Iruruputo 4

Pita ni Jone Kauniseli ko kuleto

1So keru Pita ni Jone qopeta pesia keru se maba poso kasi inio kake siama madu, ni se Jelepade ke kati vailani ko kuleto ala, ni kama Sadiusi madu ta ke baroake. 2Ni seta kekai korakoraivake nioqa, ako qokai bazubazutake vo Jisu ko mata saevo voukale azo sole, koko kasa puekako ko se voumu ta mata ke saevou kio. 3So sole seta ke noqoekake nioqa ni ke vaekake pirito pade kale ti kokai baroake koko raneo kale ama ṉaniu, ako koa taku ta lula matu raisiraisi kota evake sole. 4Melai kubo madu seke viqeni koa bazubazu ta ke tuvevo putake, ti seko ataataiti seke tuvevo puteni ko ta kokai baroi sike vuro madu.

5Ni koko raneo kale inio se Jiu amu ko vilua pikopiko madu, ni lotu lekasa poso ni Mosese ko Bazu kekai nianiiekatani ta ke padoivake Jerusalema. 6Se sate ta ke padoivake vo Ṉisa Siama Anasi ni Kaepasi, ni Jone ni Alekezada ni mata kake vo Ṉisa Siama ko mabamu. 7Ni seta ke lojoekake koa omuqa apositolo seko kuleto ni ke kuimaekake nioqa ni eri kikelake, “Nonia ereko inio qe evalavo koa urikato? Loma pizato saqela inio ni lalako ṉi kio qekai iruruputako?” kikelake.

8Sai nio vo Tabu ala Auvana ko pizato ta kovai sukatake vo Pita, ni eri ma kiolake, “Me Izireli qoqono ko vilua pikopiko ni lotu lekasa poso mela! 9Meta me qelai kuimakuimaeka koa uri ama quli koko ereilama vo lepu ala maba tona vo okai urikalavo, 10sole mea kiada mela ta meqai nianiiovou, ni kiadama Izireli qoqono melai uri tu kekai nianiiovou, ta nea maba koi o lojoani meko tanama kale ta ota maba urikala, vo Jisu Karisito o ṉi sala maba Nazareti ala ko pizato kale, vo meme vouvaeveni korosi topi ni vo Baṉara mata o saeviveni voukale azo. 11Vo Jisu inio voa lado vo eri va kikeveni ko Tabu ama Riki,

‘Ko lado se pade ke erekani kekai keduima

ta qulepo ama lado kota eva erisaṉa kiadama lado poso azo,’ va kikovema.

12Vokale ko kiada inio animeta me roveovou pakio; ni puliala mata kala peuru ma peuru kale ala ta opa katimele vo Baṉara tu vota o pakiemelo anime,” kiolake.

13Nio sea Jiu ama tanatanamu ta aqasiele kekai evake ko Pita ni Jone ko parani puto sama pesio ako seta ke paqumukake ta nioqata kama peuru kale ama maba kidi ni puliama uri ama nianiio sikulu kale ama sanioqa sole. Ni seta ke nianiiekake nioqa ta nioqata Jisu qo lulueveni nioqa. 14Melai seta pulia quli ke kasekake, ako seta ke veake voa maba vo o urikalani ta obeta lojoake Pita ni Jone sate sole. 15So sole se Jiu ama tanatanamu ta ke bazuekake nioqa tu qo vaeko koa Kauniseli ko lose, nio sea tanatanamu ta keta pesipesitake sai. 16Ni eri kikelake, “Loma quli kio me erekou nioqia omuqa maba kidi kasi, noi nio me ikou? Ako kiadama maba poso Jerusalema ke evani ta kekai nianiia nioqa qo erekalama aqasiele ama urikato, ni pui meba taka roveovou zolio sole. 17Melai animeta bazu me qatikou nioqia omuqa maba tu nioqata mata pui qo kasekou kama quli voa Jisu ko ṉikale. So inio pui ko aerou komia bazu vaṉa buti ama maba poso kasi,” kikelake.

