Juan 6
6
Nii bolacami bä wai ja
5.000 bä lä iyamaleno wei tä a̦
1Ö̦jö tä cublou waiquilayono wei ja, modu Calilea ai u mashi jamö Jesús a bucadubaliyoma, Dibelia u a̦fa ca̦i lä cule jamö. 2Ö̦jamö lä, Jesús nijamö bluca dodijiwä bä nocalayoma. Yai Bada e nö ö̦jöböamobä, jalili bä jalomaö nö lä quiliano wei tä fa dalalöjenö, bä bluca nocalayoma.
3¿Ö̦jö tawä? Jefu a balöcö jamö, Jesúsnö bä lä nocamabono wei bä ca̦i fa dolequebofälönö, bä ca̦i lobejelayoma. 4¿Ö̦jö tawä? Judio bä nia iyaö lä co̦ono wei tä ajedoma. Yai Bada a waiteli lä jayuano wei a nofi nia co̦camoaö co̦maje. 5Jesúsnö tä fa mödalönö, cama nija täbä comi juu lä ajedofälöno wei täbä bluca fa dalalönö, Felipe nija a wa̦ fama.
—¿Wedinaja bämacö li fa cuaanö, nii bäma bä li luluabä, ei bä lä juimi bä iyabä? —a cuma.
6Felipe a nia fa wabanö, a wa̦ li cuoma. Camanö tä nia lä taö wei tä daö malä waiquiono wei. 7Abinaja Felipe a cuma.
—Cuwi. Blada 200 bä ma cui ja, bäma bä nii ma dälei wei ma cui, bä nö obimi. Nii wajaquemi bä wai jöbädamou ma cuaaö wei ma cui, ai bä nö damolayobö —a cuma.
8Cama ebä lä nocamabono wei ai a lä cui, Simón Pedro bä fääshä Andrés e lä cui, abinaja e cuma.
9—Nii bä nowa bluca lä mlai, eja ijilu a lä cuinö 5 bä wai nii tabou, yuli bolacabö cäcö ca̦i. Ö̦jö ma cui, bä nia oimi. Ei bä lä yododole bä bluca fe balojowä —e cuma.
10Abinaja Jesúsnö bä nowa tama.
—Bä da loamaboduje —bä nowa tama.
Bä yododoobä jamö, moimoima a blaucuoma yalo bä loomobodayoma. Wa̦lo jai 5.000 bä cuoma.
11Ö̦jö däjä, nii 5 bä lä cuono wei, Jesúsnö bä dälema, yuli bolacabö cäcö ca̦i. Ö̦jö bä fa dälönö, fedu jamö a mö fa nonoicunö, bä nia lä iyano wei tä ja Yai Bada nija a bufi a̦fa doblalou wäyämoma. Ö̦jö däjä, bä bluca lä loono wei bä nijamö, bä jöböamaö cuaaö bufima. Yuli cäcöbö ma cui, inaja showawä, bä bufi läablalou mlai ja, bä jöbäaö cuaabeje. 12¿Ö̦jö tawä? Täbä bluca fa iyaolalunö, bä bädöolaliyoma. Ö̦jö däjä, cama ebä lä nocamabono wei bä lä cui, abinaja Jesúsnö bä nowa taö nomöjöoma.
—Bei. Nii bä sheje lä damalajei bä da co̦ablaje, bä wa̦lio bädao mlaobä —bä nowa tama.
13Inaja bä nowa tama yalo, ö̦jö nii 5 bä nowa bluca lä mlai, bä sheje co̦a showaabodayomaje. Bä lä iyano wei bä lä cuinö, nii bä sheje lä damano wejei bä fa co̦läjenö, wöö 12 bä ja bä nii sheje fe lajoblamalemaje.
14Nii bä wai bolacami ma cui ja, Jesúsnö täbä bluca lä iyamaleno wei tä fa dalalöjenö, ö̦jö däjä Yai Bada e nö ö̦jöbölemaje. Abinaja bä cuma.
