1 Pita 5
5
Lalukra nani ra kupia kraukanka nani ba
1Nanara man nani daknikam tilara almuk nani#Almuk nani: mani ailal bri ba mita almuk kaia sip sa, apia kaka wark kum daukaia yan ba mita baku almuk wisa, Ju nani natka ba baku kan (bors 2 ba). bâra ba kupia kraukanka yabisni, kan yang na sin witin nani wal baku almuk kum sna. Yang na Kraist pât wahwanka nani witniska sna, bara naika takaia prana ba witin nani wal aikuki asla brimna. 2Man nani mihtam ra Gâd sîpka nani mangkan ba,#Jn 21.15-17. sepad nani baku main kaiki bas; bara wilin pali dauki bas, Gâd want ba baku, taibi mai muni baku lika apia. Wark ba lalah brin mai dauki pali baku lika daukpara, kuna upla dukia daukaia want pali baku dauks. 3Baha nani mihtam ra mangkan ba purara dawanka baku kaia lika apia, sakuna tânka nani mariki bas daukankam ba ni sin. 4Baku bamna, Sepad Wihta ba balbia ba ra,#Hib 13.20. man nani kraun pranakira kum brima, bara baha ba lika ban kaia ra sip srawi luras ba.
5Baha sim natka ra, man nani wahma nani, almuk nani karnika munhtara bawi bas. Man nani sut kumi bani walkam munhtara bawaia sma; kan Ulbanka ra naku wisa:
“Prautkira nani ba Gâd mita batakisa,
sakuna bawikira nani ra lika
ai yamnika ni buki hilp munisa.”#S L 3.34; Je 4.6.
6Bamna, Gâd mihta karnikira ba munhtara bawikira nani bas, bara baku witin mita piua kat mai bukbia.#Mt 23.12; Lk 14.11; 18.14; Je 4.10. 7Trabilkam taki lukisma ba sut, Gâd mihta ra swis, kan witin lika man nani sut main mai kaikisa.#Law 55.22; Mt 6.25-34.
8Tânkira watauki bara aihwaki bas; kan waihlam dibil ba ya ya piaia wisi, layan ihbi baku pliki taukisa. 9Kasakkam lukan lâka kat bapi, witin mapara bûi bas, kan man nani kaikisma muihkam nani sut tasba aiska ra sim pâtka nani wahwisa. 10Sakuna piu wiria pât wauhram kabia ningkara, Gâd mita man nani ba aihwakira, dutki pali, karna kasak pali mai daukbia. Baha sim Gâdka sika yamnika nani sut wanki ba, bara ai prana ban kaia bara wan dukia briaia wan paiwan sa, Jisas Kraist wal asla. 11Witin ra karnika ba yan kabia, ban kaia ra. Baku kabia.
Prakaia lakula nani
12Silvano hilpka ni,#Ap St 15.22,40. witinka muihni kasakkira kum kulkisna ba, naha wauhkataya bîla prahni na mai ulbisna. Yang want sna man nani tâm baikaia bara witnis taki pali sin mai wisna: yamnika nani briram ba lika, Gâd latwanka tânka kasak ba sika. ¡Baha ba kat bapi bûi bas!
13Babilon#Babilon: Baha yua ra kristian nani kan ba, tila taim witin nani Rom dahra aisaia ba ra, Babilon nina ba yus muni kan. ra serts bâra ba, baha sin Gâd mita man nani ra baku bâk sakan ba, man nani ra lakula blikisa, bara luhpi Mark mita sin.#Ap St 12.12,25; 13.13; 15.37-39; Kol 4.10; Plm 24. 14Kristian latwanka ni pana pana lamkula wis kiawalanka kum wal.
Kraist dukia nani sma ba sut, kupia kumi lâka bri bas.
Currently Selected:
1 Pita 5: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
