Epesus 2

Gâd latwanka lâka bâk swak takan lâka brisa

1Blasi man nani watawika lâka tâka saurka lâka tilara pruram katma. 2Bamna baha piua luan ra, man nani naha tasba daukanka saura nani ba nina bliki banhwi katma, bara pirit pâsa purara karnika bri ba bîla wali dauki katma, baha piritka sika Gâd bîla wali daukras nani tâ bri ba.#Epe 6.11-12; Kol 1.13. 3Piua luan ra yawan sut lika baha nani wal baku iwi kan, wan daukanka nani nina bliki kan, wan wîna tara bara wan kupia lukra brinka ba kat sin dauki kan. Baha mita klala saura pali Gâd wina ba, wan dukia kan,#Kol 3.6. sim wala nani wal baku. 4Sakuna Gâd lika umpira kaikan lâka tara pali brisa, baha mita witin yawan ra uya latwan wan kaikan, 5bamna yawan na Kraist wal aikuki asla raya kaia lâka ba wankan sa, kau wan saurka nani tâka mita pruan kan ba piua ra.#Kol 2.13. Baku bamna, Gâd latwanka lâka ba mita man nani sut swaki mai sakan sa. 6Bamna Gâd mita, Kraist Jisas wal asla pruan wina wan buki, witin ai tnaya ra Jisas wal wankan iwaia. 7Naha daukan ba ni wan marikisa, witin naika piua ra latwan tara wan kaiki kabia ba, bara yawan ra ai kupia pihni lâka ba lika Kraist Jisas ba mita baman. 8Bamna Gâd latwanka lâka ba mita sika, man nani swaki mai sakan ba kasak lukan lâka bâk. Naha tânka na lika, man nani mita dîa kum daukram ba mita lika apia, sakuna baha lika Gâd mita ban prisant maikan sa. 9Upla kum diara daukan ba mita lika apia, bara sin aimayunaia apia ba mata. 10Kan Gâd wan paskan; witin Kraist Jisas ra praki wan paskan, wark pain nani daukaia dukiara; diara nani sut ba kaina wina yawan wan dukiara pat ridi daukan sa.

Kraist latwanka lâka bâk swakwi takanka brisa

11Bahamna, piua luan ra man nani dîa sât uplika nani katma ba dukiara kupiam krauki bas. Man nani lika Ju nisanka apia katma; baha mita Ju nani, upla ra Aisa sainka dauki bara witin nani lika “Aisa sainka bri uplika nani” aisi ba mita man nani lika “Aisa sainka luha uplika nani” mai mâkisa. 12Baha piua man nani ba Kraist luha katma, Israel nisanka wina laihura kapram, bara Gâd bui Israel nisanka wal lâ nani bara pramis daukan ba sin kakaira apia katma. Naha tasba ra diara kumi sin kainamra bîla kaikras, Gâd sin luha iwi nani katma. 13Sakuna nanara lika Kraist Jisas wal asla mai prakan, bara Kraist pruanka ba mita, man nani laihura nani katma ba ai lamara mai mangkan. 14Kraist sika wan kupia kumi lâka.#Jn 14.27. Ju nani bara Ju apia nani ba wal upla daknika kumi daukan, waihla lâka kutbanka ba mita dakbi wan saki kan ba slingban bara Kraist ai wîna ra. 15Moses lâka ba mita adar nani bara dîa dîa lâka nani mangki yan ba,#Kol 2.14. sut baha kat takaskan, bara upla dakni sât wâl kata ba upla daknika raya kumi daukan, witin ra asla prakan. Bara baku witin mita kupia kumi lâka ba daukan. 16Naha natka ra, Kraist dus prihni ra pruan ba mita, baha upla daknika wâl pana pana aiklabanka bri kan ba, Kraist mita sut tiki, Gâd wal kupia kumi daukan, bara wîna tara kumi ra witin nani sut asla kumi daukan.#Kol 1.20.

17Kraist bal upla sut ra kupia kumi sturka yamni ba smalkan, man nani laihura nani katma ba sut ra, bara Ju nisanka sut, Gâd lamara kan nani ra sin.#Ais 57.19. 18Bamna Kraist ba mita, yawan Ju nani, Ju apia nani sut, Aisa lamara aula, Spirit kumi bri ba mita. 19Baha mita, man nani lika upla tringsar nani ai tasbaya pali ra iwras ba sâtka lika apia, sakuna man nani sut lika Gâd uplika nani wal aikuki sim kuntrika uplika nani sma. Man nani ba Gâd watla suliarka nani sma. 20Man nani ba utla kumi baku apastil nani bara prapit nani playa bapan ba purara mai paskan sa, bamna Jisas Kraist pali sika baha playa bapan walpaya kau tara ba.#Ais 28.16; Mt 21.42. 21Bamna Kraist baha playka ba purara utla ba ai pliska kat kat bapan, ban tawa tawa tempel holikira kum takisa, Dawan wal asla lâka ra. 22Baku sin man nani, Kraist wal asla takram ba mita, wala nani sut ba wal asla taki utla kum takram,#2 Ko 3.16-17; 1 Pi 2.4-5. bara Gâd bahara iwisa ai Spiritka Holikira bâk.

Currently Selected:

Epesus 2: MSKTU

Highlight

Copy