Marcos 16

Jesús a demi jocädou

lä co̦layono wei tä a̦

1Täbä lä yanöcöo wei tä mö jalu jayublou waiquilayono wei ja, suwä bänö täbä nö lä cle̦deli wei täbä lulualalemaje, a nomawä lä maqueono wei jamö täbä ca̦i jubeje. Nomawä täbä showadi jölöcaö lä cuaaö wejeinaja, Jesús a nia taamamaje. Madalateliyoma María a cuoma, Santiago bä nöö María e ca̦i, Salomei a ca̦i.

2Bei. Ö̦jö tä fena ja, domingo tä mö jalu lä cublole däjä, suwä bä jocäblou fa fenablalonö, maa maca jamö bä aa fenalayoma, motoca a jaba juimaö däjä. 3Bä lä juimadi jamö, abinaja bä nowa tayofälöma.

—Ö̦jö ma cui, maa maca jamö bämacö lucäbä, maa manö yoca lä lale, ¿wedinö ma li jilulublabä? —bä nowa tayofälöma.

4Ö̦jö däjä, maa maca jamö bä ajedou däjä, tä fa mödalöjenö ma bada jilulano dalalemaje. Bada ma bada cuoma. 5Maa maca jamö bä lucäa fa showadaalunö, jayu boco mashi jamö fiya tä döcöa dalaledayomaje. Camishi aulimi labe cäcö ja a didioma. Ö̦jö a fa dalalöjenö bä bufi shädayaimou dodijioma. 6Abinaja tä cuma.

—Bä bufi shädayaimo dijä. Nasaleteli Jesús wama a lä dayäboyoi, fii balitama defi jamö a lä basuqueno wejei a lä cui, fei däjä äyämö a cuami. A demi jocädou waiquilayoma. A nomawä lä maquequeno wejei wama tä möblaaö balöobä, ö̦jö lä. 7Wama tä möblaaö fa balöonö, cama ebä lä nocamabono wei bä lä cui, wama bä yömölajalayobä, Pedro a ca̦i showawä. Calilea jamö a dablaö co̦obeje a nia balöfälöö. A nia dablaö co̦oje, bä nowa lä tano weinaja showawä —e cuma.

8Maa maca jamö bä faa fa co̦bofälönö, bä quilili docua showalayofälöma. Bä nö quilili bleaama cudeenö bä blösö blösömoma. Bä quilii fe balojooma yalo, moli a ma cui nija tä a̦ wäyäö bädaonomije.

María nija Jesús a

lä damolaliyono wei tä a̦

9¿Ö̦jö tawä? Domingo tä mö jalu cublou däjä, Jesús a demi jocäblou co̦o fenalayoma. Madalateliyoma a María lä cui nija a damoa balölaliyoma, ebä fecula 7 lä yashublaleno wei a suwä lä cui nija. 10Ö̦jö däjä, Jesúsnö bä lä nocamabono wei bä lä cui bä bluca ö̦cöö däjä, María a waloa co̦beyoluma. A waloa fa co̦boyonö tä a̦ wäyäö showadaojoloma. 11Ö̦jö ma cui, a wa̦fa demi tama ma cui, a lä dalaleno wei a wa̦fa ca̦i wäyäma ma cui, a wa̦ bejedi bufinomije.

Cama ai ecöbö nija

a lä damolaliyono wei tä a̦

12Inaja a cublou waiquilayono wei ja, shomi jamö cama ai ecöbö jufälöbä jamö, jai shomi a damoa cua majölaliyoma. 13Ö̦jö cäcöbö mö yabadou co̦a fa showadalofälönö, cama ebä yömölaböö ma co̦oyoluno wei ma cui, “Ei bejedi lä cäcöbö a̦”, bä bufi ca̦i cunomi co̦wä.

Cama ebä shömaö lä

cadidiono wei tä a̦

14Ö̦jö tä cublou fa balölonö, bä iyabä jamö, cama 11 ebä nija a damoa co̦a majölaleyoluma. A demi jocädou lä möno wejei, bä a̦ bejedi bufinomije yalo, bä a̦fa dobloimi tayoluma. Bä bufi a̦fa ca̦i jifuwä tama. 15Abinaja bä nowa tama.

—Bä bälöblawä lä jödödöblai bä nijamö wamacö juu fa cuaafälönö, jödödöwä bä lä cublai bä nija iba dodijidawä tä a̦ wäyäö da cuaaje. 16Wale a̦ bejedi lä bufii wejei bä lä cui, bä fe fa ojoblamolunö, bä jucäamou wä. Ö̦jö ma cui, wale a̦ bejedi bufii lä mlajei bä waimamobä cäbä. 17Wale a̦ bejedi lä bufii wejei bä lä cuinö, tä nö lä quilijii tä nia wawämaö cuaaöje, Yai Bada a mayo lojode dablabeje. Fecula bä nia ca̦i yashuuje. Shomi bä caficö a̦ ma cui ja, bä a̦ ca̦i nia faö. 18Olu bä ma däablaö wejei ma cui, toubä lä wayu wei toubä ca̦i ma coaö wejei ma cui, bä nia shominajabloimi. Täbä lä jaliliaö wei bä nija bä imicö fa maqueonö, bä nia jalomaö cuaaöje —bä nowa tama.

Fedu jamö Jesús a lä ösölayofälöno wei tä a̦

19Ö̦jö däjä, Bada tä Jesúsnö bä yömölaa jödödöa fa balölönö, fedu jamö a co̦molayoma. Yai Bada boco jayu mashi jamö, a döcäaledayoma. 20Ö̦jö däjä, cama ebä fa alufälönö, jödödöwä täbä lä bälöblai bä nijamö bä yömölaö blaucou cuaamaje. Bä yömölaöje däjä bä a̦ nö bejedi ö̦jöböamobä, Bada tänö bä ca̦i bayeliblaö cuaama, tä nö lä quilijii tä wawämaö cuaabeje. Inaja lä tä yai cuoma.

Currently Selected:

Marcos 16: GUU

Highlight

Copy