DUUCA 19

Saqueeo wei’jödö

1Jeedicó ña töwä’döa’jäcä Jesuuquidiito cönäämannä’acä jata antai. 2Yäätä cönä’jaacä dhanwa tönsomaacato, acu’shänä jödaatai i’jummannamo edhaajotoncomo, Saqueeoje chäätö. 3Töwö Saqueeo Jesuuquidiito ene’se cönä’jaacä; eneejai’chaane cönä’jaacä, nonoojoiyaasa töweijäcä, jooje soto weichomjäcä mmaja. 4Töwö soto owaajoiñe cöneeca’tömöi, cönäncui yaawä meje joi, Jesuuquidiito weja’do’tojo dö’tä. 5Yää ai töweeja’dätäädawä Jesuuquidiito cacäi cöneeneaacä; cönä’döaacä:

—Ma’da’cä ädhä’täcä, Saqueeo, eduuwa ämmai chaca öötotoojo na; quee cönä’döaacä.

6Yaawä Saqueeo cönä’täi tamjä’ne; ta’cwaiñe Jesuuquidiito cönaamonno’joi tömmai chaca. 7Yää eneedö’jo tameedä soto cönenta’me’ca’to; cönä’döa’to:

—Conemjönö tödöönei mmai chaca Jesuuquidiito nääwa’täi; quee.

8Saqueeo cönammöi yaawä; cönä’döaacä Cädhaajotoncomo wwä:

—Cajiichaana, eduuwa önsomaadö annai wu’jä’a’de wentumja’como wwä. Yää soto encu’täjä’ancädäiñe öncana’ca’jödö wiiñaca’de chäwwäiñe, aacäicheeade; quee cönä’döaacä Saqueeo.

9Yaawä Jesuuquidiito cönä’döaacä chäwwä:

—Eduuwa wääwanaacatoojo nä’döi edä maa taca, Aawadán atöödöje mmaja määdhä yeijäcä. 10Soto nnedö cöneejä yännanö’a’como jäcäinchädäiñe, ewaanacaiñe mmaja; quee cönä’döaacä Jesuuquidiito.

Amoojadä sotooto jödaata dö’seeno

11Soto wwäiñe töneecammajäätödö etaadawä, Jesuuquidiito cöna’deuwöi chäwwäiñe yö’seenoje. Jeduusadén ñano jäcä amoinche’da Jesuuquidiito weijäcä yaawä dea mma Wanaadi cajiichaanaje yeichö yäänejaatäi ñanno soto cöneecanö’a’to. 12Edääje Jesuuquidiito cönä’döaacä:

—Dhanwa täneejucaato cönä’jaacä amoinche töötäämö, anejja jataaca, cajiichaanaje ätä’täjo, yää ’jeje töwennacaadö wetä mmaja. 13Töötääje töwö cöna’dejjaicho amoojadä tanoonö; chääwaadäiñe tooni soto jödaata cuntui. Töwö cönä’döaacä chäwwäiñe: “Ätäätöijatääcä’de mädä jödaata que, iiñano’jödö wennacaadö wa’cä;” quee cönä’döaacä. 14Yaawä ñäädä täneejucaato jataawoncomo cönquiiñemeecöicho; tanoonöcoomo cönaanontäicho inchäcä: “Määdhä töcaajichaanaije ämjumma’da ñaa na;” quee ä’döe. 15Yaawä ñäädä täneejucaato cönennacai cajiichaanaje ätä’täjonei’jödö. Tanoonö cöna’dejjaicho yaawä, ñanno jödaata chäwwäiñe tuntu’jödö, ecamma’jodööcomo wetä chääwaadäiñe yäätätöija’jocoomo jäcä. 16Yaawä awa’deeto cöneejä; cönä’döaacä: “Cajiichaana, ajöödatai che wichaana’cane amoojadä soto jödaata;” quee. 17Ñäädä cajiichaana cönä’döaacä chäwwä: “Chäänönge na, yaanonö aashichaato amäädä. She’coto’cä jäcä chäänönge awei’jödö weijäcä amäädä ma’de amoojadä jata edhaajäje;” quee cönä’döaacä. 18Anejja dhanoonö daja cöneejä yaawä; cönä’döaacä: “Cajiichaana, ajöödatai che wichaana’cane ijaatoodea soto jödaata;” quee. 19Ñäädä wwä mmaja ñäädä Cajiichaana cönä’döa’dea: “Amäädä ma’de ijaatoodea jata edhaajäje;” quee. 20Anejja dhanoonö daja cöneejä dea yaawä; cönä’döaacä: “Cajiichaana, edä yää ajöödatai. Camiisha aca önsomaadö cönä’jaacä. 21Öwö monnontaaquene, tääde’cwade aweijäcä. Ännödööjönö töneiye amäädä, anaatödööjönö tömjä’e mmaja;” quee cönä’döaacä. 22Yaawä chäädhajä cönä’döaacä: “Sootoi conemjönö amäädä. Amäädä awa’deuwö’jödö que dea äwäätä’maminchatoojo wecamma. Odhoowanääcä cönä’jaacä tääde’cwade weichö, önnödööjönö töneiye weichö, naatödööjönö tömjä’e weichö mmaja. 23Yääje yeijäcä ¿ane’que’nei jöödatai äntu’da meiyaqueene tönwacaamaamöje jödaata u’nnamo wwäiñe? Iiñano’jödö wä’döa’jäcä jöödatai eichö weiya yaawä, töwwäiñe jöödatai tödö’jödö eje’jödö jadä;” quee cönä’döaacä ñäädä chäädhajä tanoonö wwä. 24Edääje cönä’döa’dea yäätoncomo wwä: “Määdhä enwajiiñatääcä ijöödatai che. Mä’dä wwä u’täcä, amoojadä soto jödaata chäwwä naadö wwä;” quee cönä’döaacä. 25Ñanno cönä’döa’to chäwwä: “Cajiichaana, amoojadä soto jödaata mmaja chäwwä na deeade’;” quee cönä’döa’to. 26Yaawä ñäädä cajiichaana cönä’döaacä: “Chäänönge yääje wä’döa äwwäiñe: Ñäädä töweiyato wwä jooje’cä nä’tua’de. Ñäädä a’cato mmaane nätänwajiiñaja’de yää she’caasa töwwä naadö que. 27Ñanno tu’de’tännamo’jödö mmaja, tädhaajotoncomooje yöödö’semjöncomo’jödö, ene’täcä sadäädä; neenedööje emaatäcä;” quee cönä’döaacä ñäädä cajiichaana tösootoi wwäiñe; quee cönä’döaacä Jesuuquidiito.

Jeduusadén ña Jesuuquidiito wä’dö’jödö

28Yääje töwä’dö’jeje Jesuuquidiito cönääma’täi chea yaawä Jeduusadén ñadäädä. 29Yaawä Wetaajé ña, Wetaaniya ña mmaja ä’döjai töwä’döa’jäcä, Odiiwo ’jödö je’taca cönä’ja’to. Yaawä Jesuuquidiito cönannontoicho aacä tönoowanoomadö. 30Töwö cönä’döaacä chäwwäiñe:

—Ojoncomo jataaca, mädä cöje’tacaiñe nääneaadö aca. Iiña äwä’döa’comjäcä cawaayu nnedö’cä i’wadö’taajä medantaato’de, ta’cu’täjöönö. I’wadööcatääcä’de, sadäädä mene’täiye. 31Anejja wwä adheecamma’ja’comjäcä: “ ¿Ane’cotoojo mi’wadööcaato?” ca’jäcä, edääje eccujä’täcä’de: “Ñaa edhaajä nijumma;” quee caichäcä’de; quee cönä’döaacä Jesuuquidiito.

32Ñanno enno’ja’como cöntonto yaawä; Jesuuquidiito necamma’jödö nönge cöneedantoicho. 33Chäwwäiñe cawaayu nnedö’ca i’wadööcadaawä chäädhaamo cönä’döa’to:

—¿Ane’cotoojo cawaayu nnedö’cä mi’wadööcaato? quee.

