Miqueas 2
2
Upla tataibra nani ba karnika brisa
1¡Nahki saura kabia baha nani,
tihmia aiska ai krikrika ra prawi,
nahki saura daukaia ba dukiara baman luki kaiki ba,
bara titan yu baiwan wal saurka ba mahka daukuya,
witin nani karnika ai mihta ra bri bamna!
2Upla wala tasbaya nani ba kaiki tumisa bara sin dakbi brisa;
baku sin upla wala watla nani kaiki tumisa bara implikisa;
watla dawanka waitna ra, maya bara luhpia nani ra,
ai yuyaka bri ba sut ra taibi munisa.
3Baha mita Dawan aisisa:
“Yang sin man nani mampara
diara kum daukaia sna,
mai sauhki mai tikaia pâtka blikamna,
bara man nani baha pâtka wina sip swak takma apia.
Man nani pât ra kama,
mamyuni lilia wapi tauki kama apia,
piua ba man nani mampara saura pali kabia bamna.
4Baha piua ra, upla nani bui man nani ra
lawana ulbi aiwanan kabia, yahwi inanka baku.
Mai wi banhbia:
‘Yawan na aiska pali wan sauhki tikan sa;
Dawan bui wan tasbaya wankan kan ba,
witin ai prapatika,
wan mihta wina dakbi brin,
upla kum sin bûi tâwan aisaras kan;
bara alba wan bri uplika nani tilara
wan tasbaya nani ba yui yan.’ ”
5Baha mita naha tasbaya na,
Dawan uplika nani mihta ra kli mangkaia piua balbia ba ra,
man nani tilam wina lika, upla kumi sin tasba bribia apia.
Prapit saura nani ba
6Witin nani bui Dawan dahra aisi uplika nani ra wisa:
“¡Man nani baku dahra aisapara!
¡Swira tara ba, yawan ra sip wan alkbia apia!”#Ais 30.10.
7¿Dîa man nani lukisma,
Israel luhpia nani ba lahtubanka munhtara sa?
¿Gâd na ai kupia alki takaskras takan ki?
¿Man nani lukisma ki,
Gâd ban baku pali daukbia?
¿Upla yamni, diara wapni dauki ba dukiara,
yamni aisisa apia?
8Man nani lika yang upliki nani mapara buram.
Waitna nani war aiklabi si ai watla ra aula
kan ra, ai kwalka manakira mihta dakbi briram,
baha nani pât swakwan luki kan ba.
9Mairin nani ai watla latwan kaiki ba wina,
man nani mita kangbi sakisa;
ai luhpia nani ra yukuki swisa ban kaia ra,
yamni kulkanka nani yabri ba wina.
10¡Man nani naha wina bus, bara impaki bas!
Kan naha lika ris briaia pliska apia sa;
saurka witin ra uba pali ai pura luan sa,
baha mita witin ba danh pali saura takan sa.
11Kunin aisasara kum, upla nani ra
kunin muni dahra aisi wibia:
“Yang lika wain laya
bara laya tahpla dukiara aisi wisna”,
baha sât prapitka sika
naha uplika nani na brin daukisa.
Dawan bal ai uplika nani swaki sakaia wisa
12Âu, yang, Jekob uplika nani sut
asla daukamna;
Israel luhpia nani kau bâra swin ba,
yang asla wahbamni.
Sîp daknika baku klar kum ra asla daukamna,
sîp ailal twi tasbaya ra bâra ba baku,
bara upla ailal bin dauki ba baku daukbia.
13Gâd bui witin nani ai yabalka ba param sâkbia,
witin nani bui nina blîkbia,
bara tawan dimaika bâk taki wabia.
Dawan, ai kingka ba, witin nani tâura aimaki impakbia.
Currently Selected:
Miqueas 2: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
