Blasi Sturka 40

Brit âiangkra bara wain lalaikra yaprisauhkan kaikan sturka ba

1Baha diara nani taki luan ba ningkara, wain glas ra lalaikra ba, king watla bilara king glaska ra wain laiki yabi kan pura kakaira waitnika ba, bara brit âiangkra nani pura kakaira ba, witin nani wâlsut ai dawanka Idsip kingka ba mapara kupia sauhkan. 2King fero ba ai kupia baikan baha waitna tara nani ba wâl ra: wain glas ra lalaikra nani pura kakaira ba bara brit âiangkra nani pura kakaira ba mapara. 3Bara waitnika nani ba silak watla ra suldiar kiaptinka ba ra blikan silak ra mangkaia. Baha pliska ra Josep sin silak ra mangkan bâra kan. 4Bara suldiar kiaptinka ba mita baha waitnika tara nani ba sin, Josep mihta ra mangkan, bara witin nani piua wihka silak watla ra bâra kan.

5Tihmia kum silak ra mangkan nani ba wâlsut yaprisauhkan kaikan, wain glas ra lalaikra bara brit âiangkra ba sin, kumi bani witin ai warkka tânka ba kat. 6Titan ra Josep witin nani ba kaikaia balan ba ra, kaikan witin nani wâlsut bâra iwi ai kupia wal aisi kan. 7Josep witin nani ra makabi walan:

—¿Naiwa na man nani mamwan na dîa kan ban sari sma na? 8Witin nani pana witin ra win:

—Yang nani yaprisauhkan kum kaiki banhri, sakuna tânka ba laki wan wiaia upla âpu bara baha luki sari sna.

Josep witin nani ra makabi walan:

—¿Dîa, Gâd bâra sa apia baha tânka nani ba param saki wan wiaia? Bamna man nani yaprisauhkan ra dîa kaikram ba ai wis.

9Bara wain glas ra lalaikra nani pura kakaira ba, witin yaprisauhkan kaikan tânka naku aisin:

—Yang yapri ra kaikri wain kiwka kum maiwanra bâra kan, 10bara kiwa ba wina awa yumhpa pâwi takan kan. Bara wain kiwka ba wina urhwi ai tangnika nani sakan, bara tangnika nani ba wina wain mâ nani taki kan, bara wain mâ pâwan pali baman takan. 11Bara yang mihti ra king fero wain laiki di ba kapka bri kapri, bara wain mâ nani ba brih glaska ba ra subi katna. Baha ningkara kli yang mita wainka kapka ba king fero mihta ra mangki kapri.

12Bara Josep witin ra win:

—Man yaprisauhkan kaikram ba tânka ba naku sa: wain kiwka wina awa yumhpa pâwi takan kan kaikram ba, baha tânka ba lika yu yumhpa. 13Yu yumhpa ba bilka ra, king man lâmka ba sut kli laki kaikbia, dîa tâwan silak ra mai mangkan ba. Bara baha ningkara, kli man warkkam taki kapram ba ra mai mangkbia. Bara man kli king fero wainka glaska ba ai mihta ra yabi kama, blasi warkkam bri kapram ba baku. 14Sakuna baha yamnika man ra takbia ba ra yang ra sin luki bas, kupiam pihni lâka ba yang ra sin mairiks, king fero ra yang dukira aisas, silak watla wina ai sâkbia. ¡Umpira ai kaiks! 15Yang na, Hibru nani tasbaya wina ai impliki nâra ai bri balan. Nanara yang nâra diara saura daukras kapri, kuna ban silak watla ra ai mangki ai swin nâra sna. Sakuna yang nâra ban kaia lika apia sna.

16Brit âiangkra nani pura kakaira ba wali kan, ai pânika yaprisauhkan kaikan tânka ba. Bara witin sin Josep ra win:

—Yang yaprisauhkan kaikri ba naku kata: brit pihni pân yumhpa laila ra suni bri kapri. 17Purara pânka bilara brit damni nani mangkan kan king piaia, sakuna tnawira nani balan bara baha king pata ba sut pi kan.

18Bara Josep witin ra sin win:

—Man yaprisauhkan kaikram ba tânka naku sa: brit pân yumhpa bri kapram tânka ba lika yu yumhpa. 19Bara yu yumhpa ba bilka ra, king fero man wauhkamtaya nani ba sin saki laki kaikbia dîa tâwan silak ra mai mangkan ba, bara witin adar yabia dus ra mai langki mai ikaia, bara tnawira nani bal mai pibia.

20Yu yumhpa luan ba ra, king fero aisubanka yua ba aimakan kan. Bara witin ai uplika tara nani ba sut aikuki lilia tara kum daukaia win. Bara witin ai uplika nani sut paiwan balan ba mawanra, king fero adar yaban wain glas ra lalaikra nani pura kakaira ba bara brit âiangkra nani pura kakaira ba sin silak watla ba wina saki bri balaia. 21Wain glas ra lalaikra nani pura kakaira ba kli ai warkka ra swin, bara witin kli wain glas ra laiki king fero ra yabi kan. 22Sakuna brit âiangkra waitna ba lika langki ikaia blikan. Josep mita ai yaprisauhkanka kaikan tânka saki win ba kat takan. 23Ban sakuna, wain glas ra lalaikra waitna ba Josep dukiara ai âuya lap tiwan, kli sin ai kupia krawras kan.

Currently Selected:

Blasi Sturka 40: MSKTU

Highlight

Copy