Luke 23

Seko vati zio vo Jisu Paelati ko kuleto

(Matiu 27:1-2,11-14; Maka 15:1-5; Jone 18:28-38)

1Ni koa pado ama vaki ta ko zolaike ni ke vati olake vo Jisu voa Romu ala Qavuna Paelati ko kuleto, 2sai se kevai utu tanitekoi kuiripato saṉa ivo vo Jisu ni eri va kikovekoi, “Lula ṉe vea nea maba ta o saruema odiemo animeko maba madu, vota o naquema tu seta pui ke tabariko ko takisi vo Romu ala Matu Lekasa kasi ni o kaseka ta o ṉavi nio voa Pakio vo Baṉara o soroevani, ni vota kala aikovakova inio kiolani,” kikelake.

3Nio vo Paelati ta o kuimaevake vo, “Ṉo inio se Jiu amu vo Aikovakova ṉa kio?” kiolake. Nio Jisu ta o vati tiorikake ni eri kiolake, “So ṉo kiṉolani tisoiko,” kiolake.

4So sole Paelati ta eri kiolake sea raura kama siama madu kasi ni sea matu padopadoilo kasi, “Aṉata pui ada va kea kama sarueko nea maba tu vota kuiripato saṉa o elo,” kiolake.

5Melai seta kevai matu titiake vo Paelati ni eri kikelake, “Voko nianiiekato kale inio ko niumaniumato ko kerukeru ta lula ko tanita kiadama maba kasi se Jiudia peuru poso kale ke evani maba poso kasi. Vota o tanieke Qalili peuru poso kale ti obeta baroa koi vairutu,” kikelake.

Jisu ko vati zio Herodi kasi

6Nio so keru Paelati o viqa keru ko quli, inio vota o kuimaemake se ni eri kiolake, “Sole nea maba ta Qalili ala maba inio, kio?” kiolake. 7Ni seta ke bazuevake ta Jisu ta o kuevani Herodi#23:7 Ṉota kea Herodi Anitipasi dikisonare kale. o kati vailako zaekale azo kio, nio vota o soroevake Herodi kasi, vo obeta evani koa taku kale Jerusalema peuru kale. 8Ni Herodi ta ota matu zoleike so keru vo o veve keru vo Jisu, ako vota lula ota va viqe voko bazu ni lula o tareve rosi ama taku tu o velo sole. Ni vota oka zariake tu tava kelo vo Jisu ko aqasiele ama iruruputo ko ereko sole. 9So sole Herodi ta o kuima-kuimaevake vo Jisu, melai Jisu ta puliama opato o erekake. 10Nio se raura kama siama madu ni Mosese ko Bazu kekai nianiiekatani ta ke lojoake nioqako sipole ni seta ke erekake matu piza kama pesio vo Jisu kevai sakesakekema. 11Nio Herodi ni voko solodia madu ta kevai balebaleitake ni ke zarazaraevake vo, ni seta kevai kiakake ko ileile ama rosia sabosabo ni ke vaitoevake Paelati kasi. 12Nio koa ṉaniu kale pado inio Herodi ni Paelati ta qo baerebaerekiniake, lulavo nioqata kana pare kidi sole.

Jisu ta o vouvou

(Matiu 27:15-26; Maka 15:6-15; Jone 18:39—19:16)

13Ni Paelati ta o padoemake se raura kama siama madu ni lekasa poso ni maba poso, 14ni eri kiolake sekasi, “Meta me vati kueva nea maba aṉa kasi ni me qaseka ta vota o saruema odiemo se maba madu kimela. Inio aṉata lula a quimakuimaeva koi meko tanama kale, melai aṉata pui ada va kea kama saruilo, ko me kuiripato saṉa mevai ikako vo. 15Ni Herodi melai pui ota va kea ko sarueko vo o erekako, Sokale avo inio vota o vaitoeva mata anime kasi. Nea maba ta pulia quli o sarueka sole pui o male tu vouvaevo. 16So sole aṉata a bazuemou se solodia madu tu ke sisiparu puevou pala ni a zarieva tu o rupasio,” kiolake.#23:16 Kama lulavo ama Quriki pesio kale ama riki kale ta ko kati paquliovi vesi 17, eri: ‘Ako kiadama Alokato ko Ṉojola keru vota oma rupasiva kala pirito pade kale o evani.’

18Melai koa matuma vaki ta ke matu upaupatake ni eri kikelake, “O vou voa maba! Ni ṉela rupasiva vo Barabasi!” kikelake. 19(Voa Barabasi ta o evake pirito pade kale ako vo ni voko vaki ta ke ereke ko niumaniumato ni pazokinio Jerusalema seko vati pikipikinio puto kale vo Romu ala Qavuna, ni vota kala vouvato ko maba sole.)