—Yai Bada a wa̦no wäyälewä a nia jo̦wa lä juno wei, ¡fei ö̦jö lä a waiquiwä! —bä cuma.
15¿Ö̦jö tawä? Bada a yai tablamaö fe yadiobeje, a nabä juu lä bufiono wejei tä dama cudeenö, jefu a jamö a fe yami doleblaliyofälöma.
Modu u feyaca jamö Jesús
a jelejewä lä juno wei tä a̦
16Tä mö weyaö däjä, modu u jamö cama ebä lä nocamabono wei bä dömöbaliyoma. Bä fa dömöbalunö, 17canawä a ja bä fa döcäcälonö, Cabenao jamö bä bucaduobä bä befi ca̦i calälayoma. Tä mö didi ji̦cocoo ma waiquiono wei ma cui, cama bä nija Jesús a waloonomi showawä.
18Ö̦jö däjä, wadoli a bada fa yacolemonö, modu u bada shäyäjama. 19Ö̦jamö lä, modu u möamo ja bä yacolemou showao däjä, modu u feyaca jamö Jesús a jelejewä juu ajedoimama. Bä quilia fe balojolaliyoma. 20Ö̦jö ma cui, Jesúsinö lobe bä quilii wasöblalema.
—Ei camiyä cä ya. Bä quili dijä —bä nowa tama.
21A döcäamaö bufi doblaomaje. Canawä a ja a fa döcäicunö, yedu bä nia juu bucaduo lä cuono wei jamö, bä befi ca̦i waloa showadaquema.
Jesús a lä dayäblaleno wejei tä a̦
22Ö̦jö tä fena ja, ai u mashi jamö bä bluca cuo lä juono wei bä nö dadio juoma. ¿Ö̦jö tawä? Jesús ebä lä nocamabono wei bä lä cui, canawä a jamö bä lä döcäcäbaliyono wei däjä, bä nö daamaje. Ö̦jö bä nijamö Jesús a coyocoonomi. Bä befi ca̦i yamili lä calälayono wei tä nö ca̦i daamaje. Ai a canawä ca̦i ca̦onomi.
23Ö̦jö däjä, Dibelia jamö culanö bä befi ca̦i lä caläno wei, ai bä ca̦i canawä washölöblaliyomaje. ¿Ö̦jö tawä? Bada a lä cui, Yai Bada nija a bufi a̦fa doblalou wäyämou fa balöonö, bä nii lä wano wejei tä ajede jamö bä washölöquema. 24Ö̦jö cudeenö, ö̦jamö Jesús a dablaö fa mlacujenö, cama ebä lä nocamabono wei bä ca̦i dablaö fa mlacujenö, ö̦jö bä canawä jamö bä döcäcäobaliyoma. Bä fa döcäcäobalunö, Cabenao jamö bä befi ca̦i caläa showalayofälöma, bucadu jamö Jesús a dayäbeje.
Ba̦limiblamamodima cäcö
a̦fa nii lä wäyämono wei tä a̦
25Ai modu u mashi jamö a dablaöje däjä, abinaja bä cuma.
—Tä a̦ wäyäle. ¿Fei däjä wa co̦bei cufe? —bä cuma.
26Jesúsnö abinaja bä nowa tama.
—Cafä wamacö nija ei ya wa̦ lä cui, bejedi lä ya wa̦. Yai Bada ya e nö ö̦jöböamobä, tä nö lä quilijii ya tä ma wawämano wei ma cui, ö̦jö tänö wamacö bufi fa jaducublalunö wamale dayäimi. Ma, nii bänö wamacö bädölayoma yalo wamale li dayäaö. ¿Ö̦jö tawä?
27’Nii bä mladou si lä ijejei bä ja, bä cuaablalou fe balojoo dijä. Täbä ba̦limi cuobä cäcö nii ja, wamacö shino yai ojodamobä. Ö̦jö cäcö nii ja wamacö dobämobä, ei lä ya waiquiwä, camiyä ya lä yanowamöblaleyoluno wei ya lä cui. Fayä Yai Bada tänö wale nö malä ö̦jöböamale —bä nowa tama.
