Jonás 1
1
Jeobaa a wa̦ ji̦liaö fa mojionö
Jonasi a lä doculayono wei tä a̦
1Amidai bä ijilubö Jonasi lija Jeobaa a wa̦ wawälayoma. Abenaja e cuma.
2—Bei. Ninibeteli bä lijamö a da alufälö, “Ei bä yai lofote”, bä nofi lä tabolajei bä lijamö. Camiyä lija bä a̦no ji̦limou wa̦lioblou waiquiwä yalo, cafä lija ya bä nabä shimaö lä cule, wale a̦no wäyäbä —e cuma.
3Ö̦jö ma cui, Jeobaa lija Jobe jamö Jonasi a docua yaclälayoma. Ö̦jamö, Dasi jamö bä lä bälamamou wei a bada canawä ca̦a fa dalalönö, a bälabeje etä nowa fa co̦macönö, a dicäquema. Jeobaa lija a nia fa docufälönö, Dasi jamö a nia fuma.
4Ö̦jö ma cui, modu u jamö, Jeobaanö wadoli a bada shimaö ja, i̦cali a bada wadoli yacolemoimama. U bada lou loumou ja, bä befi ca̦i mili shäblou showadalayoma.
5Canawä a lä fuwäbono wejei bä fa quililalunö, täbä bluca bufibou lä cublamono wejei täbä lija bä nofi ojode tablamobä, bä i̦cali comöma. Ö̦jö däjä, bä madofi lä didibono wejei bä queamabalemaje, jelejewä bä befi ca̦i caläö fe yadiobä.
Inaja bä ma cuaano wei ma cui, canawä a u̦eshi lä cubodi jamö, Jonasi a fa dimöbalufälönö, ö̦jamö a fa blabaludunö a mia sublaodayoma.
6Ö̦jö däjä, canawä a lä cadidamano wei a lä cuinö, Jonasi lija a fa icuicunö a jushulema.
—¿Wedi tabä eja wa li midia cule? Wa fa jocäblalunö, wa lä bufiblaö wei a lija, a i̦cali da co̦mö. Bämacö befi ca̦i shäblou mlaobä, bämalecö nofi ojode tablalei fa cui —a cuma.
7Ö̦jö däjä, abenaja bä nowa tayoma.
—Bei. ¿Wedi a li doblou fa mlacunö tä li wa̦lidiblou da culanö? ¿Wedi mayo li? Ja̦o. Jimamodima bäma bä wai da shäyäja, ö̦jö lä, a nö ö̦jöböamobä —bä nowa tayoma.
Ö̦jö cudeenö, jimamodima bä wai fa shäyäjajenö, Jonasi a cadidiblalemaje. 8A wa̦lii showadaomaje.
—Bei —bä cuma—. A wa̦ nö da wäbo. Ei bämacö lä wa̦lidiblole, ¿cafä bei wa mayo daanö? ¿Wedi wa tä tabä cafä bei wa? ¿Wediteli bei wa? ¿Wedi tä ulufi jamö wa lä bälöle wa? ¿Wediteli bei wa nodiwä? —bä cuma.
9Abenaja Jonasi a cuma.
—Camiyä ebleo cä ya. Jeobaa ya tä nö quili tabä ya, fedu jamö tä lä culadi tä lä bufiblamou wei. Modu u ma cui, ulufi wejediwä ma cui tä ulufi bluca lä tablaleno wei a showawä lä cui —a cuma.
10A wa̦ fa ji̦liläjenö bä bluca quililaliyoma. Jeobaa lija a lä doculayono wei tä nö fa ö̦jöbölöjenö, abenaja ebä cuma.
—¿Wedi wa tä li taö dicoa cule?—ebä cuma.
11Modu u bada lä lou loumono wei u balaö nö quiliaö showaoma yalo, abenaja bä ca̦i cuma.
—¿Wedinaja yamacö cuaabä? ¿Wedinaja bä li fa taamanö, modu u nia li yanöcöblou co̦o? —ebä cuma.
12Abenaja Jonasinö bä nowa tama.
—Wamale fa fuwälönö, modu u jamö wamale quea fa showadamacönö, wama u nia yanöcödamaö. Ei wadoli a nö lä quiliale, camiyä mayo jamö tä malä wawäblalufe. ¿Ö̦jö tawä? Ya tä daö waiquiwä —bä nowa tama.
13Ö̦jö ma cui, a queamaö bufio fa mlacujenö, i̦cali u ya̦camaje, modu u casö jamö bä befi ca̦i nia waloo fe fa yadionö. Ö̦jö ma cui, bä doblonomi. Modu u shäyä shäyämou nö quiliaö ja, bä caläö doblonomi. 14Bä doblou fa mlacunö, Jeobaa lija bä a̦ i̦cali fama.
—¡Shädayai! ¡Jeobaa wa tä! Ei a nowa ja yamalecö shä dijä, ¿ö̦jö tawä? Ei yama a quemabalei ja, camiyä yamacö lija tä nowa tabo dijä. Inaja cafä Jeobaa wa cuaaö bufi fa doblaonö, yamalecö taamaö malä waiquile —bä cuma.
15Ö̦jö däjä, Jonasi a fa fuwälöjenö, modu u jamö a fa shäyäblabalöjenö, u yanöcödaliyoma. 16U yanöcöblou fa co̦lonö, Jeobaa a nö quili taö dodijiomaje. Jeobaa lija yalo a dodoblaquemaje. A wa̦ nia lä fuano wejei, ebä a̦ nö ca̦i wäo showadaoma.
17Bei. Yuli a bada lija, Jeobaanö Jonasi a nabä fa shimöcönö, comi a sufalema. Ö̦jö yuli busi jamö a didio däjä, 3 a fe didi cublaliyoma.
Currently Selected:
Jonás 1: GUU
Highlight
Share
Copy
Want to have your highlights saved across all your devices? Sign up or sign in
©2012, All Rights Reserved