20Melai Paelati ta ova zariake rupasivo vo Jisu, so sole vota mata o mati pesiake se tu vo Jisu ta o rupasio. 21Melai seta ke velavelaoke matuma kora kale ni eri kikelake, “Patoevomo korosi topi tu o vou! Patoevomo!” kikelake. 22So sole Paelati ta eri kiolake sekasi zouke ama taku kale, “Melai loma quli sarueko ikio nea maba o erekako? Aṉata pui a rovea tava kelo kama quli vo o erekako koko malezikako tu okai vou! So sole aṉata a bazuemou tu ke sisiparu puevou pala ni ke rupasivou vo,” kiolake.

23Melai seta matu ti matu velavelao keta evake tu Jisu ta o patoilo korosi topi, nio vota o zorikake seko velavelao kikolani jari. 24Nio vo Paelati ta oma zariake tu seke pasekako quli vokasi ta ko ereilo. 25Ni vota o rupasivake voa maba se keva zariovini, vo lula pirito pade kale ke vaeveni voko niumaniuma ni vouvato kale avo, ni vota o vaevake vo Jisu se solodia madu ko ṉase topi tu ke vati lulueko se Jiu mu keka zariani ivo vo.

Jisu ko patoevo korosi topi

(Matiu 27:32-44; Maka 15:21-32; Jone 19:17-27)

26Ni se solodia madu ta ke vati olake vo Jisu, ni se kebeta ola keru, inio seta ke toraevake kala maba Sairini peuru kale azo ala o ṉi ta Saimone, vo obeta kuevani kama sasa peuru kale azo Jerusalema matu peuru kale. Ni seta ke saputivake vo ni seta kevai sakekake Jisu ko korosi o vakare topi ni seta kevai zuruzuruekake tu o boriko ko ni o vati lulueko vo Jisu.

27Ni matuma vaki ta ke luluevake vo Jisu, ni kama rekoreko poso melai ke lulupatake se sate se keva ziavini ni keva ziaroreputani vo. 28Nio Jisu ta o lilitake sekasi ni eri kiolake, “Jerusalema ma rekoreko poso mela! Meta pui la zialo aṉa, melai ka ziamo me ṉaviko saevo ni meko meqora poso. 29Ako ko taku ta ko kilou so keru maba poso eri kikevou keru, ‘Ke zoleiva tisoiko se meqora pide ama rekoreko poso, ni padu amu, ni se pui ke niaemani ko susu!’ 30Ni koa taku kale inio mata se maba madu eri mata kikevo avo ko matuma sopu poso kasi, ‘Piamo eṉe topi!’ ni ko silo ama sopu poso kasi, ‘Daipaeṉelomo eṉe!’ kikevo avo keru. 31Ako seta ke erekou soama quli ko saevoma ore kasi, loma quli kio ko ereilou vouma ore kasi?”#23:31 So ka kiovema ta o ṉavi Jisu ta saevola ore ni pulia quli o saruekani, melai inio Baṉara ta pui o pakieva, so sole se Jiu matu qoqono se vouma ore jaria sarusaru amu inio ko matu ti matuma ruvuro ta se tona kota kilou.

32Ni omuqa maba kidi, nioqata ruqe ama maba kidi, ta ke kati olake tu nioqata qo vou Jisu sase. 33Ni seta ke baroake “Reikareika kama Lezu ko Zae” ka kikelako zaekale, ni seta ke patoevake vo Jisu sai korosi topi. Ni so jari seta ke patoekake omuqa ruqe ama maba kidi omuqa korosi topi Jisu sate, kala ta voko palo rana ni kala pado ta voko made rana vasi. 34Nio Jisu ta eri kiolake, “Mama, ṉota tama akoeka se komia ruqe, ako seta pui kekai nianiia seke erekako quli sole,” kiolake.

Ni seta kekai puarikiniake vo Jisu ko suma seko kai daisimato kale. 35Ni se maba madu ta ke lojoake sai ni ke toiritoirizatake, ni se Jiu ama tanatanamu ta kevai balebaleitake vo, ni eri kikelake, “Edolomu inio o pakiemani, vaeka tu o pakizio o ṉavi voa Pakio o elou ta, ni Baṉara o pitoeveni o elou ta!” kikelake. 36Ni se solodia madu melai kevai balebaleitake vo, ni seta kevai olake ni ke kativake ko paza kama vaini ko ju, 37ni eri kikelake seko vai balebaleito kale, “Jiu amu vo aikovakova ṉo elou ta, pakiovi erisaṉa ṉo ṉavi!” kikelake.