28Ö̦jö däjä, Jesús nija abinaja bä cuma.
—¿Wedinaja yamacö yai cuaabä, ö̦jö lä, Yai Bada nija yamacö ojodamobä? —bä cuma.
29Abinaja Jesús e cuma.
—Yai Bada tänö wale lä shömöleno wei wamale a̦ bejedi da bufi, ö̦jö lä. Ö̦jö lä tä nabä shino shömaö —e cuma.
30Ö̦jö cudeenö, abinaja bä cuu nomöjöoma.
—Yai Bada wa e nö ö̦jöböamobä, tä nö lä quilijii tä da wawämalö, ö̦jö lä. Ö̦jö yama tä fa dalalönö, bäfä a̦ bejedi bufibä. ¿Wedi wa tä yai tabä, cafä bei wa? 31Camiyä bämacö bada bä lä cuono wei bä lä cui, ulifi bloque jamö Moisesinö bä ca̦i juu ja, manaa bä ja bä iyama, tä a̦ oni lä cuu weinaja showawä. Abinaja tä a̦ cuu.
Fedu jamö bä nii lä bläläno wei bä ja, bä iyamama.
’Einaja tä a̦ cuu —bä cuma.
32Ö̦jö däjä, abinaja Jesús e cuma.
—Cafä wamacö nija ei ya wa̦ lä cui, bejedi lä ya wa̦. Fedu jamö bä nii lä bläläno wei bä ja bä lä iyamano wei a lä cui, Moisesi a cuonomi. Ö̦jö lä Fayä a yai li cuoma, fedu jamö culanö, nii cäcö yai ja wamacö dobäö lä showale a lä cui. 33Yai Bada tänö cäcö nii lä jöböaö wei cäcö lä cui, fedu jamö cäcö cuoma cäcö itolayoma. Yanowamö täbä ba̦limi cuobä, ö̦jö cäcö nii yai —Jesús e cuma.
34Abinaja bä cuma.
—Tä a̦ wäyäle. Showadi ö̦jö cäcö ja yamalecö da dobäblaayo —bä cuma.
35Abinaja Jesúsnö bä nowa taö ja a cuma.
—Bä ba̦limi cuobä cäcö nii lä cui, ö̦jö bei ya. Camiyä nija bä lä juu wei bä nia ofäimi. Camiyä wale a̦ bejedi lä bufii wejei bä nia amishaö co̦daaimi. 36Ö̦jö ma cui, cafä wamacö nija ya mada cublei. Wamale ma dablaö wei ma cui, wamale a̦ bejedi bufiimi waiquiwä.
37’Camiyä nija Fayänö bä yanowamö lä jöböaö wei bä bluca lä cui, camiyä nija ö̦jö bä nia juu. ¿Ö̦jö tawä? Camiyä nija bä lä juu wei bä lä cui, ya bä waii mlaicätä. 38Fedu jamö culanö ya lä itolayono wei ya lä cuinö, camiyänö ya tä taö lä bufii wei ya tä tabä, ya itono malä mlai. Wale lä shömöleno wei a lä cuinö, ö̦jönö tä tamaö lä bufii wei ya tä yai tabä, ya malä itolayono wei.
39’¿Ö̦jö tawä? —a cuma—. Wale lä shömöleno wei a lä cuinö, abinaja wale taamaö bufi doblao. Tä lä jödödöblole däjä, moli ya feimabou mlai ja, iba bä lä jöböbeno wei ya bä demi bluca jocädamaö co̦obä, wale tamabou bufi doblao. 40Abinaja Fayänö täbä taamaö bufi doblao malä cui. Bä Ijilubö wale nö yai lä ö̦jöböaö wejei bä lä cui, wale a̦ bejedi bufiije ja, bä ba̦limi tamabou bufi doblao. Tä lä jödödöblole däjä, ö̦jö ya bä nia demi jocädamaö co̦o —a cuma.
41Ö̦jö däjä, Jesús a wa̦ ja judio bä bufi jushujuablaloma. “Fedu jamö ya cö nii lä cuono wei ya cö itolayoma”, a cuma yalo, bä a̦ lämoma. 42Abinaja bä cuma.
