Juan 12

Jesús mamicö fe lä

löblaleno wei tä a̦

1Bei. Yai Bada a waiteli lä jayuano wei, 6 tä mö jalu cublou däjä tä nofi nia co̦camoaö co̦omaje. Bä iyaö showaa mlai ja, Bedaniateli bä nijamö Jesús a waloa balöquedayoma. Ö̦jamö Lasalo a bälöoma, Jesúsnö a demi jocädamaö lä co̦layono wei a lä cui. 2Ö̦jamö Jesús a ca̦i iyabeje, bä yododama. Martanö nii bä bablaaö cuaama. Bä iyabä bä lä loono wei jamö, Lasalo a ca̦i cuoma.

3Ö̦jö däjä, Maríanö toubä nö lä cle̦deli wei toubä besi fa dälänö, Jesús mamicö fe löblalema. Toubä nowa blucao dodijioma. Cama suwä fe̦ta ucunö, mamicö ca̦i ya̦jöblaö nocalayoma. ¿Ö̦jö tawä? Mamicö fe löblaö ja, a yafi nö cle̦deli jödödöblaliyoma.

4Ö̦jö ma cui, Juda Icaliode a wa̦ läblaliyoma. Jesúsnö bä lä nocamabono wei ai e cuo mö feduoma, a nia lä nomojoliano wei a lä cui. Abinaja a cuu dicooma.

5—Fei toubä nowa bluca fe balojowä. Ö̦jö lä toubä ja, ¿wedi tabä blada 300 bä däanomi, bä lä jo̦li wei bä yai bayeliblamobä? —a cuma.

6Inaja a lä cuno wei a lä cui, bä lä jo̦li wei bä nofi jalujubou yalo a wa̦ cuonomi. Showadi a tomömoma yalo a wa̦ li cuoma. Cama bä bladabö talö yefiboma yalo, bä shino doaö ja̦tooma.

7Abinaja Jesúsnö a nowa tama.

—A suwä wasö dijä. Toubä shee lä jäblalufe toubä tabobä, wale nomawä maquebobeje jamö, wale jölöcaö co̦obä. 8Bä lä jo̦li wei bä lä cui, cafä wamacö nijamö showadi bä nia malä cudio wei, wama bä bayeliblabä. Ö̦jö ma cui, camiyä ya yai nia cudiomi —a nowa tama.

Lasalo a shäö bufi lä

doblaono wejei tä a̦

9Bedaniateli bä nijamö Jesús a jo̦wa cuoma yalo, Jelusale jamö bä judio lä co̦camono wei bä lä cui, Bedania jamö bä lobe aa balölayofälöma. Jesús a shino möbeje mlai. Lasalo a ma cui, ö̦jö a ca̦i möö bufi doblaomaje, Jesúsnö a jo̦wa demi jocädamaö lä co̦layono wei a lä cui. 10Ö̦jö cudeenö, nofi bäyäalewä blowäjäwä bä lä cuinö, Lasalo a nofi ca̦i washuaö mö feduo showadaomaje, a shämobä. 11¿Ö̦jö tawä? Lasalo a demi lä jocädamaleno wei tä nowanö, Jesús nija bä bufi mö blucablou fa nomöjölonö, judio bä blucanö a bejedi malä bufileno wejei.

Jelusale jamö Jesús a

lä yafilayono wei tä a̦

12Ö̦jö tä fena ja, bä iyaö ca̦i co̦camobä bä bluca lä yododano wei bä lä cuinö, Jelusale jamö Jesús a wa̦fa juu ji̦lilemaje. 13Ö̦jö cudeenö, jai lasha si jenabä cuwä jenabä fa däabodujenö, bä a̦ noshi fa jalilaimadunö, Jesús a nabä aa mö balayomaje. Abinaja bä cufälöma.

—¡Yai Bada a nofi shino yai da doablaje! Bada a wa̦nö a lä juimi, ¡ö̦jö a shino yai bayeliblamobä a! ¡Isaeli nodiwä bäma ecö nija a Bada läobä a! —bä cuma.

14Jesúsnö bulo a ji̦ima fa dälänö a döcäquema, a befi ca̦i jubä, Yai Bada etä a̦ oni lä cuu weinaja showawä. Abinaja tä a̦ cuu.

15Sionoteli wamacö. Bä quili dijä. Bulo a ocalo ja a döcälanö, ¡cafä wamacö nija a Bada läobä, a juu lä cuimi!

¿Ö̦jö tawä? Einaja tä a̦ cuu. 16Ö̦jö tä lä cublaliyono wei tä ja, cama ebä lä nocamabono wei ebä bufi jaducublou showadaonomi. Ö̦jö ma cui, fedu jamö Jesús a lä doblaquedayono wei däjä, Yai Bada etä a̦ oni jamö, a wa̦fa lä wäyämono wei, tä a̦ nofi jaducudaö jälayomaje. Yai Bada etä a̦ oni jamö, a wa̦fa bluca wäyäö lä balöono wejeinaja, a yai bejedi taamamaje. Ö̦jö tä ja, bä bufi yai jaducublou jälayoma.

