1 Korint 9
9
Apastil kum lâka nani ba
1¿Yang na pri sna apia? ¿Yang na apastil sna apia? ¿Yang na Jisas wan Dawan ba kaikri apia?#Ap St 9.3-6; 2 Ko 15.8; Gal 1.11-16. ¿Yang Dawan wal wark takri mâ nani ba man nani apia? 2Ban kra upla wala nani mita apastil kum baku pain ai kulkbia apia; sakuna man nani lika pain ai kulkaia sma, kan Dawan ra lalukra nani ba sika kaikisa kasak pali yang na apastil sna.
3Baha nani yang nini aisi ba mapara naku aisisna: 4Raitki brisna diara piaia bara diaia aiki ba sin briaia, 5bara baku yang sin kristian mairin kum mayi brih taukaia, apastil wala nani dauki ba baku, Dawan muihnika nani sin, bara Pita sin. 6¿Apia kaka dîa lukisma ki, Bernabé yang wal baman upla nani main wan kaikaia rait brisa? 7¿Ya suldiar aimaki ai mana nani aibapi ba? ¿Ya mita wain nasla nani mangki baha wina dabras ba? ¿Ya mita sîp nani main kaiki, tialka laya subi ba wina diras? 8Bara luki banhpara naha na upla lukanka baman aisisna, kan Moses lâka ra sin baku wisa. 9Bamna lâ wauhkataya ra naku ulban sa: “Bîp wainhka plawar mâ taibi ba bîla, diara ni wilkpara.”#Kli S 25.4; 1 Ti 5.18. Gâd naku aisan, witin bîp bul nani dukiara lukisa baman lika apia, 10sakuna yawan dukiara lukisa, kan lâ ba yawan dukiara ulban kata; ani uplika tasba baiki ba bara plawar mâ taibi ba sin ai kainara diara briaia luki daukaia sa baha daukbia ba wina diara bribia. 11Bamna, ¿yang nani bui man nani tilamra spirit dukia mâ nani mangkri kaka, diara tara luki banhwisma ki, man nani wina wan wîna dukia nani wiria dâkamna?#Ro 15.27. 12¿Upla wala nani mita man nani puramra naku aimakaia sip sa kaka, yang nani kau lâ brisna apia?
Baha raitka yang nani brisna ba, baku daukras. Sakuna, naha sut ban twilki banhwisna, Kraist sturka yamni aisi smalkanka ba yabalka prakaia apia dukiara. 13Man nani kaikisma tempel warkka dauki uplika nani ba, tempel wina ai pata pîsa.#Kli S 18.1. Wibia kaka, baha nani altar ra sakripais nani dauki yabi banhwi ba, bahara daiwan nani iki sakripais dauki yabi ba wina, wîna ba pi banhwaia sip sa. 14Baku sin, Dawan lâ mangkan swaki sakan sturka aisi smalki nani ba, baha warkka wina ai rayaka bribia.#Mt 10.10; Lk 10.7. 15Sakuna aima kumi sin naha lâka nani wina yang brih alkras, bara man nani wina kra diara kum pan aikma sin mai ulbras. ¡Pruaia ni kau pain lukisna! Upla kumi mita sin naha liliaka brisna na mihti wina dakbia apia.
16Swaki sakan sturka aisi smalkaia ba lika, yang maipa ra aimayunaia dukia apia sa, kan yang baha daukaia sna. Sturi yamni ba aisi smalkras sna kaka, yang maipa ra saura pali kabia.#Jir 20.9; Em 3.8. 17Baha mita, kupi lukanka wina daukuna kaka, yang maina briaia sna. Sakuna ai taiban baku daukuna kaka, baku sin baha ba wark kum Gâd wina aikan sa. 18Baku bamna, maina brisna ba lika swaki sakan sturka mana luha smalkisna wina bara sin lilia brisna ba; smasmalkra warkka wina, diara briaia lâka brisna ba wina, diara kumi sin sakras kira.
19Upla kumi sin albika apia sna sakuna, upla sut albika takri sa, upla kau ailal Kraist ra bri balaia dukiara. 20Ju nani tilara sna piua Ju baku takisna, witin nani ba alkaia dukiara; wibia kaka, Moses lâka mununhtara iwi nani ba dukiara, yang na baha lâka mununhtara tawisna, witin nani ba win takaia dukiara, kasak pali baha lâka mununhtara apia sna sakuna. 21Baha sim natka ra, Moses lâka mununhtara iwras nani ba alkaia dukiara, witin nani baku takisna kasak yang na Gâd lâka mununhtara sna sakuna, yang Kraist lâka mununhtara sna bamna. 22Kasak lukan lâka mapara swapnikira nani ba aikuki sna piua, swapnikira baku takisna, witin nani ba sin alkaia mata. Wibia kaka, witin nani baku takri sa, baku ban kum kum pan swaki sakaia dukiara. 23Naha sât swaki sakan sturka daukisna, baha yamnika nani wina yang sin duki briaia dukiara.
24Man nani kaikisma si plapanka kum ra sut plapisa, sakuna kumi baman prisantka ba brisa. Bamna plapi bas prisantka ba briaia praiska alkma ba kat. 25Pulanka kum ra win takaia ridi taki nani ba, dîa dîa ai wîna ra saura munaia sip dukia nani ba wina tnaya ra taukisa. Bara witin nani baku daukisa, pura luan prisantka kum pat aisawi ba briaia dukiara; sakuna yang nani lika aisawras prisantka kum briaia dukiara pât takisna. 26Yang pali lika blain baku plapras; pâsa ra pruki baku lika yang aiklabras. 27Sakuna, wîni tara na rausauhkisna bara taibi munisna bîli walbia, baku mika yang bui upla wala nani ra smalkisna tâinka ba aihwa apia ai kulkbiara sîa.
Currently Selected:
1 Korint 9: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