—José bä ijilubö Jesús a wa̦fa lä cui, ¿fei ö̦jö a mlai daanö? Bä fö̦ö e ma cui, bä nöö e ma cui, bäma cäcöbö malä dale. ¿Wedi tabä “Fedu jamö culanö ya itolayoma”, bei a li cuu dicoo? —bä cuma.
43Abinaja Jesúsnö bä nowa tama.
—Bä bufi jushujuwä ca̦i fa dijä. 44Wale lä shömöleno wei, Fayä a lä cuinö bä blacämaimi ja, camiyä nija cama bä nia juu bädaomi. Bä lä blacämaö wei bä lä cui, tä lä jödödöblole däjä, ö̦jö ya bä nia jocädamaö co̦o. 45Yai Bada a wa̦no wäyälewä ai a wa̦ oni jamö, abinaja tä a̦ cuu.
Yai Bada nija täbä nia bluca damamou.
’¿Ö̦jö tawä? —a cuma—. Einaja tä a̦ cuu. Fayä a wa̦no fa ji̦liläjenö, bä yai lä damamou wei bä lä cui, camiyä nija bä juu. 46Ö̦jö ma cui, Fayä nija bä bufi ma damamou wei ma cui, yanowamö täbä lä cui nija Fayä a dablamoimi. Yai Bada tänö wale lä shömöleno wei ya lä cuinö, Fayä ya shino dablaö ayao.
47’Cafä wamacö nija ei ya wa̦ lä cui, bejedi lä ya wa̦ —a cuma—. Wale a̦ bejedi lä bufii wejei bä lä cui, ba̦limi bä cuobä bä li waiquiwä. 48Ba̦limiblamamodima cäcö nii lä cui, ö̦jö lä ya.
49’Afä bada bä jaba lä cuono wei bä lä cuinö, manaa bä ma wano wejei ma cui, bä nomalaliyoma. 50¿Ö̦jö tawä? Ya cö a̦fa nii lä wäyäle, fedu jamö culanö cäcö itolayoma, ö̦jö cäcö ja bä lä iyaö wei bä nomaö mlaobä. 51Bä ba̦limi cuobä cäcö nii lä cui, ö̦jö bei ya waiquiwä, fedu jamö culanö ya lä itolayono wei ya lä cui. Camiyä ya cö nii lä cui ja bä lä iyaö wei bä lä cui, ba̦limi bä nia cuo. ¿Ö̦jö tawä? Yanowamö täbä ba̦limi cuobä ya cö nii lä jöböaö wei, bei ya ya̦ji nia jöböamou —a cuma.
52Ö̦jö däjä, Jesús a wa̦ ja judio bä a̦ lafumayoma. Abinaja bä cuma.
—¿Wedinaja bei ya̦ji nia li jöböamou cuo, bäma ya̦ji wabä?
53Ö̦jö cudeenö, abinaja Jesúsnö bä nowa tama.
—Cafä wamacö nija ei ya wa̦ lä cui, bejedi lä ya wa̦. Ya lä yanowamöblaleyoluno wei ya lä cui, wamale ya̦ji waimi ja, wamale i̦yäbö coaimi ja, ba̦limi wamacö nia cuomi. 54Wale ya̦ji lä waö wejei, wale i̦yabö ca̦i lä coaö wejei bä lä cui, ba̦limi bä cuobä ö̦jö bä li. Tä lä jödödöblole däjä, ö̦jö ya bä demi nia jocädamaö co̦o. 55Bei ya ya̦ji lä cui, ö̦jö nii cäcö yai malä cui. Bei ya i̦yäbö lä cui, bä amishi yai co̦obä, ö̦jö cäbä. 56Wale ya̦ji lä waö wejei, wale i̦yabö lä coaö wejei, ö̦jö bä lä cui camiyä nija bä yanöcöwä cua, cama bä nija ya ca̦i yanöcöwä cua mö fedua.