18So sole seta ke nokaekake Pita ni Jone ni ke tova amaqikake nioqa pesipesito ko lose kale, ni seta ke bazuekake tu nioqata pui qo kasekou ni qo nianiiekatou kala kasi vo Jisu ko ṉikale kikelake. 19Melai Pita ni Jone ta qo mati tiorikake se ni eri kiqolake, “Me ṉavi me vatoekomo loma quli ikio sidopu vo Baṉara ko kelokelozato kale— meko zorimelo ma Baṉara ko zorivo? 20Ako eqeta pui qepa roveovou epezo kaseko ko eqe lula qe kevema ni qe viqema quli sole,” kiqolake. 21Sole se Kauniseli madu ta matu piza kama balauvato ko bazu ke katikake nioqa ni ke rupasikake. Ako seta ke keake ta puliama keve tu ke koqotaeko nioqa sole, ni sea kiadama maba poso ta ke ilusivake vo Baṉara, koko ereima quli kale avo. 22Ako voa maba vo o urikeni koa aqasiele ama urikato koko ereima kale ta ariku toni va sabere ala sole.

Apositolo madu ka vararaito seko parani puto

23Nio Pita ni Jone ta qo rupasiake, nio nioqata qo vaitake qo poqala kale amu kasi ni qomai bazuekake raura kama siama poso ni lotu tanatanamu kikelani. 24Nio so keru seke tuvevo putani ke viqa keru koa bazu sea kiadamu ta ke padoivake ni ke vararaitake Baṉara kasi ni eri kikelake,

“Matula Lekasa ṉa, ṉo au ni miduku ni ivere ṉo erekeni ṉa, ni kiadama sai ko evako quli! 25Vo Tabu ala Auvana ko pizato kale ṉo besiovini ṉa eṉevo taite Devita ko suto kale, ṉovo nabulu ko eri ka kiovema,

‘Noi sole inio se pui Jiu ama qoqono poso ta keta matu iqaiva;

Noi sole inio se peuru ma peuru kale ama toutou poso ta ke ereka ko utube ama korokorotato poso?

26Se peuru ma peuru kale ama aikovakova poso ta lula ke inainaova,

ni se lekasa poso ta lula ke padoiva

tu ke vati pazokinio vo Baṉara ni vo o pitoevani Pakio,’ ka kiovema.

27Tuvevo avole Herodi ni Ponitiasi Paelati ta qo zomanake mati padoilo Jerusalema peuru kale se pui Jiu amu ni se Izireli amu tu ke korotiko seko vouvaevo vo Jisu, ṉovo tabu ala Nabulu ni vo ṉoṉo bitoeveni Pakio. 28Seta ke erekake kiadama korokorotato ko ṉo lula ṉo vatoekema ṉoko pizato ni vatolo kale tu kota ko ereilou. 29Ni erisaṉa Baṉara tama kea seke erekako ṉavaṉavato sama kalo, ni bokeriṉela eṉe ṉoko nabulu poso ṉela tu parani putole ṉeqai bazuto ṉoko bazu. 30Kasa ika ṉoko pizato tu ṉoko urikato ni aqasiele ama iruruputo poso ta ko ereilou ṉovo tabu ala Nabulu Jisu ko ṉikale,” kikelake. 31Ni so keru seke paika keru vararaito, koa zae seke kai padoivake ta kota nuvinuvitake. Ni vo Tabu ala Auvana ko pizato ta komai sukatake sea kiadamu ni seta ke taniekake kai bazubazuto vo Baṉara ko bazubazu parani putole.

Seke tuvevo puteni kai tauvekinio seko lomaloma

32Nio sea kiadamu seke tuvevo puteni ta omadeu vatolo ni kerukeru ke evake seko bulo poso kale. Ni puliala se azo ta oka zariake kai kiadailo voko lomaloma melai seta kekai tauvekiniake kiadama seko quli. 33Ni matuma pizato kale se apositolo madu ta kekai bazutake vo Lekasa Jisu ko mata saevo voukale azo, ni vo Baṉara ko mauruto ta komai raibiziake sea kiadamu. 34So sole puliala koa poqala kale ala ta olaquavo o evake. Ako se miduku samu ma pade samu ta kekai tatabaraovake mati, ni seta ke kati kuevake se kekai tatabaraovake lomaloma poso ko seleni, 35ni ke vaekake se apositolo madu ko ṉase topi, nio koa seleni ikio kemai tauvekake se tapata poso ke toraekani.

36Ni vo Josepa ta kala Livai toutou kale ala Saipirasi udu kale o alileni ni se apositolo madu Banabasi va kikeveni. Koa ṉi ko kio ni kalo ta “Vo o zuvaratani.” 37Vota okai tatabaraovake kama pado voko epa sama miduku, ni vota o kati kuevake koko seleni, ni o katimake se apositolo madu.

Currently Selected:

Iruruputo 4: BLBNT

Highlight

Copy