Markus 16

Yesus hidup ulang

(Mat. 28:1-8; Luk. 24:1-12; Yoh. 20:1-10)

1Pe Sabtu malam, waktu so lewat hari Sabat, hari yang orang agama Yahudi tara bole bakarja, Salome, Maria orang Magdala deng Maria Yakobus pe mama, pigi bili minya wangi la mo goso Yesus pe mayat, iko orang Yahudi pe biasa. 2Kong pe hari Minggu, waktu matahari baru kaluar, dorang pigi di kubur goa. 3Di tenga jalang dorang baku bilang, “Ee, sampe di sana, sapa yang mo kase guling batu itu la torang bisa maso ka dalam kubur goa?” 4Bagitu dorang so dekat di Yesus pe kubur, dorang dapa lia batu itu so taguling. Padahal batu itu basar skali.

5Waktu dorang maso dalam kubur goa, dorang kage skali, barang dorang dapa lia ada nyong-nyong satu pake juba puti dudu di sabla kanan. 6Kong nyong itu bilang pa dorang, “Jang ngoni tako! Ngoni cari pa Yesus orang Nazaret yang dapa salib itu. Dia so hidup ulang. Dia tarada di sini. Coba ngoni lia! Ini tampa yang dorang taru Dia pe mayat. 7#Mat. 26:32; Mrk. 14:28 Jadi skarang, ngoni bale suda, kase tau pa Dia pe murit-murit termasuk Petrus, bilang, ‘Yesus so kamuka di daera Galilea. Di sana ngoni akan lia pa Dia, sama deng yang Dia so bilang pa ngoni.’ ”

8Pe dengar bagitu, dorang tako sampe totofore kong lari kaluar dari kubur itu. Kong gara-gara dong pe tako itu, di tenga jalang dong tara bicara apa-apa satu deng yang laeng. [Pas pe sampe, dong bilang Yesus pe pasáng itu pa Petrus deng murit-murit yang laeng. Dorang bicara tara panjang-panjang. Abis itu, Yesus sandiri pake Dia pe murit-murit kase tau Kabar Bae, mulai dari timur sampe di barat. Kabar Bae itu tentang bagimana manusia bisa hidup deng Tuhan Allah slama-lamanya. Kabar Bae itu kudus deng tetap hidup.]

Yesus kase tunju Dia pe diri pa Dia pe murit-murit

(Mat. 28:9-10; Yoh. 20:11-18)

9Pe hari Minggu pagi-pagi skali itu, waktu Yesus so hidup ulang, Yesus kakamuka kase tunju Dia pe diri pa Maria orang Magdala. Maria itu yang Yesus perna user tuju setang dari dia. 10Kong Maria pigi kase tau pa orang-orang yang jaga iko pa Yesus, apa yang dia lia. Waktu itu dorang sementara berduka deng manangis. 11Tapi waktu dorang dengar Maria bilang Yesus so hidup ulang deng dia so lia pa Yesus, dorang tara percaya.

12Abis itu, Yesus kase tunju Dia pe diri pa Dia pe murit dua orang yang sementara bajalang ka satu kampong. Waktu itu dorang tara kanal pa Yesus, barang dorang dapa lia Yesus pe rupa so laeng. Tapi lama-lama baru dorang dapa kanal pa Dia. 13Kong dorang dua bale kase tau pa dorang pe tamang-tamang laeng. Tapi dorang pe tamang-tamang me tara percaya pa dorang.

Yesus utus Dia pe murit-murit

14Dia pe ahir kabawa, Yesus kase tunju Dia pe diri pa Dia pe murit-murit seblas orang itu waktu dorang sementara makang. Kong Yesus togor pa dorang karna dorang pe hati karas deng karna dorang tara percaya pa orang-orang yang so lia, Dia so hidup ulang.

15 # Kis. 1:8 Abis itu Yesus bilang pa dorang, “Pigi suda di seluru dunia ini, la kase tau Kabar Bae dari Tuhan Allah pa samua orang. 16Sapa yang percaya deng dapa baptis, dia akan slamat. Tapi sapa yang tara percaya pa Kita, dia tara slamat kong akan dapa hukum. 17Orang-orang yang percaya pa Kita itu, Tuhan Allah akan kase kuasa pa dorang untuk biking tanda-tanda macam bagini: dorang akan user setang-setang pake Kita pe nama, dorang akan bicara pake bahasa-bahasa yang dorang bolong perna tau, 18dorang me akan pegang ular, deng biar dorang minum racong me dong tara apa-apa. Dorang akan taru dong pe tangan pa orang yang saki, kong orang saki itu akan sembu.”

19 # Kis. 1:9-11 Abis Tuhan Yesus bicara pa Dia pe murit-murit, Dia taangka ka sorga, kong dudu di tampa yang terhormat pa Tuhan Allah pe sabla kanan.

20Abis itu, Yesus pe murit-murit pigi di seluru dunia kase tau Kabar Bae tentang Yesus Kristus pa orang-orang. Kong, Tuhan me bantu pa dorang biking mujizat-mujizat supaya orang-orang jadi tau Tuhan Allah pe firman itu butul.

Currently Selected:

Markus 16: PB MMU

Highlight

Copy