2 Korint 13
13
Kupia krauki bara prakaia lakula nani ba
1Bamna naha kat lika pat aima yumhpa yang na man nani ra aulna. Witnis wâl, apia kaka yumhpa bîla aisabia bara upla sut aitani lukaia sa.#Kli S 17.6; 19.15. 2Baha nani piua luan ra saura daukan nani ra bara upla sut ra sin wisni, nanara yang laihura sna na piua ra, aima wâl ra bisi balatna piua, man nani wînam kat kupiam kraukatna ba, kli kupiam kraukisna: kli man nani mai kaikaia wamna piua, umpira kaikan lâka âpu kamna. 3Baku mika kaikma Kraist yang bâk dîa aisi ba tânka. Bamna Kraist man nani wal pramis daukan ba lika swapni daukras sa, sakuna man nani ra ai karnika ba mamrikisa. 4Kasak pali witin ba swapnikira kum baku dus prihni ra saban, sakuna Gâd karnika ba mita ban kaia ra raya sa. Baku bamna yang nani sin witin wal asla swapnikira sna, kuna yang nani witin wal asla kamna kaka, Gâd karnika ra yang nani raya kamna man nani dukiam daukaia dukiara.
5Man nani laki kaiks wînam tânka ba aitani sma sapa, kasak lukan lâka ra aitani sma sapa kaikaia. ¿Kaikras sma ki Kraist man nani kupiam ra ba? Man nani ba kasak kristian apia kama lika, baha ba sip kasak lukras. 6Sakuna brinki sa man nani tânka brima, yang nani ba kuninkira apia sna. 7Yang nani puri sunisni, man nani diara saura kumi sin daukma apia ba mata, naha na yang nani raitki brisna ba marikaia lika apia, sakuna brin wan daukisa man nani diara pain dauki kama; wan kupia lukras man nani mampara yang nani raitki âpu kabia sin. 8Kan yang nani diara kasak ba mapara sip diara daukras, sakuna diara kasak ba tâwan aisi kaia lika. 9Baha mita, yang nani ani piua swapni takisna bara man nani karna sma ba ra, uya lilia banhwisna; man nani karna takma dukiara yang nani ban puri suni kamna. 10Kau man nani ra waras sna ba ra naha wauhkataya ulbisni, baku mika yang wamna ba ra, lâika ba lâ karna baku mai alkan kabia apia, baha lâka wan Dawan aikan ba man nani ba spirit lâka mapa ra maikrika pâwaia, âpu mai daukaia dukiara lika apia.
11Bamna nanara, muihki nani, rayakam aihwa takaia lâka pliks, maisa nihkan lâka bri bas, aikuki asla pain bara kupiam kumi bas. Bara kupia kumi lâka bara latwan lâka Gâdka ba man nani wal kabia. 12Kiawalanka holi kum ni pana lamkula dauks. Kasak lukan lâka ra wan muihni nani sut ba mita ai lakula mai blikisa.
13Wan Dawan Jisas Kraist kupia yamni lâka ba, Gâd latwanka lâka ba, bara Spirit Holikira wal asla kaia lâka sut ba sin man nani wal kabia.
Currently Selected:
2 Korint 13: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
