Luke 14

Jisu ko urikivo kala vere ala maba

1Ni kama pado Sabati ṉaniu kale inio Jisu ta o zomanake vuato kala Parese madu vo kuleto ala maba ko pade kale, ni se maba poso ta kevai vilumuake vo Jisu tu keta va kelo kama saruilo kikelake. 2Ni kala pado maba voko omuqa kiti ni omuqa palopalo kota va tubuani ta o kuevake Jisu kasi, 3nio Jisu ta o kuimaemake se Mosese ko Bazu kekai nianiiekatani ni se Parese madu ni eri kiolake, “Animeko bazu ta ko zariekake ikio ko urikato Sabati ṉaniu kale, ma pui?” kiolake.

4Melai seta pulia quli ka supi ke kasekake. So sole Jisu ta o odievake voa maba ni o urikivake ni o viuruevake vo. 5Koko tova inio vota eri kiolake sekasi, “Kala mevo meqora ma kama pado meko bulumakau ta ko jourou soqili kale Sabati ṉaniu kale, ta noi nio, pui meba koivievou tu me jaqorivou koa ṉaniu kale ako Sabati ṉaniu sole kio?” kiolake.

6Melai seta pui ke opatikake koa kuimanao.

Zarazarailo ni puaropuaro sama baroekato

7Ni Jisu ta o meake kake seke taipaziani ṉojola kale seko pitoeko qulepo ama zae poso, so sole vota omai bazuekake sea kiadamu kama pado podepodeti, ni eri kiolake,

8“So keru kala o taipaziṉou keru ṉo bau vuato kale, ta ṉota pui ṉo biluilou papu qulepo ama zaekale. Ako esa ṉo azo vo raura kala melai lula o taipaziani nio sole, 9nio vo o baroekatani, vo o taipaziqelani qea kiada qela, ta o kilou ni eri ṉa kiovou, ‘Va vaeka koa zae.’ Sai nio ṉota ṉoda quratou ṉoko papu kale matu zara kama zaekale. 10So sole so keru ṉoṉo daipaziovou keru, ṉota ṉo ziovou ni ṉo bapuvou zara kama zaekale, nio ṉo o baroekiṉani ta oṉai kilou ni eri ṉa kiovou, ‘Kua koi tu pa papi okate koa matu qulepo ama zaekale,’ ṉa kiovou. Koa keve kale inio ṉota raura kala ṉa ṉo elou sea kiadamu seke taipaziani ko tanama kale. 11Ako vo Baṉara ta zara o ivou vo o raurarauraivani, melai vota raura o ivou vo o zarazaraivani sole,” kiolake.

12Ni Jisu ta eri kiolake vo o taipazatani lekasa kasi, “So keru ṉoṉo erekou keru ko ṉojola, ta pui ṉo daipazimou ṉoko baerebaere poso ma ṉoko tamania kale amu, ma ṉo mabamu, ma ṉoko batiro ama lolo poso ke kiada, ako seta mata ke taipaziṉou ṉo ni seta keta ka erekou koko besibesi ko ṉoṉo erekema quli sole. 13Melai so keru ṉoṉo erekou keru ko ṉojola, ṉota ṉo daipazimou mata se ozaoza kamu, loke amu, jopaito amu ni se leqa kamu, 14nio vo Baṉara ta mauru o iṉou ṉo, ako seta pui kepa roveovou ereko koko vaitotola sole. Melai Baṉara ta o katiṉou ṉo koko besibesi so keru se sidopu amu ke saevou keru voukale azo,” kiolake.

Matuma ṉojola ko podepodeti

(Matiu 22:1-10)

15Ni so keru kala pado maba o viqa keru koa pesio seke zomanani koa ṉojola kale ala, vota eri kiolake Jisu kasi, “Maurumauru ala tisoiko voa maba vo okai zomano ala vo Baṉara ko lekasa puo kale ama ṉojola!” kiolake.

16Nio Jisu ta eri kiolake voa maba kasi, “Omadeu taku inio kala maba ta o erevake kala matula ṉojola ni vota o taipazimake kubo maba madu. 17Nio so keru ko baroa keru ko ṉojola ko taku nio vota o soroevake vovo nabulu tu opa mai bazueko seke taipaziani maba poso ko eri, ‘Kuemo, ako kiadama quli ta lula kota inainaiva sole!’ kio. 18Melai sea kiadamu ta keta lupaoke zio. Nio kala maba ta eri kiolake voa nabulu kasi, ‘Aṉata abe vairua tatabaraeka kama kobu miduku so sole aṉata aqa zaria zio tu kelole ko, so sole pui a rovea opatiko koa taipazato!’ 19Ni mata kala maba ta eri kiolake, ‘Koe, abe vairua tatabaraeka toni iruruputo ko bulumakau ni aṉata ada ola inio tu madoekole kai iruruputo ko, so sole aṉata pui a rovea opatiko koa taipazato.’ 20Ni mata kala maba ta eri kiolake, ‘Aṉata abe vairua rorota, nio kokale avo inio aṉata pui a rovea kilo,’ kiolake.

