DUUCA 16

Jödaata edhaajä chäänöngemjönö’jödö

1Edääje mmaja Jesuuquidiito cönä’döa’dea tönoowanoomadö wwäiñe:

—Dhanwa cönä’jaacä töjöödataichato. Töwö shootoi töweiye cönä’jaacä, iiñödö edhaajä. Anejjacoomo cöneecammaicho yaawä ñäädä töjöödataichato wwä dhanoonö chäänönge’da ijöödatai acoichadööje yeichö. 2Yääje mma yaawä ñäädä dhanwa tanoonö cönä’dejjai; cönä’döaacä: “ ¿Aaqueneeto mädä äjääcä näätaadö? Sa’donna ecammacä tameedä ataadawaajui’jödö. Önnödö edhaajäje eijai’cha ma eduuwa;” quee cönä’döaacä. 3Yaawä ñäädä iiñöjäätödö edhaajä töwwäädä cöntö’tajä’acä: “Ane’cäämö wödööanä eduuwä? Yeedhajä yu’ca’se na mädä taadawaajuije yeichö jonno. Jäduuje’da tö’ta, nono töcaaneije etaadawa’cajoojai’cha. Aateme’jai’cha wa dea, töjöiye. 4Yoowanääcä na öwwä tödöötojo, tötaadawaajuiche’da wä’döa’jäcä tömmai chacaiñe soto yöödöiyeto’de yaawä;” quee cöntö’tajä’acä. 5Yaawä tooni nshai töwö cöna’dejjaicho tameedä tädhaajä ejeeque’nä’nnamo. Töwö cönä’döaacä awa’deenato weejödö wwä: “Ä’waasa’cä yeedhajä mejeeque’nä’anä?” quee cönä’döaacä. 6Ñäädä cönä’döaacä yaawä: “Ijaatoodea soto daata chaatö wejeeque’nä’a;” quee cönä’döaacä. Yaawä ñäädä jödaata edhaajä jajeeda cuntui chäwwä, ñejeque näjöödö imennaajä a’täi; cönä’döaacä chäwwä: “Ma’da’cä ataajimaacä. Anejjeque’näjöödö imennaajä chamjiyaacacä; aacä sotooto de’wä amoojadä mma aneejeque’näjöödö imennäcä;” quee cönä’döaacä ñäädä jödaata edhaajä. 7Anejja daja töwö cöneecamma’joi chea: “ ¿Amäädä ’na, ä’waasa’cä mejeeque’nä’anä amäädä?” quee. Ñäädä cönä’döaacä: “Ijaatoodea soto saacu äiña wejeeque’nä’a;” quee cönä’döaacä. Ñäädä jödaata edhaajä jajeeda cuntui chäwwä, ñeejeque’näjöödö imennaajä a’täi. “Edä ajaajedai”; quee cönä’döaacä, “aneejeque’näjöödö imennaajä chamjiyaacacä; aacäichea soto mma aneejeque’näjöödö imennäcä;” quee cönä’döaacä. 8Yaawä chäädhajä aashicha cöna’deuwöi ñäädä tanoonö chäänöngemjönö jäcä, tösejjeque tödööjätö’jödö weijäcä chäwwä. Edä nono de’woncomo tösejjeque jeene naato töjimmotoncomo tödöödö jäcä, tawaanato awoncomo e’jodheiñe’cä.

9“Yääje wä’döa äwwäiñe, edä nono conemjönö de’wono mösooma que aashichaato tödöötäcä’de ajimmotoncomo jäcä; yää mösooma wataamea’jäcä adha’dejjannamo töweiye yeichö wetä, weichojo töwaatamemjönö ña äwä’döa’comjäcä.

10“Ñäädä mänö’cä mmädä chäänönge tödöönei, joojato mmaja chäänönge tödööjai ña dea. Ñäädä ’quene mänö’cä mmädä chäänönge ännöjöönö, joojato mmaja chäänönge ännö’da eijai ña. 11Edä nono de’wono mösooma chäänönge ännö’da aweiya’comjäcä, ¿aaquene mmaja aashichaato jaiñoone äwwäiñe ä’tuduude’ ? 12Ännödööcomoojönö chäänönge ännö’da aweiya’comjäcä, ¿aaquene mmaja ännödööcomo neene äwwäiñe ä’tuduude’ ?

13“Aacä tädhaajä tödööjai’che weiñä nai. Yääje tödööa’jäcä tooni mma ijummajai ña ñäädä yaawä, yeichacoono ämjumma’da mma. Yeichacoono jadä aashicha etaadawa’cajoojai ña, yeichacoono ’quene chiiñeme’jai. Mädääje mmaja änwanno, a’nädäncädä ijummajai’cha maato, Wanaadi mmaja, mösooma mmaja; que cönä’döaacä Jesuuquidiito soto wwäiñe.

