Aiseya 19
19
Idsip dukiara dahra aisin ba
1Idsip#Jir 46.2-26; Isi 29.1—32.32. mapara dahra aisin ba:
Man nani kaiks
Dawan ba kasbrika karna plapi ba kum ra uli:
Witin Idsip ra aula.
Idsip aidulka nani sut witin ai mawanra tatatwisa,
Idsip uplika nani ba, kupia dring sirang sa, ai tila kat.
2“Idsip uplika nani ba,
ai tila kat mapara buaia daukamna
bara kumi bani ai muihni mapara aiklabia,
ai uplika nani mapara tawan ba tawan mapara,
king tasbaya lâka ba king tasbaya lâka mapara aiklabaia.
3Idsip uplika nani lukanka ba lap tiwaia daukamna,
dîa daukaia luki dauki ba sut sauhkamni.
Bara witin nani aidul nani ra makabi walbia,
sukia nani ra sin,
pruan nani piritka ra sin,
smaya kakaira nani ra sin.
4Sakuna yang mita,
Idsip ra dawan kum karnika mina munhtara mangkamni,
taibi mamunra kingka witin nani dawanka aimakbia.”
Karnika sut bri ba Dawanka baku aisisa.
5Awala nani sut ba lâwan kabia,
Nilo awala ba sin tawa lâwi âpu takbia.
6Awala nani ba sin lâwi bisbaya takbia,
lî kârma nani ba sin lâwi danh âpu takbia;
yauhrus nani, klisang nani ba sut srawbia.
7Nilo awala un ra klisang painkira pâwi ba,
bara mâ mangkan awala un ra pâwi nani ba sut lâwi tiwbia,
baku ban kabia apia.
8Inska âialkra nani Nilo awala ra miski nani ba
sin sari pali kabia;
baha nani sut ai kiulhka awala ra lulkbia ba inbia,
ai iliska nani liura kahbia ba sin sari bribia.
9Linin painkira dauki nani ba,
kupia turban takbia,
diara mamamra nani,
bara tân talia nani mami uplika nani sut
ai una tâlia âpu takan kabia.
10Kwala papaskra ba sirang iwan kabia,
bara ai mihta ni diara papaskra nani ba
ai tânka briras takan.
11¡Kasak pali Saion ra,
wihta nani, man nani bâra sma ba,
sinskas banhwisma ba;
Idsip ra Lâ Smasmalkra nani kau sinskira bâra ba,
baha smasmalkra ba kau sinskas sa!
¿Nahki muni man nani king fero ra wima:
“Yang nani lika sinskira nani kiamka,
blasi kingka nani luhpia sna”?
12¿Baha sinskira nani bri katma ba
nanara anira sa, king fero?
Nanara witin nani mai wibia,
apia kaka mamrikbia
karnika sut bri Gâdka,
Idsip dukiara dîa daukan ba sut.
13Saion kingka luhpia waitna nani ba sinskas sa,
Menfis ra wihta nani ba sin
witin nani ba tanis ra kunin munan,
tawan wihtka nani ba,
witin nani bui upla tâ briaia kata ba,
witin nani kunin munan yabalka bâk Idsip ra brih wan.
14Dawan mita spiritka ba aihka munan,
kupia turbanka baman takan
tanis tiwaia daukan witin nani ai tila kat,
bara witin nani Idsip ba aimawahkan,
kunin munan yabalka bâk brih auya,
bla kum aikabi, pirwi ba baku.
15Upla âpu, lal kabia, wâika kabia,
wahia kabia,
klisang kabia sapa, Idsip ra tâ baikaia.
16Baha yua ra Idsip uplika nani ba, mairin sibrinkira nani baku kabia; witin nani sirang iwi, sibrin man kabia, karnika sut bri Dawanka, ai mihta purara bukan kabia ba, witin nani ai mapara. 17Idsip ba, Juda tasbaya mawanra sibrinka bri kabia; sturka aisi ba wali baman sibrin takbia, karnika sut bri Dawanka ba mita, Idsip tani ra diara nani daukaia lukan bamna. 18Baha yua ra Hibru bîla ba Idsip tawanka tara matsip ra aisi kabia, bara witin nani Dawan ra swer taki aisi wibia; Dawan, karnika sut brisa. Tawanka tara kum nina ba Lapta Tawanka mâkan kabia.
19Baha yua ra Idsip tasbaya lila kat Dawan dukia altar kum daukbia, kuntri tasbaya piarkika ba kat walpa tara kum paskbia Dawan ra pain kulkan lâka yabaia. 20Baha ba sain kum, witnis sin kabia karnika sut bri Dawanka ra Idsip tasbaya ra. Witin nani Dawan hilp makabi winbia, witin nani ra rausasauhkra nani ba mapara, bara witin, baha nani ra swaki sasakra blîkbia, kan suni pri sâkbia dukiara. 21Idsip uplika nani ra Dawan ba param takbia bara witin nani bui kakaira takbia, prisantka nani sin daukbia; witin nani sin pramis daukbia Dawan ra bara dîa daukaia wibia ba kat sin daukbia. 22Dawan Idsip uplika nani ra klala yabia; klala yabia bara kli rakbia, witin nani Dawan ra ai kupia lakbia, bara witin nani ra ai kupia pihni ba marikbia.
23Baha piua ra yabal tara, param kabia Idsip wina Asiria ra waia ba kat. Bara Asiria uplika nani Idsip ra wabia, bara Idsip uplika nani sin Asiria ra balbia; baku Idsip uplika nani, Asiria uplika nani aikuki Dawan warkka daukbia.
24Baha piua ra Israel ba Idsip Asiria, aikuki asla taki, bara nisan nani ba sut purara yamnika bri balbia.#Bla St 12.3. 25Dawan, karnika sut bri ba witin nani ra ai yamnika yabia wibia: “Idsip ra wibia, yang upliki nani, Asiria ra, man ba yang mihti warkka nani daukri ba, bara Israel ra, man lika yang duki, man nani ra yamni mai munisna.”
Currently Selected:
Aiseya 19: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