21“So sole voa nabulu ta o vaitake ni vota ovai bazuekake vovo lekasa ko quli poso. Nio koa pade ko lekasa ta ota matu korakoraivake ni eri va kiola vovo nabulu, ‘Taukavole ola matuma ni silo ama keve poso kale peuru kale ko evako kale ni pa odiema ni ṉo mati kilou se ozaoza kamu, ni loke amu, ni se leqa kamu, ni se lepu amu!’ 22Nio voa nabulu ta mata o olake ni opa odiemake se, ni o vaitake ni eri kiolake, ‘Lekasa, ko quli ṉoṉo lati soruekako quli aṉa ta lula a ereka, melai ko pade ta pui nio ko sukata,’ kiolake. 23Nio vo lekasa ta mata eri kiolake vovo nabulu kasi, ‘Ola peuru kupekupe ama matu keve poso kale ni silo ama keve poso kale ni pa bazubazuema sai ke evani maba poso tu ke sukatiko ko pade! 24Aṉata a bazueṉa ṉo, puliala kala pado sea kiadamu seke koeni ko kuleto ama taipazato ta opa kai zomanou kuo aṉako ṉojola ko sailao!’ kiolake voa lekasa.”

Jisu ko disaipeli va elo ko nianiiekato

(Matiu 10:37-38)

25Ni so keru matuma vaki ko lulueve keru vo Jisu, inio vota o vabaliake ni eri kiolake sekasi, 26“Vo o kilo ala aṉa kasi ni oka zariovo ala aṉako disaipeli elo ta o roquelou aṉa kobe kai paloasako roquano vo o ivani roquevo vovo mama, ni voko niania, ni voko reko, ni voko meqora poso, ni voko tamania poso ni o ṉavi roquilo kobe kai paloasako kale. Vo pui soa roquelo o elo ala ta pui opa roveovou aṉavo disaipeli elo. 27Vo pui oka zariovo ala tolailo aṉako luluelo kale omadeuvo vo maba vo o borikani voko korosi okai vouvo ama, vota pui opa roveovou aṉavo disaipeli elo.

28“Esa kala me azo ta o vadomuvou tu o erevo kala okatea pade o lovelove kaqe kiovou, kuleto vota o papuvou ni ota kai nianiiovou ko seleni ko ataataiti latau tiniavo ikio ko maleziko ama tu vota o ereko ko pade, tu vota ota ka kelo ko seleni koko maleziko ama okotiko koa iruruputo. 29Vota pui so o kalou, ta voko seleni ta esa pui kopa malezikou ni vota pui opa roveovou paivo voa pade lula vola saṉa obe ivou melai, ni kiadamu seke kelo amu ko ta kevai niureovou vo, ni eri kikevou, 30‘Koe, nea maba ta lula o tanite orumato melai pui ko rovea okoto ko koidi!’ kikevou.

31“Ni kala aikovakova ta o zio kiovou toni vuro maba sase tu vati pazokiniole kala pado edolola aikovakova vo o vati kanaekivani vo o kuevani karabete vuro maba sate, vota o papuvou kuleto saita tu o kerukerueko voko pizato ta ko male ikio tu vota o vati pazokinio voa pado aikovakova ma pui kio. 32Vota okai nianiiovou ta vota pui o maleziovou koqotaevo vo, ta vota o soroemou kake voko bazu ke kati taliani maba poso tu seta ke toraevo voa pado aikovakova tu ke paseko ko bule so keru vo vaṉa obeta eva keru.”

33Ni Jisu ta o paikake mati pesio se ni eri kiolake, “So sole me melai uria kerukeruekomo meko luluelo aṉa. Puliala me azo ta aṉavo disaipeli opa elou, vo pui oka zariani vaeko kiadama quli voko sole.”#14:33 Komia kobu (vesi 25-33) kale vo Jisu ta okai bazubazuta ta voko luluevo ta ikoana vaitotola sama, ni koa vaitotola ta animeta me qativo kiadama quli animeko ni pado ama saevo tu vota okai lekasa puo ko.

Se pui pado ama bulo kale ke luluevani vo Jisu ta omadeuvo ko kava roquroqu pide ama Soloti utu amu

(Matiu 5:13; Maka 9:50)

34Nio Jisu ta eri kiolake, “Soloti ta uri ama quli, melai kota kota ka mumailou koko kava roquroqu inio kota puliama kalo sama. 35Koa Soloti ta pui uri miduku topi vaeko ni pui uri kati valuvalueko ko miduku tu kai ereko kiaro ko niami. Namuko ikio koko male. Meta viqomo ni paqumukomo aṉa a melai bazuekako quli!” kiolake.

Currently Selected:

Luke 14: BLBNT

Highlight

Copy