Blasi Sturka 6
6
Upla nani watawika lâka ba
1Baku kan upla nani ba mahka ailal pali tasba purara sahwi takan. Ai luhpia mairin nani sin baikan ba ra, 2Gâd luhpia nani ba kaikan, upla luhpia mairin nani ba mawan pranakira pali kan, witin nani ai laikka ba kat ai maya nani brin, ailalka nani ba tila wina pliki saki. 3Bara Dawan aisin: “Yang bui upla ba ban swirka raya kabia apia, kan kasak pali sika witin ba wîna baman sa, bamna ai yua nani ba mani 120 baman kabia.”
4Baha yua nani ra, upla tara yakura#Kul K 13.33. nani tasba ra bâra kan. Gâd luhpia waitna nani bara upla luhpia mairin nani wal prawan ba ningkara, witin nani ai luhpia baikan ba, baku tara yakura baman takan. Baha nani sika, blasi tasba almukka yua ba wina, waitna karnakira nani bal takata ba, waitna karnakira nani, ai nina tara kulkan ba.
5Bara Dawan kaikan upla nani watawika lâka ba tara pali kan tasba ra, upla nani ai kupia lukanka ra diara daukaia luki ba lika, kau saura dauki kaia ba baman luki kan. 6Bara Dawan sari takan, tasba ra upla paskan ba dukiara. Witin ai kupia ra praut lâka brin, 7bara Dawan win: “Upla nani yang paskri ba, tasba mawan wina diki âpu daukamni; upla bara daiwan nani sut ai biara purara kwasi tauki ba wina, pâli tauki ba kat sin sut. ¡Yang kupi sari takan sa, witin nani ba paskri ba dukiara!”
8Sakuna Dawan nakra nani ra Noa baman kupia yamni lâka ba alkan kan.#Mt 24.37; Lk 17.26; 1 Pi 3.20.
Ark watla ba Noa paskan
9Naha sika Noa rayaka sturka ba:
Noa sika waitna yamni pali kan, piua bani Gâd bîla wali dauki kan.#2 Pi 2.5. Witin ai piua ra raya iwi kan waitnika nani sut tilara witin yakan baman Gâd kupia lâka kat dauki kan. 10Bara Noa ai luhpia waitna nani yumhpa sakan: Sem, Cam, Jafet.
11Bara tasba ra upla ba Gâd mawan ra aisawan pali kan; watawi lâka krikaia daukanka sâtka ni banhwan kan. 12Bara Gâd tasba ba kaikan, aisawan pali kan. Upla bani tasba ra iwi ba watawi pali man dauki kan. 13Bahamna Gâd Noa ra win: “Yang pat lukri sa, upla nani ba âpu daukaia; kan tasba ba lâ krikanka lâka ba ni banhwan sa, witin nani ai tâka ba mita. Bara nanara kaiks yang bui witin nani ba, tasba aiska aikuki sauhki tikamna. 14Bamna man dukiamra, ark watla kum goper dusa ni dauks; watla ba pura kutbanka nani sin dauks, bara bîla, lata tani untika nani ba, awas mâka ni lasbi prakma. 15Bara watla ba man naku kulki mâki kama: yarika ba 450 pît, bîla yahpika 75 pît, bara 45 pît paknika. 16Ark watla ba uptis yumhpa paskma, windar kum 18 ins daukma, purara pâsa dimaika untika sin swima. Bara durka ba, utla tnaya ba ra mangkma, plurka sin yumhpa daukma, purara, lilara, mâyara. 17Bara kaiks yang lisamrika tara kum tasba purara brih aulna, tasba aiska ra lî sunaia blikuna diara rayaka bri bani ba sut sauhki tikaia dukiara, bara tasba ra iwi banhwi ba sut prubia. 18Ban sakuna, man wal lâika ba bapamni, bara ark watla ra man dimma, man luhpiam nani, mayam, bara luhpiam nani maya sin sut man wal dimbia. 19Baku sin daiwan nani sâtka sut tasba ra bâra ba wina sin sâtka bani ba maya wâl wâl ark watla ra dingks. Baha nani sin man aikuki ai rayaka bribia, wainhka bara mairin kabia. 20Tnawira nani sâtka bani ba sin, daiwan nani sâtka bani, ai biara purara kwasi tauki nani ba sâtka bani ba wina wâl wâl, man aikuki ark watla ra dimma, witin nani sin raya kaia ba mata. 21Bara piaia pata nani ba sin sut man bris, bara auhbi swis, man piaikam bara witin nani ai pata sin.”
22Bara Gâd bui dîa daukaia adarka win ba, baha kat Noa daukan.#Hib 11.7.
Currently Selected:
Blasi Sturka 6: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua