DUUCA 21

Iiñö wääma’jödö wwä jödaata utu’jödö

1Yaawä Wanaadi weichojo taca Jesuuquidiito weichö, töwö cöneene’ma’to töjöödataicha’como wwä jödaata utuudu. Jödaata ewöötö aca cönnöa’to. 2Töwö cöneenea’dea iiño wääma’jödö wentumjato wwä aacä jödaata’cä tödöödö yää jödaata ewöötö aca. 3Yaawä Jesuuquidiito cönä’döaacä:

—Chäänönge yääje wä’döa äwwäiñe, määdhä iiño wääma’jödö’cä nutui tameedä cho’jodheiñe’cä. 4Tameedä canno nutuicho yä’cä mmajöönö. Määdha wentumjato’cä mmaane tameedä töwwä nä’jannö nutui, täwanshiñö ejeematoojojaato’jödö jadäädä; quee cönä’döaacä Jesuuquidiito.

Wanaadi weichojo emajjotoojo jäcä Jesuuquidiito necammajäätö’jöödö

5Yaawä anejjacoomo soto cöna’deuwa’to iiñataaje Wanaadi weichojo jäcä, täju adai’joto iiñataaje yeichö jäcä mmaja. Yää Wanaadi weichojo tönnataama cönä’jaacä Wanaadi wwono soto nutuuducoomo que. Yaawä töwö Jesuuquidiito cönä’döaacä chäwwäiñe:

6—Tameedä edä mene’maatoodö jäcä yääje wä’döa äwwäiñe, edä emajjotoojo cu’nädö ne’a’de. Yaawä tooni täju töweichacoono de’wäädä o’somjo’da na’de; quee cönä’döaacä Jesuuquidiito.

Anooto wataamedö cu’nädö ene’ju’tojo

7Yaawä tönwanno Jesuuquidiito cöneecamma’joicho:

—Owaanomaanei, ¿ächännauwä’cä yää nai’che? ¿Ane’cäämö nai’che yää weja’do’tojo ene’ju’tojooje? quee cönä’döa’to.

8Jesuuquidiito cönä’döaacä chäwwäiñe:

—Odhoowoinchadäiñe’da eichäcä, mätäncu’tojooto’no. Jooje soto naato’de öwö yeetö joi töwäätä’tancädäiñe, “Äwaanacaanei öwö;” quee töwä’döancädäiñe; “Chu’nädö aca nä’döi eduuwa;” quee töwä’döancädäiñe mmaja. Dha’dedducoomo mma maneetatäi’che. 9Yaawä wänä ecaadö eta’jäcä äwwäiñe, wewoodoichanä jäcä mmaja, määcatoncatäi’che. Mädääje awa’de yeeja’do’tojo na, yaatameedöjöönö mma yeichaame; quee cönä’döaacä Jesuuquidiito.

10Edääje mmaja töwö cönä’döa’dea chäwwäiñe:

—Sotoocomo newääna’taato’de, acu’shänääcomo mmaja. 11Nono wätu’medö joojato na’de aneetaja’cäcäiñene’jödöödä, ämi mmaja, cädäi mmaja. Täneemö tönoiñato caju ña näänea’de.

12“Tameedä mädä owaajo soto adhaajäiyato’de amaaminchadööcomo wetä. Töwe’jummato’como taca adhaadäaato’de, adheecamma’jojäätödööcomo wetä. Tönwanno jedeesoje ayöödöaato’de. Cajiichaanacoomo wwadäädä adhaadäaato’de, acu’shänä wwadäädä mmaja, sootoije aweichöcoomo jo’tädööje. 13Yää na’de äwwäiñe ya’deddu ecammajo’tojo ñeetadööcomooje. 14Täncanoode’da eichäcä’de yaawä. Äwwäiñe eccujo’tojo mma mäntö’tamme’jä’täi’che. 15Öwööne wu’a’de äwwäiñe awa’deuto’como, asejjedööcomo mmaja, tameedä ätu’de’tännamo wwäiñe ä’cana’cajo’da aweicho’como. Tönwanno eccujo’tojo ’je’da naato’de yaawä. 16Oomotoncomo jadä’jödöödä ayu’ato’de, aduichoncomo mmaja, adhaacontomo mmaja, ajimmotoncomo mmaja, ajaatawoncomo mmaja. Dhantai aja’ato’de. 17Änwanno mä’quiiñeme’cajaato’de tameedä soto wwäiñe sootoije aweichöcoomo jo’tädööje. 18Yääje yeichaame tooni aju’jädööcomo jadä’jödöödä ännamjö’da na’de. 19Yää shinchädö que aweichöcoomo michaana’caato’de.

20“Yaawä suddau we’jumma’como Jeduusadén ñano awoodhecääcä eneea’jäcäiñe äwwäiñe, chö’tamme’täcä’de yaatameetojo amoinche’da yeichö. 21Yaawä Judheea ñancomo nääneje’ña’to’de jöö de’cäi. Ñanno Jeduusadén ñancomo neja’ca’ña’to’de; audaajä acancomo jataaca mma ennacaicho’de. 22Yää na’de wätä’maminchatoojo anootoi’chädö, tameedä imennaajä nonge yä’dödö wetä. 23Wentumje naato’de yaawä ñanno töwensu’da’como, tänwasa’como mmaja. Jooje yeetunu na’de yaawä edä nono de’wä; wätä’maminchanä na’de canno judhío jäcäiñe 24Dhantai wänä canaadöje nä’ja’aato’de; dhantai tameedä nono weichö wa’cä jedeesoje nataadäjaato’de. Judhíojöncomo Jeduusadén ñano jataawä naademaato’de tucu’nädööcomo wataamedö wa’cä.

Soto nnedö we’tojo

25“Yaawä shii, nuunä, shidiichä mmaja chu’tädööje naato’de. Sotoocomo edä nono de’woncomo natansu’daato’de. Dama wätu’medö weijäcä, madaataca wäätadö weijäcä mmaja, tönwanno nääcatoncaato’de. 26Soto nääcatoncaato’de towaadäädäiñe’da tödööene, nono de’wä yeeja’do’tojo nontädööje. Caju ña naadö jadä’jödöödä nätu’mea’de. 27Yaawä Soto nnedö neneeaato’de ca’dutu de’wä yeejödö, jäduuje, tawaanato töjääcä. 28Mädoocomo weja’dätäädö waajänta’jäcä, adha’cwainchatääcä’de. Yaawä caju ñadäädä ene’matääcä’de, äwääwanaacato’como cu’nädö amoinche’da yeijäcä; quee cönä’döaacä Jesuuquidiito.

29Edääje mmaja töwö cönä’döa’dea chäwwäiñe yö’seeno joi:

—Waju’nä töweiye naadö naane’, tameedä chuuta mmaja; 30yaade’jutaadö eneea’jäcä, odhoowanääcäiñe yaawä wedu amoinche’da yeichö. 31Mädääje mmaja tameedä mädä töweeja’dä’emö eneea’jäcä äwwäiñe chö’tamme’täcä’de yaawä Wanaadi cajiichaanaje yäänejootojo amoinche’da yeichö.

32“Chäänönge yääje wä’döa äwwäiñe, tameedä mädä neja’dä’a’de canno soto eduuwa naatoodö ä’jajo’dadä. 33Caju maja, nono maja nataamea’de, öwö ya’deddu mmaane ataamejai’cha na.

34“Odhoowoinchadäiñe’da eichäcä änwanno, wääwashinchänä jäcä tö’tajä’nä que moowoinchatäi’che, wä’dau’nä que mmaja, edä nono de’wono jäcä tö’tajä’nä que mmaja, äwwäiñe tacaade’da mma yää anootoi’chädö aca ä’dö’no. 35Cadancwani wätämjayuucadö töweiye naichöje yää anooto na’de tameedä edä nono de’woncomo wwäiñe. 36Yaaje yeijäcä äädai’chätääcä yeichöje; Wanaadi wwä adha’deutäcä weiñäje, tameedä mädä töweeja’dä’emö jonno määwanaacatäiye’de, Soto nnedö je’taca mä’dötäiye’de; quee cönä’döaacä Jesuuquidiito chäwwäiñe.

37Ano Jesuuquidiito soto tönoowanoomaiñe töweiye cönä’jaacä Wanaadi weichojo taca. Coijai mmaane Odiiwo ’jödö de’wä tönnö’que cönä’jaacä. 38Tameedä soto tööjanaacadä töötä töweiye cönä’ja’to Wanaadi weichojo taca, ñeecammajäätödö eta.

Currently Selected:

DUUCA 21: MCH

Highlight

Copy