17¿Ö̦jö tawä? Lasalo a nomawä lä maquebono wejei jamö, Jesúsnö a demi famaö lä co̦ono wei däjä, bä mamo bluca lä showaono wei bä lä cuinö tä a̦fa wäyädimaje. 18Ö̦jö bä a̦ fa ji̦liläjenö, bluca bänö Jesús a nabä co̦camoaö mö baomaje, Yai Bada e nö ö̦jöböamobä, a nö lä quiliano wei tä a̦ ji̦lilemaje yalo.

19Ö̦jö däjä, abinaja faliseo bä nowa tayoma.

—Tä da möblaaje. Bäma a nö ja̦amabimi waiquiwä. Bluca bä lä bälöblai bänö, a bufii waiquiweje —bä nowa tayoma.

Jesús a nö nia bleaaö

yalo a lä quilijono wei tä a̦

20Jelusale jamö bä iyaö ca̦i co̦camobä bä lä juno wei bä nija, clieco bä ca̦i co̦yocomoma. Yai Bada nija bä möfe bolanö, a wa̦fa ca̦i nia Bada doblao fa tajenö, bä juma. 21Ö̦jö lä bä shominö, Besaidateli Felipe nija bä icuquema, Calilea tä ulifi jamö a Felipe lä bälöono wei nija. Abinaja a nowa tamaje.

—Tä a̦ wäyäle —bä cuma—. Jesús yama a möö ojode.

22Andrés nija Felipe a wa̦ faö fa balöonö, Jesús nija cäcöbö fa junö, a yömölaböma. 23Jesús abinaja a cuu mö feduoma.

—Ya lä yanowamöblaleyoluno wei ya lä cui, Yai Bada tänö wale nia doblao dablamaö. Tä cublou ajedewä waiquia lä cule— a cuma.

24Cama a nia lä taamamono wei tä a̦fa wäyäö ja, abinaja a cuu nomöjöoma.

—Cafä wamacö nija ei ya wa̦ lä cui, bejedi lä ya wa̦. Mashita jamö, nii mo befi ca̦i lä quei wei, dude mo cuo däjä, mo nia cauu showadaomi. Mo nia yami blao. Wa̦lidiwä mo fa cublalunö mo shino caulayou. Mo fa caulunö, moli mlai, bluca mobä nia yädäo. 25Inaja showawä, yanowamö bä ma cui, eja bä demi nia lä cudio wei tä ja, bä bufi mö lä blucao wei bä lä cui, bä ba̦limi nia cuodayoimi. Eja bä demi nia lä cudio wei tä ja, bä bufi mö blucao lä mlai bä lä cui, ö̦jö bä nia shino ba̦limi cuo ayao. 26Wale a̦ juaö lä ojodao wejei bä lä cui, camiyä nija bä nocaobä ö̦jö bä li. Camiyä ya cuobä jamö, ö̦jö bä nia shino cuo. Wale a̦ juaö lä ojodao wejei bä lä cui, Fayänö bä nofi nia dodijidawä tamabou —a cuma.

27Abinaja Jesús a cuma.

—Ya bufi nofi jushublaa lä cule. ¿Wedinaja ya yai cubä? “Fabe. Fei däjä ya nö nia lä bleaaö wei tä ja, ¿wale noshi da umabo”, ya e cubä daanö? Ma, inaja ya taamamobä, ya malä waloqueyoluno wei —a cuma.

28Ö̦jö däjä, Yai Bada nija abinaja a cuma.

—¡Fabe! —a cuma—. Cafä a shino yai doblao da damolalu.

Einaja a cuu ja, fedu jamö a culanö a wa̦ bädaliyoma.

—Ya doblao damoa waiquilaliyoma. Ya nia ca̦i doblao dablamou co̦o —a cuma.

29Bä bluca lä co̦caono wei bänö, a wa̦ fa ji̦liläjenö, ya̦lu a wa̦ bufimaje. Ai bä lä cui, abinaja bä cuu mö feduoma.

—A̦jele anö a wa̦ wayomaö lä cufe —bä cuma.

30Jesús abinaja a cuma.

—Camiyä ya bufi jaducublobä a wa̦ cuonomi. Cafä wamacö bufi yai jaducublobä a wa̦ julayou lä cufe. 31Fei däjä Yai Bada tänö yanowamö täbä nia jömaö. Fei däjä fecula bada a nö nia bleaamaö, bita jamö a lä nosiemou wei a lä cui. 32Camiyä ya lä cui, ya befi ca̦i nia i̦tao. Ö̦jö däjä, bluca bä lä bälöblai, camiyä nija ya bä nia ajedamaö —a cuma.

33¿Ö̦jö tawä? A shämobä, a nia yai lä taamano wejei tä jömabä, a wa̦ li cuoma.

34Bä bluca lä co̦caono wei bä lä cui, abinaja bä cuma.

—Yai Bada yama tä a̦ oni daö. A shömabä a lä yaileno wei a lä cui, a nia jo̦wa cudio. ¿Ö̦jö tawä? Wa lä yanowamöblaleyoluno wei wa lä cui, ¿wedi tabä wa befi ca̦i a̦fa i̦tao li wäyämamou dicoo? ¿Wedi jamö a lä cui, bei wa wa̦fa yanowamöblou li taö, ö̦jö lä? ¿Cafä mlai daanö? —bä cuma.

