Aiseya 40
40
Dawan bui Jerusalem maisa nihkisa
1Man nani Gâdkam ba aisisa:
“Upliki nani ba maisa nihks, man nani maisa nihks;
2man nani Jerusalem ra ba latwan kaiki aisas,
witin ra wis alba kaia piua kan ba pat luan,
ai saurka nani pâtka mana ba pat aibapan,
ai saurka nani ba tâwan
yang mihti wina klala pat aima wâl brin.”
3Bîla baikra kum winisa:
“Man nani bui Dawan yabalka ba ridi dauks
upla iwras tasbaya ra,
Gâd yabalka tara ba wapni dauks,
wapanka kum wapni biarapara pliska kum ra.#Mt 3.3; Mk 1.3; Jn 1.23.
4Il bîla bani ba lalauban kabia,
il nani, kiuhsi nani ba sin sut mâyara ikan kabia;
bara warha ba wapni takbia,
pruamni nani ba sin langni takbia.
5Bara Dawan prana ba param takbia,
bara baku upla bani asla aikuki witin ba kaikbia;
Dawan witin mita baku takaia aisin ba.”#Lk 3.4-6.
6Bîla baikra kum aisisa: “Wins”,
bara yang pana makabi walri:
“¿Dîa dukiara yang bîli baikra tara winamna?”
“Upla bani ba twi baku sa,
¡bara ai prana sut ba sin
twi ra tangni prana ba baku sa!
7Twi ba lâwisa, ai tangnika ba sin srawisa,
Dawan wingka puhbra ba
witin ai purak lui ba ra.
Kasak pali upla ba twi baku sa.
8Twi ba lâwisa, tangni ba srawisa,
sakuna yawan wan Gâdka bîla ba
ban bâra sa ban kaia ra.”#Je 1.10-11; 1 Pi 1.24-25.
9Saion wina maisa papakra,
man il kum purara ba ra uls;
bîlam baikra ba karna wins;
karna wins, si bripara, Jerusalem,
Juda tawanka tara nani ra wis:
“¡Man nani Gâdkam ba kaiks nâra sa!”
10Kaiks, Dawan ba ai karnika wal aula
bara witin Dawan aimakbia.
Ai uplika nani brih aula
witin holi atki saki brin ba.#Ais 62.11.
11Witin sepad baku ai daknika ba main kaiki aula;#Isi 34; Lk 15.5; Jn 10.11.
sîp lupia nani ba ai klahkla ra twilkisa,
swap lupia nani ba, ai lama bîla kat main kaiki alkisa.
Israel Gâdka ba sip gâd wala wal prakras
12¿Kabu tara ba ya pat ai mihta ra alki kulki kaikan,
apia kaka ai mihta sirpika nani ba ni
kasbrika pura bîla yahpika ba
pat wiria kulki kaikan?
¿Ya pat tasba yuya nani ba sut kâp kumi ra auhban,
apia kaka, kiuhsi nani il nani ba sut
paun ra mangki kaikan?#Job 38.4-11; S L 8.29.
13¿Ya mita Dawan mistikka ba kaiki win?
Apia kaka, ¿ya witin ra kupia krauki smalkan?#Ro 11.34; 2 Ko 2.16.
14¿Ya mita witin ra marikan smalkanka bîla nani ba,
bara baku sin witin diara tânka kakaira takaia ba sin?
¿Ya witin ra lâ wapni daukaia yabalka nani ba marikan?
¿Apia kaka sins lâka ba witin ra smalkan?
¿Apia kra tânka kakaira kaia yabalka ba marikan?
15Witin ai mapara nisan nani ba lî mâ kum baku sa,
tasba yuya lupia paun ra mangkan ba baku;
kabu un ra iwi kuntrika nani mana ba
auhya yuya kum baku kulkisa.
16Líbano aiska ra pauta bara
daiwan nani ba aitani ailal apia sa sakripais daukaia.
17Nisan nani sut ba,
witin ai mawanra diara apia baku sa;
witin wal praki kaiki kulki kaiki ba ra,
diara kum âpu ba baku sa.
18¿Bamna Gâd lilka ba,
man nani bui ya lilka talia daukma?
¿Apia kaka, man nani dîa lilka
witin ai talia ba lilka ba wal prakma?
19Diara wina karbi lilka papaskra nani ba,
diara lilka daukisa bras wina,
bara gul ni lalaubisa,
silbar ba slilki diara awa lipni nani ba paskisa.#Ap St 17.29.
20Upla umpira ba, dus yula piras ba pliki saki,
baha ni karbi lilka daukisa;
lilka papaskra sinskira kum plikisa,
bara lilka kum karbi dauki witin ra yabia,
baha aiawras ai pliska ra ban sa, kauhbia apia.#Ais 41.6-7; 44.9-20; Jir 10.1-16.
21¿Dîa man nani nu âpu katma ki?
¿Man nani sip walras katma ki?
¿Blasi pali wina man nani ra mai wiras kata ki?
¿Tasba paskan ba piua wina,
man nani ra pat mai smalki mai wiras kata ki?
22Witin tasba kutbanka na purara kasbrika baila wala ra iwisa,
tasba ra nani ba tristrisia nani baku sa;
witin kasbrika purara ba slingbi sakisa kwala kum baku,
trapalin watla baku bahara palkisa.
23Karnakira nani ba witin mita diara âpu lakisa,
tasba ra wihta aimaki nani ba diara bahki daukisa.
24Witin nani ba tasba ra mangkras kan baku kabia,
witin nani sin mâ nani ba mangkras kan baku,
ai plamaika ba sin ai wakia nani ba tasba ra briras kan baku;
pâsa kum witin nanik aihni krawi luan bara pat lâwisa,
bara prari bal brih auya dus wahia lâwan kum baku.
25Holikira Gâdka ba makabi walisa:
“¿Man nani bui yang na dîa wal tailia ai daukaia plikisma?
¿Apia kaka, dîa wal baku ai praki ai kaikaisma ki?”
26Man nani namkra nani purara buki kaiks;
bara kaiks ya naha diara nani na paskan ba.
Baha nani sut ba witin kumi saki kulkisa;
baha nani sut ba witin nina nani kat mâki winisa,
sut ba bâra sa.
Baku sika witin tara sa, ai karnika ba sin,
ai kingka lâka karnika ba sin.
27Israel, Jekob tawanka,
¿dîa kan brukwisma? ¿Dîa kan aisisma:
“Dawan ba yang ra diara taki ba tânka briras,
Gâd lika yang dukira lukras”?
28¿Man kaikras sma ki?
¿Man walras sma ki?
Dawan sika Gâd ban kaia ba,
tasba lui waia piua sin witin mita paskan ba.
Witin dring swapras,
swapan bara bahkia takras,
witin diara tânka kaiki ba sut alkaia ba upla kumi sin âpu sa.
29Swapan bara witin mita karnika yabisa,
karnika âpu pali takan ba ra sin
witin mita kli karnika ailal yabisa.
30Wahma bara tiara nani ba
swapisa bara bahkia sin takisa,
kau karna nani ba sin swapni taki kauhisa,
31sakuna Dawan bîla kaiki luki nani ba,#Law 25.3; 33.20-21; Ais 49.23.
witin nani karnika raya bribia,
witin nani yakal tara nani baku
ai tnawa nani buki pâlbia;#Law 103.5.
sip kabia plapaia bara bahkia takbia apia,
bara sin wapbia swapras kira.
Currently Selected:
Aiseya 40: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
