje töweiya’jäcä; quee cönä’döa’to.

36Suddaucoomo mmaja cönenno’jä’a’to dea. Chäwwadäädä cöntonto, tutuunato emjodö wetä chäwwä. 37Tönwanno cönä’döa’to chäwwä:

—Judhío Cajiichaanaichomooje aweiya’jäcä, amäädä dea ääwanaacacä; quee cönä’döa’to.

38Iju’jä ejoodhe cönä’jaacä quidiiyeeco a’deucwe imennaajä, datiino a’deucwe mmaja, eewedeeo a’deucwe mmaja; “Määdhä ñäädä judhío Cajiichaanaichomo;” quee cönä’jaacä imennaajä.

39Yääje mma yaawä tooni conemjönö dönei’jödö, iiñäcä ajoijaajä cönä’ja’dö, Jesuuquidiito cöneetana’ta’dea; cönä’döaacä:

—Äwaanacaaneije aweiya’jäcä, amäädä dea ääwanaacacä, ñaa mmaja ewaanacaacäde; quee cönä’döaacä.

40Yaawä yeichacoono, cuduusa jäcä ajoijaajä cönä’ja’dö mmaja, töweichacoono cömjiiyemeecöi; cönä’döaacä:

—¿Wanaadi jadä’jödöödä onnontä’da ca manä, ocoone’nadiiyö jo’tädööje äwäntunaanö’taame? 41Cöwö sa’donna cäntunaanö’a cöcoone’nadiiyö jo’tädööje; määdhä mmaane conemjönö iiñö’jödö ’je’da na; quee cönä’döaacä.

42Yaawä töwö cönä’döaacä Jesuuquidiito wwä:

—Jesuuquidiito, jääcä ätö’tacä’de cajiichaanaje äwääneja’jäcä; quee cönä’döaacä.

43Yaawä Jesuuquidiito cönä’döaacä chäwwä:

—Chäänönge yääje wä’döa äwwä, eduuwa dea jaadä ma’de Aashichaato ña; quee cönä’döaacä Jesuuquidiito chäwwä.

Jesuuquidiito wääma’jödö

44Yaawä anunnaque yeichö tameedä nono weichö wa’cä cöntööjamöi i’ya’wä tödööene. 45Shii änweijo’da cönä’jaacä yaawä. Yaawä Wanaadi weichojo acä’jaajä a’dutu cöneeshiichai annai. 46Yääje mma yaawä Jesuuquidiito töcä’de cöna’deuwöi; cönä’döaacä:

—Jaaja, äwwä tödööcä yeecato; quee cönä’döaacä.

Yääje töwä’dödö’jo cönaatacoichai.

47Yää eneea’jäcä ñäädä suddau edhaajotoncomo wwä töwö aashicha cöna’deuwöi Wanaadi jäcä; cönä’döaacä:

—Chäänöngato dämma määdhä nä’jaanä; quee cönä’döaacä.

48Tameedä ñanno jooja’como soto, ene ye’a’como’jödö, yää töwwäiñe eneea’jäcä, wentumjeiñe tömmaichomo taca cönennacaicho yaawä. 49Ñanno Jesuuquidiito jadoncomo’jödö mmaane tameedä yää cöneene’ma’to amoinchenno, ñanno wodiiñamo mmaja, Caadideea ñanno chääjadoncomo we’a’como’jödö.

Jesuuquidiito ewaaca’jödö

50Yäätä cönä’jaacä dhanwa, Joséje chäätö. Aadimaatea ñano töwö cönä’jaacä, yää Judheea ñano jata. Äcamma’jonnamo jimmä töwö cönä’jaacä. Dhanwa aashichaato cönä’jaacä töwö, chäänöngato mmaja. 51Ñäädä cönä’jaacä Wanaadi cajiichaanaje yäänejootojo yoomo’nei. Jesuuquidiito emaadö a’de’tädö ani’wa’tä’da töwö cöneiyacä. 52Ñäädä José cöntämä Pidaato döiña Jesuuquidiito equeejödö e’ca’e. 53Jesuuquidiito equeejödö enö’ta’jäcä camiisha tajääde’dato que cönaiñantäi yaawä. Cöneewaacai yaawä äwa ta’cu’täjöönö aca, täju töcaajä aca. 54Yää cönä’jaacä wecoonecaatojo anootoi’chädö co’momöödawä, wäädeetatoojo anootoi’chädö owaajo.

55Ñanno wodiiñamo, Caadideea ñanno Jesuuquidiito jadoncomo we’a’como’jödö, ewaacannamo ncäcäiñe cöntonto. Tönwanno äwa cöneenea’to, chääquejöödö ewaacadö mmaja. 56Tömmaichomo tacaiñe töwennaca’comjäcä tönwanno juu shimi’jotoojo cönsomaajä’a’to. Wäädeetatoojo anootoi’chädö awä cönäädeetaicho yaawä, waanontä’jä wä’dödö woije.

Currently Selected:

DUUCA 23: MCH

Highlight

Copy