35Abinaja Jesúsnö bä nowa tama.

—Cafä wamacö nija lobe tä shi̦i cublaa. Ei tä shi̦i cua lä showale däjä, bä da cadidofälö, mö didi tä ja wamacö shi wa̦lia dicoicu. Tä mö didiobä jamö bä lä juu wei, bä mojodili ca̦i juu. 36Cafä wamacö nija ya shi̦i cua lä showale däjä, wamale a̦ bejedi da bufi, tä wacacaobä jamö wamacö lä cuo wei, wamacö yai cublobä —bä nowa tama.

Einaja bä nowa fa talöfälönö, shomi jamö a cua showalayofälöma, a dablaö mlaobeje.

Jesús a wa̦ bejedi bufii

mlaobeje Yai Badanö

tä lä lämaqueno wei tä a̦

37Täbä mamo showao däjä, bejedi lä Jesús a nö quiliama. Yai Bada e nö ö̦jöböamobä, tä nö lä quilijii tä bluca ma wawämano wei ma cui, a wa̦ bejedi bufinomije. 38¿Ö̦jö tawä? Yai Bada a wa̦no wäyälewä Isaia a wa̦ bejedi cublobä, ö̦jö lä tä li cuoma. Abinaja tä a̦ cuu.

Tä a̦ wäyäle. Yama tä a̦ lä wäyäö wei, tä a̦ bejedi bufiimije. Cafä Bada wa nö lojode ö̦jöböamobä tä ma cule ma cui, bä bufi jaducubloimi.

Einaja tä a̦ cuu. 39¿Ö̦jö tawä? Tä a̦ bejedi bufibeje, bä cuonomi waiquiwä. Yai Bada a wa̦no wäyäö ja, Isaia a lä cuno weinaja showawä. Abinaja tä a̦ cuu.

40Jai bä mamo casö miblawä, Yai Bada tänö bä tablamalema. Bä bufi ca̦i jifumaboma, tä lä dablaö wejei tä nö ö̦jöböaö mlaobeje. Bä bufi yai jaducublou mlaobä. Bä demi cudiobä, Yai Bada nija bä bufi mö yabajadou mlaobä.

Einaja tä a̦ cuu. 41¿Ö̦jö tawä? Jesús a nia lä doblaodayou wei a daa showalalema yalo, Isaianö a wa̦fa wäyäö balöoma.

42Inaja tä ma cuono wei ma cui, bada bä ca̦i bluca ma cuinö, Jesús a wa̦ bejedi bufia fe yadilemaje. Ö̦jö ma cui, faliseo bä nö bada quili fa tajenö, wawädowä bä a̦ nö wäonomi, judio bä yododabä yafi jamö bä coyocamabou mladou mlaobeje. 43¿Ö̦jö tawä? Yai Bada nija mlai, yanowamö täbä nija bä a̦fa nia dodijidawä lä tamou wei tä ja, bä bufi mö yai blucao dicooma.

Jesús a wa̦nö, bä nia

obi lä jömamou wei tä a̦

44Jesús a wa̦ i̦cali faö ja, abinaja a cuma.

—Wale a̦ bejedi lä bufii wejei bä lä cuinö, camiyä wale a̦ bufii ayaomije. Wale lä shömöleno wei a ma cui, ö̦jö lä a wa̦ bejedi ca̦i bufii showaweje. 45Camiyä wale lä dablaö wejei bä lä cuinö, wale lä shömöleno wei a ma cui, ö̦jö a ca̦i dablaö waiquiweje. 46Cowa wacö shi̦i lä culenaja ya shi̦i cuobä, bita jamö ya waloqueyoluma, wale a̦ bejedi lä bufii wejei bä bluca lä cui, tä mö didiobä jamö bä shi wa̦lio mlaobä.

47’Ai bänö wale a̦ ma ji̦liaö wejei ma cui, wale a̦ nofi cadidiboimije ja, ö̦jö bä lä cui ya bä nia jömaö showadaomi. Yanowamö ya täbä jömaö showadaobä, bita jamö ya juno malä mlai. Ya täbä jucäabä, ya yai juma. 48Wale lä waii wejei, wale a̦ juaö lä mlajei bä lä cui, obi bä nia yai jömamou. Tä lä jödödöblole däjä, wale a̦ lä waileno wejei ya wa̦ showawänö, bä nia jömamou. 49Camiyä ya bufi lä cuu weinaja ya tä a̦ wäyäö bädao malä mlai. Fayänö wale lä shömöleno wei a showawä lä cuinö wale nosiemaö ja ya wa̦. Cama a wa̦nö ya wa̦ cadidou. 50Yai Bada tänö tä tamaö lä bufii wei tä ja bä cadidou ja, ba̦limi bä nia cuo. Ö̦jö ya tä daö cudeenö, Fayänö tä a̦ wäyämaö lä bufii wei, ya tä a̦ li wäyäö —a cuma.

Currently Selected:

Juan 12: GUU

Highlight

Copy