Blasi Sturka 34
34
Dina ra alki saura munan mana pana munan ba
1Dina, Lea Jekob wal luhpia mairin ba, yu kumi kirhbi tawan ra taki wan, tawanka ra mairin tiara nani ba kaikaia. 2Siquem, Hamor luhpia waitna ba, baha tasbaya wihtka aimaki kan, witin heveo ba, bara Dina bahara tauki kan ba kaikan, bara alki taibi munan lâka ra, witin wal yapan bara swira daukan. 3Sakuna witin baha daukan ba ningkara, Dina ra latwan pali kaikan. Bara swiaia apia lukan, bamna kasak maisa nihkan kupia alkaia. 4Bara Siquem ai aisika Hamor ra wan bara naku win:
—Aisa, man was bara baha tiara ba aisika ra makabi aik, yang mayi briaia sna.
5Sakuna Jekob sturi ba pat walan kan, Siquem ai luhpia mairin Dina ra alki saura munan, swira daukan ba. Sakuna ai luhpia waitna nani sut twi ra ai daiwra nani main kaiki kan bamna, witin diara aisaras sâp kan, baha nani ba balbia kat bîla kaiki kan. 6Lakrika nani ba kau balras kan ba kainara Hamor, Siquem aisika ba Jekob ra wan witin wal aisaia.
7Jekob luhpia waitna nani ba twi wina balan bara dîa takan sturka ba sut walan. Bara witin nani ai kupia baiki banhwan. Siquem, Dina ra taibi munan lâka ra wal yapan ba lika Israel mapara diara saura pali daukan. Baha daukanka saura ba lika daukaia apia pali saurka ba daukan. 8Sakuna Hamor witin nani aikuki aisi, bara win:
—Luhpi Siquem ba, man nani lamkra ba latwan pali kaikisa; bamna pliskam pali, man nani lamkra ba witin wal maya baiks, 9bara man nani yawan aikuki wan taya takaia, bara wan taya lâka ra, yang nani, man nani luhpia mairin nani ba brih aikuki mayi takamna, bara man nani sin yang nani luhpi mairin nani wal mayam takma. 10Naha kuntrika na man nani mihtam ra sa; wan tasbaya ra yawan aikuki iws bara warkkam nani dauks, tasba nani sin atki bris.
11Bara Siquem bui Dina aisika bara lakrika nani ra win:
—Yang bui man nani ra mamkabisna, man nani dîa want makabuma ba maikamna, bamna man nani âu wis. 12Lamkra mana lâ kat dîa kulki ba wina, kau pura lui ai kulkaia brin mai daukisa kaka sin ai kulks. Prisant nani ailal sin makas, baha sut ba yang maikaia wilin sna. Sakuna yang baman brin ai daukisa man nani lamkra ba swis yang wal mayi takbia.
13Ban sakuna, Siquem mita Dina ra swira tara daukan bamna, Jekob luhpia waitna nani pana, Hamor papika ra sin kunin munan, 14bara witin nani bui witin ra win:
—Yang nani laikra ba, waitna kum ai wîna ra Aisa sainka ba klaki mangkras waitnika ba ra sip yabras. Aisa sainka ai wîna ra mangkras waitnika kum, yang nani tili wina mairin briaia ba lika wan swira lâka tara kum sa. 15Sakuna naku dauki natka ra baman lika, yang nani âu mai wiaia sip sna: man nani sin, yang nani wîni ra daukisna ba baku, wînam ra daukaia wima kaka. Waitna nani sut man nani tilamra ba, ai wîna ra klaki Aisa sainka ba mangkaia. 16Baku daukma lika, man nani ba yang nani luhpi mairin nani wal marit takma. Yang nani lika man nani tilamra iwamna bara yawan aikuki asla kumi takbia. 17Sakuna yang nani lâika mangkisna na, wînam ra klaki Aisa sainka ba mangkaia ba daukaia apia wima kaka, yang nani naha wina mahka wamna bara laikra na sin brih wamna.