14Ñanno jaadiseeo, jödaata jummannamo, yääje yä’dödö cöneetajä’a’to; Jesuuquidiito cönenno’jä’a’to yaawä. 15Yaawä Jesuuquidiito cönä’döaacä chäwwäiñe:

—Änwanno soto neneedöcoomoje mmädä aashicha äwäänejo’seiñe määnetääne. Wanaadi mmaane ätö’tajäätödööcomo jaiñoone dhowaanäcä na. Yaa aashichaato wa’cä soto wwäiñe yäänedö naadö, Wanaadi wwä mmaane cone’da na.

Waanontänä jäcä, Wanaadi töcaajichaanaije weiñä jäcä mmaja, Jesuuquidiito wa’deuwö’jödö

16“Juan Wautiita jona tödööene waanontänä Moisé nimennä’jödö cönä’jaacä, Wanaadi wa’deuwödö ecammannamo nimenno’jocoomo mmaja. Juan jonno mmaane Wanaadi töcaajichaanaije tödöödö jäcä aashichaato wätunnä nätääcammajä’a. Tameedä soto Wanaadi sotoije nä’döaato töjääduduucomo que.

17“Caju, nono wataametaame, tooni waanontä’jä imennä’jödö’cä täma’da dea eijai ña.

Töjiiñamo e’nomjadö jäcä Jesuuquidiito nowaanoma’jödö

18“Ñäädä töjiiñamo e’nomjanei, anejja wodi yö’tä yä’döa’jäcä yaawä, conemjönö nödööa. Ñäädä e’nomjaajä dö’tono wä’dödö mmaja conemjönö nödööa dea.

Tönsomaacato wei’jödö, Dáasado wei’jödö mmaja

19“Dhanwa töweiye cönä’jaacä, tönsomaacato. Töwö töweewontä cönä’jaacä aashichaato que, camiisha täjeeto awä mmaja. Anooto waadäi jooje töwääwashinchä cönä’jaacä töjimmä jadäiñe. 20Yäätä cönä’ja’dea töwaateme’cato wentumjato, Dáasadooje chäätö. Ñäädä tönsomaacato nata’tajo töwaatajiimä töwö cönä’jaacä, tucuunujä’e jooje. 21Tönsomaacato meesai ye’wono wä’medö täcu’se töweiye cönä’jaacä. Sö’na töwe’e cönä’ja’to chuunujäätö’jödö ame. 22Yääje mma yaawä ñäädä wentumjato cönäämai. Amoode caju ñancomo cönaadoicho yaawä Awadán döiña, Aashichaato ña. Yaawä ñäädä tönsomaacato cönäämai chea. Cöneewaacaicho yaawä. 23Yä’ja’a’como weicho’como ña ñäädä tönsomaacato’jödö cönäädantäi yaawä, wäntunaanö’näje. Amoinche Aawadán cöneeneaacä, Dáasado chääjadä. 24Yaawä töwö cöncä’tömöi: “Jaaja Aawadán, wentumje cäneecä. Dáasado anontäcä tamäädö dhadaadö eccudäiye tuna que, nuudu eccudä eejöiye. Jooje wäntunaanö’a sadä wa’to nwaca;” quee cönä’döaacä. 25Aawadán cönä’döaacä chäwwä: “Ätö’tacä önnedö, nudä aweichö aashicha awei’jödö jäcä, Dáasado wäntunaanö’taame. Eduuwa töwö täncanoode’da na, amäädä äwäntunaanö’taame. 26Dhanwadö mmaja cantawäiñe na dea. Eetonno adöiña töötä’sato täjai’cha na; chäänönge mmaja mänsenno ñaa döiña töweejö’sato e’jai’cha;” quee cönä’döaacä Aawadán. 27Yaawä ñäädä tönsomaacato’jödö cönä’döaacä: “Jaaje Aawadán, yääje yeiya’jäcä jaaja döiña Dáasado anontäcä’de, 28ijaatoodea’como yaacontomo döiñaiñe mmaja, chäwwäiñe ecammaiye, sadä mma eejö’notoode, wäntunaanö’tojo aca mmaja;” quee cönä’döaacä. 29Aawadán cönä’döaacä chäwwä: “Moisé nimennä’jödö töweiye na chäwwäiñe, Wanaadi wa’deuwödö ecammannamo nimenno’jocoomo mmaja. Yääne neta’ña’to;” quee Aawádan cönä’döaacä chäwwä. 30Yaawä ñäädä tönsomaacato’jödö cönä’döaacä: “Ng’jn, Jaaja Aawadán, yäämaajä’jödö yöiñaiñe iicha’jäcääne, yaawääne tötö’tajäätödööcomo sha’duminchajai ñaato;” quee cönä’döaacä. 31Yaawä Aawadán cönä’döaaca chäwwä: “Moisé nimennä’jödö aneeta’da yeiya’comjäcä, Wanaadi wa’deuwödö ecammannamo nimenno’jocoomo mmaja, töwäämaajo jonnoto yaadoncaajä eneetaame töwwäiñe tötö’tajäätödööcomo änsa’dumincha’da dea eijai ñaato;” quee cönä’döaacä Aawadán ñäädä tönsomaacato’jödö wwä; quee cönä’döaacä Jesuuquidiito.

Currently Selected:

DUUCA 16: MCH

Highlight

Copy