Aiseya 38
38
Ezequías siknis alkan bara kli rawan ba
(2 Ki 20.1-11; 2 Kr 32.24-26)
1Baha yua nani ra Ezequías ba sikniska saura pali alkan, pruaia man kan. Bara Aiseya, Emus luhpia ba balan witin ra kaikaia, bara naku win:
—Dawan ba naku wisa: ‘Man wamtla uplika nani ra kasak bîla smalks, kan man pruaia sma, man sikniskam na wina rawma apia.’
2Bara witin ba ai mawan tat kutban un ra lakan, bara naku Dawan ra ai pura sunan:
3“Dawanki, yang mamkabisna, man ba yang dukira kupiam krauks, kan yang sika man mamwanra kasak ba kat daukri kupi aiska kira wal; bara diara nani daukri ba sin, man kupiam brinka kat daukri.” Bara Ezequías ba karna inan.
4Bara Dawan kli Aiseya ra balan, bara win 5Ezequías ra wih naku wibia: ‘‘Dawan aisikam Debit Gâdka ba naku wisa: ‘Man puram sunram ba yang walri, namkra laya nani ba sin kaikri. Bara kaiks man mankam ba kau mani 15 pura prakuna, kau raya kaia. 6Bara man ra pri mai sakamna, baku sin naha tawanka Jerusalem sin, Asiria kingka ba mihta wina; bara naha tawanka na, yang mita kan kahbi kamna.’ ”
21Aiseya ai bîla bliki win, kwah nani ba brih tuski sîka kum daukbia ba ra, king sikniska ba ra prakbia, baku daukan bara king ba rawan. 22Bara Ezequías Aiseya ra makabi walan:
—¿Dîa sainka kaikaia aikma baha mita daira walamna Dawan tempelka ra waia sip sna ba?#38.22 Bors 21-22 nani ba, sapta 38 lâs bors nani ba wina naha pliska ra lakan sa, 2 Ki nani 20.7-8 tânka kat.
7Bara Aiseya pana win:
—Naha na man ra sain kum kabia, naha na Dawan daukbia witin aisin ba baku: 8Kaiks, lapta plapi kaikaika markka Ahaz bri ba, mark matawalsip kli ninara waia daukamna.
Bara lapta tawi distika ba, baku mark matawalsip kli ai ninara tawi wan.
9Ezequías, Juda kingka, witin siknis takan ba wina, kli ai sikniska yamni takan bara naha lawana ulban:
10Yang lukri:
rayaki yua nani ba, kau wahma pali
pruan nani tasbaya getka ra auna;
manki nani kau briaia katna ba wina ai takaskan.
11Yang lukri: Nanara yang Dawan kaikamna apia,
witin rayakira nani tasbaya ra iwi ba,
baha tasbaya ra iwi nani upla ba sin
kli kaikamna apia lukri.
12Yang iwaiki watla ba kitbi sakan,
bara yang wina tnaya ra lakan,
sepad tintka watla buki ba baku.
Kwala papaskra, kwala klaki ba baku, rayaki ba klakri.
Kakna ra bara tihmia ra aikram pât wahwisna.
13Tihmia aiska titan kat yang inri,
layan kum mita dusi nani ba sut akban baku.
Kakna ra bara tihmia ra aikram pât wahwisna.
14Suki tara baku, plipli baku sin yang brukwi katni;
butku baku maimna lulki kapri.
Naikra nani kasbrika purara kaiki swapan.
¡Dawan, yang na ai taiban sa,
man bui yang dukira pana aisas!
15¿Sakuna yang dîa wimna,
witinka yang ra ai win bara
witin mita sin baku daukan ba?
Yang yapanki nani sut tiwan
sulki sari takan ba mita.
16Baha nani Dawan mita kan kahbi ba
baman raya kabia,
yang sin witin nani ba aikuki raya kama.
Sikniski ai rakram, rayaki ba kli aikram.
17Nanara kaiks, yang sari pali kaia katna ba,
nanara kupi kumi sna.
Prura tasbaya wina, man bui yang rayaki ba sakram,
yang saura yâri ba sut man pri ai sakram.
18Pruan nani tasbaya ra
sip mamyuni purara mai bukan kabia apia,
pruan nani ba sin sip prana daukbia apia,
raiti bilara iwi wan nani ba sin,
man kasakkam lâka ba sip bîla kaikbia apia.#Law 88.10-12.
19Witinka nani raya ba, baha nani baman,
Dawan, mayunra maikbia,
naiwa yang daukisna ba baku.
Aisika nani ba ai luhpia nani ra
naha kasakka tânka na param marikan kabia.
20Dawan nâra sa swaki ai sakaia dukiara.
Bara ba mita yawan wan aiwananka nani sut ba
Dawan watla ra aiwanbia,
wan rayaka yua nani sut ra sin.
Currently Selected:
Aiseya 38: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
