Maka 13

Jisu kai pesio Jelepade ko biresuko

(Matiu 24:1-2; Luke 21:5-6)

1Ni vo Jisu ta o vaekake koa Jelepade ni kala vovo disaipeli ta eri kiolake, “Keatini, tanala, aqasiele koa pade ni koko lado!” kiolake.

2Nio Jisu ta o vati tiorikake ni eri va kiolake, “Ṉota ṉobe kea koa pade ko ṉaṉaidara, kio? Melai puliama ka pado lado ta kopa loilou ko ṉaviko zaekale, melai koa kiadama ti kana madu inio ke biresukou,” kiolake.

Jisu ke luluevo amu ta ke toraekou ko tapata ni olaquavo

(Matiu 24:3-28; Luke 17:22-24; 21:7-19)

3Ni vo Jisu ta ota papuake Olive Ore sama Sopu kale Jelepade kasi vasia lilito. Nio vo Pita ni vo Jemisi ni vo Jone ni vo Aduru ta keva olake vo moizavole, ni eri kikelake, 4“Ṉelai bazueka noi keru inio koa Jelepade ko biresuo, ni noni ama mamola ikio ko ereilou nio ko mamola puekou koa kiadama quli ko ereilo?” kikelake. 5Nio Jisu ta eri kiolake sekasi, “Meta vailomo ni pui zarievo kala tu o saruemelou me. 6Ako matu kubo maba madu inio ke kilou ni eri kikevou, ‘Aṉa inio voa Pakio vo Baṉara o pitoeveni lala!’ kikevou, ni ke saruemou matu kubo maba madu. 7Ni so keru meme viqou keru ko matuma pazokinio ko bazu ni ke ṉavio kude kanaekinio ko bazu melai meta pui me ṉalou, ako ko quli poso ta kota ereilou inio sole, melai pui ko ikio peuru ma peuru ko paitopaito. 8Ni matumatuma peuru poso ta ko kati pazokiniou kama edoloma matumatuma peuru poso, ni toutou poso ta kokai kasakeovou kama edoloma toutou poso, ni nunu ta ko elou komia kiadakoi. Melai koa kiadama quli ta ko rekoreko kai tanito meqora kai alilo ko tola jari pala inio.

9“Ni meta me ṉavi nio me balauvou. Ako seta ke noqoemelou, ni ke melati ziovou titizikinio kale ni seta ke pazomelou ilusato ko pade kale ni ke lojoemelou me se Lekasa poso ni Qavuna madu ko tanama kale, ni so inio meta meqai bazutou ko Uri ama Bazu sekasi. 10Melai puliako peuru ma peuru paito nio ko Uri ama Bazu ta ko pikairiovou kiadama peuru ma peuru kale ama qoqono poso kasi. 11Ni so keru seke noqoemelou keru, ni ke melati ziovou keru titizikinio kale, meta pui tiṉoliṉoli meqai elou ko noi nio me kimevo avo kio seke melai kuirikani me ko ruqe kasi. Melai so keru taku ko barolou keru inio meta me qasekou koa pesipesi meko kerukeru kale ko kilo ama, ako pui me ṉaviko kerukeru kale inio meba pesiovou sole melai vo Tabu ala Auvana inio o pesiovou mekale kude. 12So keru inio kaka poso ta ke luavimou seko visi poso aṉa ke tuvevo puelani tu ke titiziovou ni seko kana madu ta ke vouvaemou, ni se mama kamu melai ke luavimou seko meqora poso aṉa ke tuvevo puelani tu se melai ke vouvaemou, ni se meqora poso ta ke kanaekimou seko niania ni mama poso aṉa ke tuvevo puelani tu se melai ke vouvou, 13kiadama maba poso inio ke melai kaikuapou, ako meta aṉa me luluelani mela sole. Melai vo o pizato ala ti obeta barolo ala koa taku ko paitopaito kale, vo inio o pakiovou.”

Kana madu ke iko avo biresuko Jerusalema peuru

(Matiu 24:15-28; Luke 21:20-24)

