Aiseya 21
21
Babilon karnika ba krikan kabia dahra aisin
1Upla iwras tasbaya ba dahra aisinka:
Prari nani baku waupasa wina aula,
upla iwras tasbaya wina
aula sirang iki pliska ba.
2Diara aihka saura karna pali kan Dawan
mairikan ba
pât ra dadingkra ba, upla pât dingkisa,
sauhki tatikra ba sauhki tikisa.
¡Elam, bus!
¡Media uplika nani, dimi alks!
¡Brukwi ba kau walan ai daukras!
3Yang wîni aiska na sirang iwan sa,
latwan ba mita ini tasba ra aikarwi kapri,
mairin tuktan baiki latwanka baku,
sari ba mita aikan sturi walras,
sibrin ba mita aikan sip kaikras.
4Lukanki ba tanis brisna,
sibrinka tara ba mita,
sibrin ai dingkan;
tutni kaulhka ba
yang uba pain kaiki katna,
nanara sibrinkira lâka yang ra takan.
5Witin nani tibil ba pat bri sal mangkisa,
diara maman dukia nani ba ni palkisa;
bara pi, di banhwisa.
¡Kiaptin nani, man nani bus,
war aiklabaika dukia kainam kahbaika ba lipni dauks!
6Dawan bui yang ra naku ai win:
“Was, aihwawakra kum mangks
bara witin diara kaiki ba mai wibia.
7Witin kaikisa
aras wâl mita wagin kum raskisa,
wagin kumi bani ra
upla nani biriku ra ulisa,
apia kaka kiamil ra uli baku sa,
kau aman pali kaiki bas.”
8Bara aihwaki kaiki kata ba kisban:
“Dawan, yang na aihwawakra watla ra,
pura wina kaikisni yu aiska,
tihmia sin yang aihwaki kaikisna.
9Bara nanara kaikisna aras wâl wagin kumi raski aula.”
Bara upla kum aisi, win:
“¡Kauhan, Babilon ba kauhan!#Par M 14.8; 18.2.
Ai aidulka gâdka nani sut
tasba ra kauhi kriwi yuya baman takan.”
10Yang upliki nani,
plawar ai mina ra taibi baku sma,
karnika sut bri ba,
dîa aisin walisna ba
yang maisam pakisna.
Edom dukiara dahra aisin ba
11Edom mapara dahra aisin ba:
Seír wina bîla baikra kum yang ra ai winisa:
“Aihwawakra, ¿tihmia ba dîa awar sa?
Aihwawakra, ¿tihmia ba dîa awar sa?”
12Bara aihwawakra pana wisa:
“Pat ingwaia baila sa,
sakuna tihmia ba kli aula.
Kli walan mai daukisa kaka
kli bal makabi wals.”
Upla iwras tasbaya ra dahra aisin ba
13Upla iwras ba tasbaya ra dahra aisi ba:
Dedán wina uplika kwâra ailal
upla iwras tasbaya ra srikra nani tilara tihmia lalawisa,
14taki was diran dauki uplika nani aula ba wal prawaia.
Witin nani ra lî yas
Temá kuntrika uplika nani,
taki was plapi auya nani ba
witin nani ra plun piaia yas.
15Kan witin nani sord malika wina plapisa,
sord napa mala daukan ba wina,
pantamangka lulkaia aubi ba kaina wina,
war aiklabi aula ba mawan wina sin.
16Dawan bui ai win:
“Naha wina kau mani kum kat,
wark tatakra kum ai warkka wina ai mana bri ba,
aisi ba baku,
Quedar prana tara nani bri ba
sut slingban kabia.
17Bara Quedar luhpia nani,
trisba lalulkra aiklaklabra
nani ba, pantamangkika nani
ba kulki lupia baman kabia.”
Dawan, Israel Gâdka ba, baku aisin.
Currently Selected:
Aiseya 21: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