18Hamor ai luhpia Siquem wal âu win, witin nani lâ mangkan ba kat daukaia. 19Bara Siquem kau wihka bîla kaikras, mahka pali yaban witin ai wîna ra klaki Aisa sainka ba mangkan, Jekob luhpia mairin ba witin laik pali kaiki kan bamna. Hamor luhpia nani sut tilara, Siquem na kau kulkanka tara yabi kan taika nani ba mita. 20Baha ningkara, Hamor ai luhpia Siquem wal tawan getka ra wan, lâ aisaia watla ra, upla nani wal lâ aisaia. Bara witin nani tawan uplika nani ra win:
21—Baha uplika nani nâra balan ba, yawan wan uplika aihwa nani sa. Witin nani, wan tasbaya ra iwi bara ai warkka nani sin dauki kabia. Nahara tasba aitani tara nâra sa, witin nani iwaia. Yawan sin witin nani ai luhpia mairin nani wal wan maya takaia sip kabia, witin nani sin yawan wan luhpia mairin nani wal ai maya takaia sip kabia. 22Sakuna yawan ba witin nani wal baku asla kumi lâka ra iwaia sa kaka, witin nani lâ kumi baman bapisa. Bara yawan baha lâka ba daukbia kaka lika aitani lukbia, baha sika waitna nani sut wan tilara ba wîna tara ba ra klaki, witin nani Aisa sainka ba mangkaia, witin nani ai natka dauki ba baku. 23Baku yawan daukbia ba ra, witin nani ai dukia nani ba, ai daiwra nani ba sin sut, yawan wan dukia takbia. Yawan âu wiaia baman sa, bara witin nani wan tasbaya ra takaski yawan wan tilara yawan aikuki nâra iwbia.
24Hamor Siquem wal sturi aisin ba, tawan uplika nani sut kiama ra yamni walan. Tawan ra waitna nani sut, wahma nani sin pat aitani pâwan, war aiklabaia waia sip takan nani ba#34.24 Naha bîla na dîa ulban ba kat wisa: Baha nani sut tawan getka bâk taki auya ba. sin sut, dîa aisi ba daukaia âu win. Bara baha yua witin nani sut wîna tara ba klaki, Aisa sainka ba ai wîna ra mangkan. 25Bara Simian Libai wal Jekob luhpia nani, Dina lakrika ba, yu yumhpa luan ba ningkara tawan ra wan ai sordka ai mihta ra brih. Waitna nani ba, wîna taya klakan ba mita latwan pali bri kan bara sip ai kaina kahbras kan. Bamna witin nani mita sord ni baha nani sut ikan. 26Hamor bara ai luhpia Siquem ra sin sord ni ikan. Bara witin nani ba iki si, Siquem watla ra dimi ai lakra Dina saki brih taki wan. 27Jekob luhpia waitna wala nani ba sin ninara wan, pruan nani ba purak taibi lui. Ai lakra mana, witin nani dukia nani bri kan ba sut implikan. 28Sîpka, birikuka, bîpka nani bara dukia wala nani tawan bilara bâra kan ba, twi ra nani kan ba sin sut brih wan. 29Ai watla ra ai dukia nani bri kan ba sut impliki brin. Luhpia, maya mairin nani ba sin sut priski brih wan. 30Bamna Jekob bui Simian bara Libai wal ra aisi, win:
—Nanara man nani mita yang na pât ra ai mangkram sa. Nanara naha tasbaya dawanka, Kenan uplika nani bara ferezeo nani ba mita yang ra misbara ai kaikbia. Witin nani asla taki yang maipara bal aiklabia. Upla maura man brisna bamna sut wan ikbia, baku sin wan taya nani ba sin sut ikbia.
31Witin nani pana win:
—¿Witin bui yang nani laikra na mairin urkira kum ra baku kulkaia kata ki?
Currently Selected:
Blasi Sturka 34: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