34Tönwanno cönä’döa’to:

—Ñaa edhaajä nijumma; quee cönä’döa’to.

35Cönaadoicho yaawä Jesuuquidiito döiña. Töwoomöcoomo cönnöicho cawaayu nnedö’cä de’wä. Ye’wä Jesuuquidiito cönannucuicho yaawä. 36Ääma tai töwö iichädaawä soto töwoomöcoomo cönaajujiiñäjäätöicho nono de’wä, yäätajaatojooje. 37Odiiwo ’jödö jonanno yä’tädaawäiñe, Jeduusadén ña ä’döjai yä’döa’comjäcä, ñanno jooja’como soto Jesuuquidiito ecaanö’nnamo, ta’cwaiñe cönä’ja’to. Tönwanno cönaajäntoicho yaawä aashicha töwa’deuwödööcomo Wanaadi jäcä, tameedä yää täneemö töwwäiñe ene’jödö weijäcä. Töcä’de cöna’deuwa’to; 38cönä’döa’to:

—Aashichaato määdhä Cajiichaana, Cädhaajotoncomo eetö joiño we’ajä. Caju ñancomo wwäiñe täncanoode’da weichojo na. Aashichaato ñäädä Wanaadi; quee cönä’döa’to.

39Yaawä anejjacoomo jaadiseeo, ñanno soto jadoncomo, cönä’döa’to Jesuuquidiito wwä:

—Owaanomaanei, onoowanoomadö eta’jöichajoocoto; quee.

40Jesuuquidiito cöneccujä’a’to:

—Chäänönge yääje wä’döa äwwäiñe, canno weta’jöa’comjäcä, mädä täju mmädä töwa’deuwödö aajäntäjai ña yaawä; quee cönä’döaacä.

41Jataaca ä’döjai töwä’döa’jäcä, töwwä eneea’jäcä Jesuuquidiito cönaamoi yaawä Jeduusadén ñancomo junnei. 42Töwö cönä’döaacä:

—Odhoowanääcäiñe yei’she waadö’je täncanoode’da aweicho’como; töwäädä äwwäiñe totoone’tä naane’, aneene’da aweichöcoomo wetä. 43Yeetunu cu’nädö ne’a’de, yää ätu’de’tännamo wwäiñe äwä’cudaadai’chäjooto’como. Ajaadäiñe newäänä’taato’de; ajaatawonnoiñe aja’canö’jotäiñe’da naato’de. 44Tönwanno aja’ato’de tameedäädä. Tameedä ämmaichomo nemajjato’de, tooni täju töweichacoono de’wä ännämä’da tödööene, adöiñaiñe Wanaadi weejö’jödö aneene’jutu’da awei’jocoomo weijäcä; quee cönä’döaacä Jesuuquidiito.

Wanaadi weichojo tacanno töwäätätöijaamo ija’canö’jo’jödö

45Yaawä Jesuuquidiito cönoomomöi Wanaadi weichojo taca. Cönaajäntäi yaawä töwäätätöijaamo ija’canö’jodööcomo. 46Töwö cönä’döaacä chäwwäiñe:

—Wanaadi a’deddu imennaajä jäcä yääje nä’döa: “Ömmai ña Wanaadi wwä wa’deutojooje;” quee nä’döa imennaajä. Änwanno ’quene mödööato tämeena’como weicho’comooje; quee cönä’döaacä Jesuuquidiito.

47Töwö anooto waadäi Wanaadi weichojo taca tönoowanooma töweiye cönä’jaacä. Wanaadi wwä töwa’deuwaamo edhaajotoncomo, judhío owaanomannamo mmaja, acu’shänääja’como mmaja, ema’se töweiye cönä’ja’to. 48Yaawääne’ tödöötojo ’je’daane’ cönä’jaacä chäwwäiñe, tameedä soto jooje eta’se yeichomjäcä.

Currently Selected:

DUUCA 19: MCH

Highlight

Copy