57’Fayänö wale shömölema, täbä lä ba̦limiblamaö wei a lä cuinö —a cuma—. Ba̦limi ya cuobä, camanö wale tablalema. Inaja showawä, wale lä waö wejei bä lä cui, camiyänö ba̦limi ya bä nia tablamaö. 58Fedu jamö ya cuoma ya cö nii lä itolayono wei ya lä cui, ö̦jö camiyä ya cö a̦fa nii wäyämamou lä cule, camiyä bämacö bada bä lä cuono wei bänö, bä nii lä wano wejei mlai. Ö̦jö lä bä ma wano wejei ma cui, bä li nomalaliyoma. Camiyä ya cö a̦fa nii lä wäyämole ya cö ja bä lä iyaö wei, ba̦limi bä yai nia cuo —a cuma.
59¿Ö̦jö tawä? Judio bä yododabä yafi jamö, inaja bä nowa tama, Cabenao jamö tä a̦ wäyäö däjä. 60Jesús nija bä lä nocaono wei ai bä lä cui, ö̦jö a wa̦ fa ji̦liläjenö, abinaja bä nowa tayoma.
—Ö̦jö tä a̦ ji̦limamou nofi jaducuwämi. Tä a̦ ji̦lio nö möblobimi —bä cuma.
61Ö̦jö ma cui, Jesúsnö bä bufi jushujuwä ca̦i lä fano wei tä daö fa showadaonö, abinaja bä nowa tama.
—Camiyä ei ya wa̦ ja, ¿wamacö nia ja̦amodou daanö? 62Ya lä yanowamöblaleyoluno wei ya lä cui, ya jaba lä cuono wei jamö wamale yai ösöö dablaö fa cunoja, ¿wedinaja wamacö bufi nö cuu nomöjöobö wei? 63Yai Bada tä Bufinö täbä shino yanowamö ba̦limiblamaö, cama yanowamö täbä showawänö mlai. Cafä wamacö nija ya wa̦ lä faö wei ya wa̦nö, bämacö bufi jaducublamabä ya wa̦, Yai Bada tä Bufinö wamacö ba̦limiblobä. 64Ö̦jö ma cui, cafä ai wamacö lä cuinö wamale a̦ bejedi bufiimi —bä nowa tama.
¿Ö̦jö tawä? Jaba däjä ma cui, a wa̦ bejedi bufii lä mlajei bä daö malä showaono wei. A nia lä nomojoliano wei a ca̦i. 65Abinaja a ca̦i cuma.
—Ö̦jö cudeenö bämacö nowa taö mada waiquioblei. Fayänö bä blacämaö lä mlai, camiyä nijamö cama bä nia juu bädaomi —a cuma.
66Ö̦jö tä cublou waiquilayono wei ja, cama nija bä lä nocaono wei ai bä bluca waicoma. A lä juaaö wei jamö, bä yauo mladaliyoma. 67Cama 12 ebä nija abinaja Jesús e cuu juoma.
—Cafä wamacö ma cui, ¿inaja showawä wamacö cublou ojode tawä? —a cuma.
68Simón Pedro abinaja e cuma.
—Tä a̦ wäyäle. ¿Wedi jamö a lä cui nija yamacö juu nomöjöobä? Täbä nia lä ba̦limiblou wei, cafänö wa tä a̦ yai li tabou. 69Camiyä yamacönö bäfä a̦ li bejedi bufii waiquiwä. Yamacö bufi ca̦i jaducublaliyoma. Yai Bada tänö a lä yaileno wei, ö̦jö cafä bei wa dodijiwä —e cuma.
70Abinaja Jesús e cuma.
—Iba 12 wamacö lä cui bämacö yaia waiquilema. Ö̦jö ma cui, cafä wamacö ai a lä cui, fecula a —e cuma.
71Simón Icaliode bä ijilubö Juda a wa̦fa wäyäma. Cama 12 ebä nija a ma cuono ma cui, a nia malä nomojoliano wei.
Currently Selected:
Juan 6: GUU
Highlight
Share
Copy
Want to have your highlights saved across all your devices? Sign up or sign in
©2012, All Rights Reserved