38Ni voko lezu ko topi vasi o korosi topi ta ke patoekake riki sama papani eri kikolako pesio sama, “Nei nio se Jiu amu vo Aikovakova,” kikolako.

39Ni kala pado nioqa ruqe ama maba kidi azo sai obeta soilani o korosi topi ta ovai ribaribatake vo Jisu, ni eri kiolake, “Ṉo inio voa Pakio ṉa kiṉola, kio? Sole pakiovi ṉo ṉavi ni eqe!” kiolake.

40Nio kala pado, vokale ala, ta o riqaevake vo ni eri kiolake, “Pui ṉoda va paṉaova vo Baṉara, kio? Ako ṉo melai ṉo qoa omadeuvo vo o koako tapata jari ama. 41Ni aniqeta qe koa ko aniqe lula qe erekema ruqe ama iruruputo ko male ama reketekete, melai nea maba ta maba puliama voko sarueko sala inio,” kiolake. 42Ni vota eri kiolake Jisu kasi, “Jisu, kerukeruela aṉa so keru ṉoṉo barolou keru ṉoko lekasa puo kale!” kiolake.

43Nio Jisu ta eri kiolake vokasi, “Tuvevo avole aṉata a bazueṉa ṉo ta vairutu inio ṉota ṉo zomanou aṉa sase Paradaisi kale,” kiolake.

Jisu ko vou

(Matiu 27:45-56; Maka 15:33-41; Jone 19:28-30)

44-45Ni ṉadale inio ṉaniu ta ota kutumanaoke ni kutumana ta ko boulukake koa Jerusalema ko pado ama levoano,#23:44-45 koa Jerusalema ko pado ama levoano: Komi ko Quriki pesio ta ikoana mata omuqama koko pepepepeli ta ‘kiadama peuru ma peuru kale.’ zouke aoa tiniavo, ti kobe kai baroake matu sebiviuru keru. Ni ko suma otu Jelepade kale ko evako ta omuqa teze kota evake. 46Nio matuma kora kale inio vo Jisu ta eri kiolake, “Mama! Noko ṉase topi nio aṉata a vaeka aṉako auvana!” So kiolake ti obeta utupake inio.

47Ni se solodia madu vo kuleto ala ta o keake koko ereima quli, ni vota o ilusivake vo Baṉara ni eri kiolake, “Koe, tuvevo avole nea maba ta sidopu ala!” kiolake.

48Ni so keru sea maba poso se lula ke padoini keazakeazatole ta ke keake ko quli ko ereivako sai, sea kiadamu ta keta vaitavaitaitake ke zae poso kale, ni seta ke pazokake ke dumidumi poso seko upotuqu kale. 49Ni sea kiadamu se kevai nianiiani vo Jisu, ni se rekoreko ke lulueveni vo Qalili azo ta ke lojoake vaṉa vasi ni ke kati vailake ko quli ko ereima.

Jisu ko mutavo

(Matiu 27:57-61; Maka 15:42-47; Jone 19:38-42)

50-51Ni kala maba ta sai obeta evake o ṉi ta Josepa vo o kuevini Arimatia peuru kale azo, kota kama pado peuru se Jiu amu ko. Vota kala uri ala maba ni sidopu ala maba, vo o tarekeni vo Baṉara ko lekasa puo ko kilo. Vota kala se Jiu ama tanatanamu ko Kauniseli kale o zomanani vo pui opa ka zariovini se Kauniseli madu ko pitoto ni iruruputo. 52Ni vota o amaqeake Paelati ko kuleto ni vota opa pasekake Jisu ko tupu vokasi. 53Ni vo Paelati ta ova zariekake vo Josepa nio vota opa ivikake koa tupu, ni vota o sudekake matu uri ama suma kale, ni opa vaekake niami keaka kale lado kale ko teliziovima puliala maba lula okai mutaivako. 54Koa ṉaniu ta Sabati ṉaniu ko ka inainao ko taku keru Porare ṉaniu, ni Sabati ta sipole kota baroake.

55Ni sea rekoreko seke lulueveni vo Jisu Qalili azo ta ke olake Josepa sate ni kepa keake ko keaka ni Jisu ko tupu ke ikevoa tekueko sai. 56Ni seta ke vaitake ke pade kasi ni ke inainaekake kama uria tui kama lumu ni bube tu vo Jisu ko tupu kaqe. Ni seta ke luluekake Mosese ko Bazu kikolani jari sole seta ke mamazake Sabati ṉaniu kale.

Currently Selected:

Luke 23: BLBNT

Highlight

Copy