Romu 6

Sarueko ta vou melai omadeu elo Karisito sase ta saevo

1Sole noi nio anime kimevo avo mata? Animeta mebeta elo sarueko kale tu vo Baṉara ko pakiezato sama roquano ta ko rapuko, kio? 2Maba pui! Animeta lula vou mela jari sarueko vasia rana sole soa saevo inio mebeta elou? Maba pui! 3Ako meta meqai uria nianiia so keru anime lula omadeu me eve keru Jisu Karisito sase voko bapitaiso kale, so keru inio animeta mata bapitaiso me eve voko voukale. 4Ni animeko bapitaiso elo kale animeta meqai zomana voko mutailo, tu vo Karisito ko mata saevo voukale azo vo Mama ko ṉaṉaidara kama pizato kale, animeta mata so jaria saevo me elou vairu ama saevo kale.

5Ako animeta lula omadeu me eve vo sase voko voukale, so sole so jaria omadeu mata me elou vo sase animeko mata saevo voukale azo kale vo jari. 6Ako animeta meqai nianiia komi quli sole, ko animeko lulama saevo ta lula ko zomane vo Karisito ko vou sase korosi topi, tu animeko lulama saevo ko sarueko ta pizato pide ko elo, tu animeta pui sarueko ko mabaku me elou. 7Ako vo maba o vouva keru, so keru inio o rupasia sarueko ko pizato kale azo. 8Animeta lula me vouvani mela vo Karisito sase, so sole tuvevo me iko ko animeta mata me jaevou vo sase. 9Animeta me vakakuka ta vo Baṉara ta lula o saevive vo Jisu voukale azo, ni vota mata pui opa tova vouvou. Ko vou ta pui lekasa kopa va elou. 10Nio so inio, vota o vovi, ni vota o koqotaeke ko sarueko ko pizato, ni erisaṉa vota omadeu saevo o eva vo Baṉara sase. 11Sokale avo meta kerukeruekomo ko meta vou mela jari inio sarueko vasia rana, melai mata omadeu saevo me eva vo Baṉara sase vo Jisu Karisito ko saevimelo kale me.

12Meta pui zarieko ko sarueko tu kota lekasa ko elo meko miduku kale ama saevo kale, ni meta pui zoriko ko sarueko ko vatolo kikolani. 13Meko pado ama saevo ta pui katiko ko sarueko tu koa sarueko ta kokai iruruputo ruqe ama kerukeru ni kalo kale. Melai meta katiziomo me ṉavi vo Baṉara kasi ako meta mata me jaevani mela sole voukale azo, ni meta katikomo meko pado ama saevo tu kai iruruputomo ko vo Baṉara ko sidopu ama kerukeru ni kalo kale. 14Koa sarueko ta maba pui ko lekasa puilou meko saevo kale, ako meta pui bazu ko poro kale me evani mela sole, melai meta me eva vo Baṉara ko pakiezato sama roquano kale.

Animeta sidopu ko mabaku mela

15Sole, noi nio? Animeta me jaruekou, ako animeta pui bazu ko poro kalea mela, melai vo Baṉara ko pakiezato sama roquano kalea mela sole, kio? Maba pui ti pui! 16Ako meta lula me baqumuka ko meta kama mabaku mela inio kio meko zoriko kale kala maba kiolani, so sole meta voa lekasa vo meme zorivani ko mabaku mela inio. Kake mela ta ko sarueko ko mabaku mela inio, ko vou sama, kake mela ta zoripato ko mabaku mela, ko sidopu ko imelako me vo Baṉara ko kelokelozato kale. 17Melai aṉata a ilusiva vo Baṉara, ako kuleto meta ko sarueko ko mabaku mela melai erisaṉa meta lula me zorika meko pado ama bulo sate koa tuveano sama nianiiekato ko me viqema. 18Meta lula meda rupasia sarueko kale azo ni erisaṉa meta lula ko sidopu ko mabaku meda eva. 19(Aṉata aqai pesia koa olu ama pesio meme uria paqumukake, ako meko paqumato ta lekuleku sole.) Kuleto meta me uria katiziovi tu pauvezato ni ruqe ko mabaku me eve tu ruqe ama iruruputo kaqe. Ni so jaria uria katizio emo erisaṉa sidopu ko mabaku elo kaqe tu Baṉara ko tabu ama iruruputo kaqe.

20So keru me ko sarueko ko mabaku me eve keru meta pui sidopu ko mabaku mela inio. 21Loma ikio meme qoema meko ereko kale koa iruruputo, ko erisaṉa ko quratimelako me? Koa iruruputo ko reketekete ta vou sole! 22Melai erisaṉa meta lula meda rupasia sarueko kale azo ni meta vo Baṉara ko mabaku mela inio. Ni meta tabu meda eva meko saevo kale vokasi, ni koko reketekete ta noqola kama saevo. 23Ako ko sarueko ko reketekete ta vou; melai vo Baṉara ko tatabara pide ama katizato ta noqola kama saevo tu animeta omadeu me elou vo Jisu Karisito sase vo animevo Lekasa.

Currently Selected:

Romu 6: BLBNT

Highlight

Copy