Aiseya 51
51
Maisa nihkra bîla nani Saion dukiara
1“Yang ra wals, man nani kasakka lâka ra iwaia nina bliki nani sma ba,
bara yang ra ai plikisma ba —Dawan aisisa—.
Man nani baha walpaya ra kaiks,
baha wina man nani mai klaki sakan ba,
bara kaiks baha walpaya sakaika ba,
baha wina man nani mai daiki sakan ba;
2man nani aisikam Ebraham ra kaiks,
bara Zérah ra sin, man nani rayaka maikan ba.
Yang bui witin ba paiwri yakan bâra kan bamna,
bara witin ra yamniki yâri,
bara kiamka ailal daukri.#Bla St 12.1-3.
3Saion ra yamniki marikamna,
baha tawanka tara sauhkan bâra kata ba.
Tasba lâwan upla iwras tasbaya ba wina
giadin daukamna,
Dawan mita Eden giadinka ra mangkan ba baku.
Bahara lilia bâra kabia, kikaia sin,
mayuni aiwananka nani miusik binka dauki.#Bla St 2.8; Isi 36.35.
4“Aman yang ra wals, yang upliki nani,
bara ai wals, nisanki nani:
kan yang wina lâ smalkaia ba bal takbia,
bara yang kasakki lâka ba upliki nani ingnika kaia dukiara.
5Yang pura luaia ba pat baila pali sa,
swaki mai sakaia lâka ba aula sa,
yang klaihkla nani ba upla nani lâka daukbia;
kabu un ra iwi nani ba sut yang bîli kaikisa,
yang karniki ra bîla kaikanka brisa.
6“Man nani namkra ba kasbrika purara kaiks,
bara man nani tasba mâyara sin kaiks;
kasbrika pura ba lap tiwan kabia, kiasma baku,
bara tasba ba almuk takbia dimaia kwalka almuk taki ba baku,
bara baku natka ra upla nani ba sin tanis tiwbia,
kukas baku prui tiwbia.
Sakuna yang swaki mai sakri lâka ba,
bâra ban kabia lui waras,
kasakki lâka bara pura luanka ba wal tiwbia apia.#Law 102.25-28; Mt 24.35.
7“Yang ra ai wals,
man nani kasakka lâka kakaira sma ba,
upliki nani lâika nani bîla kaikanka brisma ba.
Swappara witin nani saura mai wi ba dukiara,
8kan witin nani ba kwala yula mita pi ba pibia,
linin kwalka ba liwa mita pi ba baku.
Sakuna yang pura luisna lâka ba lika lui wabia apia ban kaia ra,
bara swaki sakangki lâka ba sin bâra ban kabia.”
9¡Rawi bus! ¡Rawi bus!
Dawan klahkla, man karnikam prâka ba dims;
rawi bus piua luan ra daukram ba baku,
piua wihka luan ra baha daukram ba;
Rehob ra klakatma ba, bara dragun kabu ra ba.#Job 9.13; 26.12.
10¿Man apia ki, kabu ba lâkatma ba,
tihuka tara laya nani bri kan,
tihuka tara pali nani bâk yabal daukram,
atki sakan nani lui waia dukiara?#Imp St 14.21-22.
11Kasak pali Dawan mita atki sakan nani ba,
baku kli tawi balbia;
aiwani kli tawi balbia Saion ra
bara ai lal nani purara kaiki,
lilia lui waras ba liliaka bâra kabia;
lilia aihwa ba bribia, bara sari lâka
bara ai mamna lulkanka ba sin lap tiwbia.#Ais 35.10.
12“Yang, yang sika, man nani maisam nihkra sna.
¿Man nani ya sîa mai daukisa?
¿Upla nani ra?
¿Upla praprura nani ba baha nani twi baku ba?
13¿Dawan mai papaskra ba, pat âmya tikaisma,
witin kasbrika pura nani ba bri sal saki bapan ba?
¿Bara man yu aiska ban sibrin tatatwi ban kaisma,
baha nani ai kupia baikanka ra sarkam paski ba dukiara,
witin nani mai slingbi tikaia ridi taki buan ba sîa?
¿Sakuna kupia baiwanka ra sarkam paski nani ba anira sa?
14Priskan, sari, umpira takan nani ba
pat pali pri sakan kabia;
tasba unta sialaka watla ra ban prubia apia,
ai pata sin danh takbia apia.
15“Yang sika man Dawan Gâdkam,
yang nini karnika sut bri Dawanka;
kabu ba nikbisna
bara ripka nani ba yâri lawisa,
16kasbrika pura bara tasba sin paskri.
Twisam ra bîli nani mangkri aisaia,
mihti distika ra kainam kahbri.
Yang Saion ra wîri:
‘Man ba yang upliki nani sma.’ ”
17¡Rawi bus! ¡Rawi bus!
¡Jerusalem, rawi bus!
Dawan klalka ba wauhram, kupia baiwanka kapka ba diram,#Jir 25.15; Par M 14.10; 16.19.
man ban bla takram ba kat.
18Luhpa brisma nani sut tila
wina kumi sin takras, man nani tâm briaia uplika;
luhpiam nani sut pakram ba tila wina
kumi sin mihtam ra alki mai bri wapaia âpu.
19Naha saurka wâl na puramra balan sa:
man kuntrikam sauhki tikan ba bara impliki âpu daukan,
bara man uplikam nani prui tiwan plun bla, war takan mita.
¿Ya man ra umpira mai kaikbia?
¿Ya man ra maisam nihkbia?
20Daiwan alkaika ni sula ra alkan ba baku
luhpiam nani ba karnika âpu sa,
Gâd kupia baiwanka mita
yabal bani ra ikan prawi banhwisa,
Gâd mita wapni daukaia mata.
21Baha mita tawan tara sarikira,
nanara naha wals;
man bla pali sma ba,
sakuna wain dih lika apia.
22Man Dawankam bara man Gâdkam ba,
witin ai tawanka tâwan aisi ba bîla wisa:
“Kaiks nanara yang bui man mihtam wina
baha kapka ba sakaisna,
baha di bla takram ba;
yang kupi baiwanka kapka ba wina kli dima apia.
23Baha nani sarkam papaskra nani ba mihta ra kapka ba mangkamni,
witin nani bui man nani ra mai win:
‘Tasba ra prawi kama bara yang nani lika man puramku wapi luamna’;
bara man wînam tara ba baku,
tasba ra prawram bara witin nani mai taiban.”
Currently Selected:
Aiseya 51: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