14Ni Jisu ta mata eri kiolake sekasi, “Meta me qelou ṉaloṉalo ama kapakapato ko quli ko ke lojoeko ama Jelepade Tabu ama Zaekale, sai pui ko maleakoi.” (Ni meme diromikoa mela komia pesipesi ta uria paqumukomo ko kikolani.) “Ni me Jiudia rana mu mela me qelou keru koa kapakapato ko quli meta me joqoilou sopu poso kale. 15Ni ṉo ṉobeta eloa laṉa ṉoko pade ko okate ta pui ṉoqai ubaitou saqoro kovole ṉoko lomaloma pade ko poro kale ama. 16Ni ṉo ṉobeta eloa laṉa ṉoko kiaro kale ta pui ṉoqai ubaitou saqoro pade kasi kovole ṉoko suma. 17Matuma duki sama quli se molu ama niania poso kasi ni se molele meqora samu kasi ko ereilo ama koa taku kale! 18Sole meta vararaitomo vo Baṉara kasi tu meko soqoilo ta pui sarosaroro keru ni pui Sabati ṉaniu keru ko elou. 19Ako komia tapata ta matu ruqe ama ko elou kobe kai paloasou kiadama lulavo ama tapata vo Baṉara o ereke keru azo komia peuru ma peuru ti kobeta baroa vairutu. Ni tova ta mata pui kopa ereilou soama quli. 20Melai vo Baṉara ta lula o vatoeka tu puju o ikou koa matuma tapata ko taku, melai vota pui puju o ikou tea, puliala inio opa saevo. Melai voko pitopito ama maba poso ko tauvemo kale avo inio Baṉara ta puju o ikou koa taku.

21“Ni kala ta eri kiovou so keru, ‘Keatini, nei nio voa Pakio vo Baṉara o pitoeveni!’ ma ‘Unei nio vo!’ kiovou melai meta pui tuvevo me ivou. 22Ako se lipalipa kama Pakio vo Baṉara o pitoemeni kikelani, ni se lipalipa kama poropita madu ta ke podakou ni ke erekou aqasiele ama quli ni ṉavaṉavala kama quli tu ke saruemo se vo Baṉara lula o pitoemeni, kebe mai roveovou ta. 23Melai koa kiadama quli kio aṉa a melai bazuekako puliako taku barolo. So sole meta vailomo,” kiolake vo Jisu.

Aṉa maba a eveni lala ko tova vaito

(Matiu 24:29-35,42-44; Luke 21:25-28)

24Ni vo Jisu ta obeta olake pesio ni eri kiolake, “Ni koa tapata poso ko tova nio vo ṉaniu ta kutumana ota elou, ni kaboso ta pui opa talolou, 25ni ko suti ta kota pialou aukale azo, ni ko aukale ama quli ta kota vezovezokatou. 26Nio komi quli ko tova inio aṉa maba a eveni lala ta a buratou, ni a qilou aukale ama leikale ni se maba poso ta ke lelou aṉa aṉako matuma pizato ni ṉaṉaidara sate. 27Ni aṉata a joroemou aṉako mateana madu komia peuru ma peuru kale, ni seta ke padoemou aṉako pitopito ama maba poso kiadama zaekale azo,” kiolake.

Vo piqi ore ko kalo

(Matiu 24:32-35; Luke 21:29-33)

28Ni vo Jisu ta mata eri kiolake sekasi, “Aṉata mata a melati nianiiekikou vo piqi ore ko kalo. So keru voko kata ko vezupa keru ni voko leko melai ko korokoro puta keru ti mebe kai nianiia inio ta koa taku kiadama quli ko qotupo ko ta sipole inio. 29Ni so jari nio mata so keru meme qelou keru kiadama quli ko aṉa a melai bazuekako aukale ko ereilo ama quli, meta meqai nianiiovou ta koa vaini ama taku vo Baṉara ko lekasa puo ko ta sipole kota barolou. 30Ni aṉata mata a bazuemela me, komia kiadama quli ta ko ereilou puliako erisaṉama maba madu vou. 31Au ni miduku ta kota ruvurou melai aṉako bazubazu ta maba pui ti pui kopa ruvurou,” kiolake.

Puliala maba ta okai nianiia aṉa maba a eveni lala ko tova vaito

(Matiu 24:36-44)

32Ni vo Jisu ta mata eri kiolake sekasi, “Puliala maba ta okai nianiia koa ṉaniu ni taku aṉa maba a eveni lala a vaitou keru, se aukale ama mateana madu melai pui kekai nianiia, ni aṉa Baṉara vo Meqora lala melai pui aqai nianiia, melai aṉavo Mama Baṉara o kiada inio okai nianiia koa taku. 33So sole meta vailomo ni inainaomo, ako meta pui meqai nianiia sole koa taku ko barolou keru. 34Ni koa vaito ta omadeuvo vo o lipilipitani maba jari, vo omai vaekeni voko nabulu poso seke ereko ama iruruputo ni o bazuevake veutu o kati vailani tu o vailou. 35Sole meta vailomo, ako meta pui meqai nianiia sole koa taku aṉa a vaitou keru, omadeuvo sea nabulu poso jari pui kekai nianiiani vo pade ko tanala o vaitou keru. Esa raisiraisi ma ipu tiania ma vikale. 36Meta pui maroṉo, ako aṉata a vaitou ota podolo ama taku kale sole. 37Komi quli aṉa a melai bazuekako quli aṉako disaipeli madu mela kio mata abe mai bazueka sea kiadamu se aṉa ke luluelani, ni eri nio mela kiala: Meta vailomo!”

Currently Selected:

Maka 13: BLBNT

Highlight

Copy