Matiu 4
4
Jisas ra traika kaikan ba
(Mk 1.12-13; Lk 4.1-13)
1Naha ningkara, Spirit ba mita Jisas ba upla iwras tasbaya ra brih wan, dibil mita traika kaikbia dukiara.#Hib 2.18; 4.15.
2Witin bahara kakna 40 bara tihmia sin 40 plun piras kan, bara plun dauki kan. 3Bara dibil balan Jisas traika kaikaia, bamna naku win:
—Man ba Gâd Luhpia kaka, naha walpaya nani ra adar yas brit takbia.
4Sakuna Jisas bila:
—Ulbanka ra wisa: ‘Upla ba brit mita man raya kabia apia, sakuna Gâd aisi bîla ba wal sin.’#Kli S 8.3.
5Ningkara, dibil Jerusalem tawanka holikira ra brih wan, bara tempel bahna ra suni, 6naku win:
—Kasak man ba Gâd Luhpia sma kaka, naha wina kauhs; kan Ulbanka ra wisa:
‘Gâd ai insalka blîkbia main mai kaikaia;
ai mihta nani ni mai alki mai bukbia,
minam ba walpa ra kra pruki latwan brima apia dukiara.’#Law 91.11-12.
7Jisas bila witin ra:
—Ulbanka ra sin wisa: ‘Man bui Dawan Gâdkam ra traika kaikpara.’#Kli S 6.16.
8Kli dibil mita il kum purara pali suni, naha tasbaya kuntrika nani sut marikan, ai prana nani sin. 9Bara witin bila:
—Lulam kriki bara yang ra mayunma kaka, naha sut yang maikamna.
10Bara Jisas bila:
—Sitan, na wina taki was, kan Ulbanka ra wisa: ‘Man Dawan Gâdkam ra lulam kriki puram suni mayunma, bara witin dukia baman sin daukma.’#Kli S 6.13.
11Bara dibil ba Jisas ra mahka swin, bara insal nani bal ai dukia dauki kan.
Galili ra Jisas ai warkka tâ krikisa
(Mk 1.14-15; Lk 4.14-15)
12Jisas walan Jan ba silak ra mangkan,#Mt 14.3; Mk 6.17; Lk 3.19-20. bara witin Galili tasbaya ra wan. 13Sakuna Nasaret ra takaskras, ban Kapernaum tawanka ra wih iwan;#Jn 2.12. baha lika lakun un ra kan, Zabulón bara Neftalí tasbaya. 14Baha baku takan, prapit Aiseya ulban ba kat aimakbia dukiara:
15“Zabulón bara Neftalí tasbaya,
kabu lamara yabalka ra,
Jordan lalma tani ra:
Galili, bahara Ju apia nani iwi ba.
16Tihmu tara ra iwi uplika nani ba
ingni tara kum kaikan;
bara prura tihmuka tasbaya ra iwi nani ra
ingni tara kum ingwan.”#Ais 9.1-2.
17Baha piua wina Jisas mahka aisi smalkan, naku aisi: “Man nani saurkam nani wina kupiam laks, Gâd Kingka aimaki ba lâka pat baila sa bamna.”#Mt 3.2.
Jisas bui inska âialkra walhwal paiwisa
(Mt 1.16-20; Lk 5.1-11)
18Jisas Galili lakunka unku wapi kan bara waitna wâl kaikan baha nani ai muihni kan; kum nina ba Saiman, ai nina wala Pita, bara wala ba lika Andru. Witin nani inska âialkra kan, bara ai iliska ba liura lulki kan. 19Bara Jisas bila:
—Man nani nini blîks, bara yang mita upla âialkra nani mai daukamna.
20Baha sim piua ra ai iliska nani swi si, Jisas wal wan.
21Kau wiria wapan ba ra, Jisas kau waitna wâl kaikan, baha nani sin ai muihni atia: Jems bara Jan, Sebedi luhpia nani. Witin nani ai aisa wal duri kum ra ai iliska nani kalwan ba mami kan. Jisas winan, 22bara baha sim piua ra ai dwarka bara ai aisika ba sin swi si, Jisas nina blikan.
Jisas bui upla ailal ra smalkisa
(Lk 6.17-19)
23Jisas Galili tasbaya kir taukan, plis bani priaska watla nani ra smalki kan Gâd king aimaki sturka yamni ba; bara siknis sât sât upla nani bri kan ba sut sin raki kan.#Mt 9.35; Mk 1.39. 24Siria tasbaya sut ra Jisas sturka walan, bara siknis sât sât bri nani, pirit saura bri nani, wîna tatatwi nani bara wakia lâwi pruan nani ba sin sut witin ra brih balan. Jisas mita sut rakan.
25Bara upla ailal ai nina blikan Galili wina, Decápolis wina, Jerusalem wina, Judia tawanka nani wina, bara Jordan awala lalma tawanka nani wina sin.
Currently Selected:
Matiu 4: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
