Génesis 33

Esau, Jacobo sho cäcöbö

möyou lä co̦ono wei tä a̦

1Jacobonö tä möö fa cuaanö, Esaunö cama 400 ebä ca̦i juu mö lä baaimi, bä bluca daa showadalalema. Bä juu dalalema yalo, bä nöö ebä cadidiwä nija, bei ijilubö ebä co̦a fa lobaamacönö, bä ca̦i shedequeamaquema. Leami nija, cama ebä cadidiwä cuquema. Laquela nija, cama e ca̦i cadidiwä cua mö feduquema. A nosie juamobä ecöbö suwä lä cui nija, cama ebä ca̦i cadidiwä cua mö fedua showaquema. 2A nosie juamobä ecöbö suwä lä cui, bei ijilubö ebä ca̦i balöblamalema. Ö̦jö tä nodi jamö, Leaminö cama ebä ca̦i nodiblamaö co̦layoma. Ö̦jö tä nodi showawä jamö, Laquela, José sho, cäcöbö nodiblamaö co̦layoma. 3Cama Jacobo a balöo däjä, cama ebä bluca nojamaboma.

Mashita jamö, 7 a möfe deidou cudou mö fa baaimadunö, bä a̦iyobö nijamö a quilili blacälayoma. 4A ma quilino wei ma cui, Esau a läläaö mö fa baaimanö, Jacobo nija a fa fa̦locoblaicunö, a judädäa mö balema. Cäcöbö nomöa däayoma. 5Esaunö tä möö fa cuaanö, suwä bä ma cui, ijilu bä ma cui, bä bluca fa dalalönö, bä wa̦lima.

—Ei wa bä ca̦i lä waloicufe, ¿wedi bei ebä li? —a cuma.

—Bäfä nosie juabä ya lä cui, Yai Bada tänö wale fa bayeliblalönö, fei iba cäbä —Jacobonö a nowa tama.

6Ö̦jö däjä, a nosie juamobä ecöbö suwä lä cui, cäcöbö ajedequeyoluma. Bei ijilubö ebä ca̦i ajedea fa showaböicunö, mashita jamö, bä möfe bluca boaliyoma. 7Inaja showawä, Leaminö cama ebä ca̦i ajedea fa nomöjöicunö, bä möfe ca̦i boaliyoma. Laquela a fa feiblalunö, bei ijilubö José e ca̦i ajedea fa nodiicunö, cäcöbö möfe ca̦i boo mö feduoma.

8Jacobo nija, abinaja Esau a cuma.

—¿Wedinaja wa bufi fa cunö, ya täbä bluca lä möblei, bei wa täbä li shömöa balölei cufe? —a cuma.

—Bada tä. Wedinaja mlai. Cafä nija, ya nofi nia ojode tablamou fa balöonö, ya täbä shömöa balölei cublei —Jacobo e cuma.

9A cuma ma cui, Esau a wa̦ läoma.

—Ma, U̦asi. Iba täbä bluca waiquiwä. Afä täbä lä cui, cafä wa befi li waiquiwä —a cuma.

10—Ma, ma —Jacobo a cuu fe blacäjoma—. Cafä nija, ya dodijidawä cua waiquia cudeenö, afä bä yalo da dälä. ¿Ö̦jö tawä? Wale nofi ojodabou waiquiwä ja, ya bufi malä ayäyaimole. Bäfä dablaö co̦o yalo, jai Yai Bada tänö wale nofi asiblaö co̦layoma, bäfä nofi malä tabole. 11¿Ö̦jö tawä? Afä täbä da dälä. Yai Bada tänö wale bayeliblalema yalo, ya täbä bluca lä tabole täbä ja, bäfä dobäö bufi doblao. Iba täbä bluca cua mö malä fedule —Jacobo a fa cunö, a wa̦ fe fa blacäjonö, ebä däa fe yadimalema.

12Ö̦jö däjä, abinaja Esau a cuma.

—Bei. Bämacö co̦ofälöbä jamö, camiyä ya fa balöbalunö, bämacö lulubofälöbä —a cuma ma cui, 13abinaja Jacobo a cuu majöoma.

—Ma, bada tä. Ijilu bä oshe ja, bä jaöblou lä mlai wa tä daö waiquiwä. Yalo bei ijilubö ca̦i lä cui, dodijidawä ya bä nowamabä tä ca̦i malä cule. Ya bä jumaö fe blacäjou ja, moli tä mö jalu showawä ja, bä bluca nomaa dicolaliyo. 14Cafä wa shino balöö showaofälöbä, bada tä. ¿Ö̦jö tawä? Cafä bäfä nosie juabä ya lä cuinö, yanöcöwä ya bä ca̦i obisai cuaaö jeimabä. Ijilu bä obisi lä cuaaö weinaja, yalo bä ca̦i obisi lä cuaaö weinaja, yamacö obisi cuaaö fa jeimanö, ya̦cumö Seili täbä jefu jamö, yamacö waloa jequei. Cafä bada wa lä bälöle jamö, ya bä ca̦i waloquei —Jacobonö a nowa tama.

15Inaja a cuu ja, abinaja Esau a cuu nomöjöoma.

—Ja̦o. Iba ai ya bä lä lulubole, ya bä fa dacöfälönö, wamacö ca̦i juu juobeje. ¿Ö̦jö tawä? —a cuma ma cui, Jacobo a wa̦ lämou co̦oma.

—Ma. Yami yamacö ma cui, yamacö juu juo weicätä. Cafä bada wa nija, dodijidawä ya dablamou malä waiquiofe. “Inaja lä waiquiwä”, wale nofi tabobä. ¿Ö̦jö tawä? —a cuma.

16Einaja a cuma yalo, Seili täbä jefu jamö, Esau a co̦o showaobä, cama ebä ca̦i co̦a showaa co̦layoma. 17Ö̦jö ma cui, shomi jamö Jacobo a baa fa jeicunö, Sucodo jamö a fa waloicunö, ö̦jamö lä a shabonomolayoma. Cama yalo ebä nia fa wejemabonö, yaa jenabä ja, bä yanobö tablaö mö fedua showalayoma. Ö̦jö bä yanobö bluca fa cublalunö, Sucodo tä a̦fa ulifi jilaquema.

Siquemö jamö, Jacobo a aa

lä nomöjölayono wei tä a̦

18Badanalama jamö a culanö, Jacobo a fa alufälönö, Canaana tä ulifi jamö a waloa fa nomöjöalunö, Siquemöteli bä nijamö, dodijidawä a waloquema. Siquemöteli bä shabonobö ajede jamö, a bälöblaquema. 19Amolo bei ijilubö ebä nija, a lä bälöblaqueno wei tä ulifi dälema. Blada 100 bä ja, tä no ulifi co̦maquema. Amolo a lä cui, Siquemö bä fö̦ö e cuoma. 20Ö̦jö tä ulifi jamö, Jeobaa nija bä yalo lä dodoblamou wei bä maqueblamobä etäcö i̦taquema. Etäcö a̦fa ca̦i jilaa showaquema. Abinaja täcö a̦fa jilaquema. Isaeli ebä nija Yai Bada a lä bufiblamou wei a, täcö a̦fa jilaquema.

Currently Selected:

Génesis 33: GUU

Highlight

Copy