Markus 13

Ruma Ibada Pusat mo dapa kase ancor

(Mat. 24:1-2; Luk. 21:5-6)

1Waktu Yesus kaluar dari Ruma Ibada Pusat pe kompleks, Dia pe murit satu bilang pa Yesus bagini, “Guru, memang gedung-gedung ini paling bagus! Lia batu-batu basar itu yang dorang ada susun!”

2Turus Yesus bilang pa dia, “Memang butul, gedung-gedung itu paling bagus. Tapi nanti ada dia pe waktu, samua itu akan dapa kase ancor sampe rata, kong tara ada satu batu lagi mo tasusun pa dia pe tampa.”

Yesus kase tau apa yang mo jadi sebelum hari kiamat

(Mat. 24:3-14; Luk. 21:7-19)

3Turus, Yesus pigi di Bukit Zaitun kong dudu di tampa satu yang mangada di Ruma Ibada Pusat. Kong Petrus, Yakobus, Yohanes deng Andreas badekat pa Yesus la cuma dorang deng Dia, kong dorang batanya pa Dia, 4“Guru, kase tau pa torang ka, yang Guru bilang tadi itu. Tempo apa Ruma Ibada Pusat itu mo dapa kase ancor, deng apa dia pe tanda-tanda kalu samua itu mo jadi?”

5Yesus bilang pa dorang, “Ngoni bajaga-jaga e, jang sampe ngoni dapa tipu. 6Barang, banya orang akan datang pake Kita pe nama, deng dorang bilang bagini, ‘Kita ini Dia suda, Raja yang Tuhan Allah janji mo kase slamat pa manusia!’ Tapi dorang itu cuma biking tipu banya orang la iko pa dorang. 7Kong kalu ngoni dengar ada baku prang pa ngoni pe daera, atau di tampa laeng, ngoni tara usa tako. Samua itu musti jadi, tapi itu bolong dia pe waktu dunia mo kiamat. 8Karna nanti, suku deng suku akan baku prang, kerajaan deng kerajaan laeng akan baku prang. Kong nanti ada lagi tana goyang di mana-mana, deng ada lagi kelaparan. Tapi samua itu baru dia pe awal penderitaan sebelum hari kiamat, itu sama deng penderitaan yang parampuang rasa waktu mo melahirkan.

9 # Mat. 10:17-20; Luk. 12:11-12 Jadi ngoni musti ati-ati! Karna ngoni percaya pa Kita, orang-orang mo serakan pa ngoni la dapa adili di pemimpin-pemimpin agama Yahudi. Ngoni me mo dapa pukul di ruma-ruma ibada agama Yahudi. Dorang mo kase mangada pa ngoni pa gubernur-gubernur deng raja-raja. Kong dong tanya-tanya pa ngoni. Tapi di situ ngoni pe kesempatan untuk kase tau tentang Kita pa dorang. 10Barang, samua suku bangsa musti dengar dulu Kabar Bae itu, baru kiamat. 11Kalu ada yang bawa pa ngoni kong serakan pa ngoni untuk mo adili, jang ngoni tako apa yang ngoni musti bilang. Ngoni bilang saja apa yang Roh Kudus suru ngoni bilang, karna itu bukang ngoni pe kata-kata yang kaluar tapi Roh Kudus. 12Nanti ada dia pe waktu, orang akan serakan dia pe sudara la dapa bunu. Bagitu me deng papa-papa, dorang akan biking bagitu pa dong pe ana-ana. Kong ada lagi ana-ana yang akan malawang pa dong pe orang tua, kong dorang serakan dong pe orang tua la dapa bunu. 13#Mat. 10:22 Kong samua orang akan binci pa ngoni karna ngoni iko pa Kita. Tapi orang yang tetap percaya pa Kita sampe dia pe ahir hidup, Tuhan Allah mo kase slamat pa dia.”

Yesus kase tau yang mo jadi di hari-hari sengsara

(Mat. 24:15-28; Luk. 21:20-24)

14 # Dan. 9:27, 11:31, 12:11 Yesus bilang, “Nanti ada satu orang yang paling malawang pa Tuhan Allah mo datang. Orang itu mo badiri di dalam Ruma Ibada Pusat, di tampa yang paling tara pantas untuk dia. (Sapa yang baca ini, perhatikan bae-bae la bole mangarti dia pe arti). Kalu orang yang paling malawang itu so badiri di situ, orang-orang yang ada di daera Yudea itu lebe bae lari basambunyi suda di gunung-gunung. 15#Luk. 17:31 Orang yang ada di atas ruma, jang turung pigi ambe barang-barang di dalam ruma, tapi turung kong langsung lari suda. 16Bagitu lagi deng orang yang ada di kobong, jang bale lagi di ruma ambe pakeang. Capat lari suda! 17Kong yang paling sengsara waktu itu, ibu-ibu hamil deng ibu-ibu yang masi kase toto dong pe ana. 18Berdoa suda supaya samua itu tara mo jadi pas di musim ujang. 19#Dan. 12:1; Why. 7:14 Barang, hari-hari itu sengsara skali, lebe sengsara dari samua yang orang perna rasa. Mulai dari pertama Tuhan Allah biking dunia ini sampe skarang, so tara ada sengsara yang mo jadi sama deng itu, deng itu so tara akan jadi lagi. 20Kong, kalu Tuhan tara kase pende hari-hari sengsara itu, samua orang pasti akan mati. Tapi karna Dia sayang pa orang-orang yang Dia so pili, Dia kase pende hari-hari sengsara itu. 21Waktu itu, kalu ada orang bilang pa ngoni, ‘Coba lia! Mesias ada di sini!’ Atau dorang bilang, ‘Coba lia! Mesias ada di sana!’ Jang ngoni percaya apa yang dorang bilang itu. 22Karna nanti ada banya orang datang bilang kata, dorang Mesias, atau bilang kata, dorang nabi yang kase turus Tuhan Allah pe pasáng. Deng dorang me biking mujizat-mujizat deng tanda-tanda yang kase tunju dong pe kuasa supaya orang percaya pa dorang kong jang percaya pa Tuhan yang butul lagi. Deng kalu bisa, dorang me mo biking sesat pa orang-orang yang Tuhan Allah so pili. 23Jadi, ngoni musti baati-ati suda! Samua ini Kita so bilang kamuka pa ngoni sebelum itu jadi.”

Tanda-tanda sebelum Yesus datang ulang

(Mat. 24:29-31; Luk. 21:25-28)

24 # Yes. 13:10; Yeh. 32:7; Yl. 2:10, 31, 3:15; Why. 6:12 Yesus bilang lagi, “Waktu hari-hari sengsara itu so mo abis, matahari deng bulan so tara basinar lagi. 25#Yes. 34:4; Yl. 2:10; Why. 6:13 Bintang-bintang akan jatu dari langit, kong samua yang ada di langit mo jadi kaco. 26#Dan. 7:13; Why. 1:7 Kong waktu itu, orang akan dapa lia Anak Manusia dari sorga datang dalam awan-awan deng samua kuasa deng cahaya yang luar biasa. 27Kong, Anak Manusia akan suru pa malaekat-malaekat untuk kumpul pa samua Dia pe umat yang Dia so pili dari samua tampa di dunia ini, dari ujung ka ujung.”

Hari-hari sengsara jadi tanda Yesus mo datang ulang

(Mat. 24:32-35; Luk. 21:29-33)

28Yesus bilang umpama satu bagini, “Coba ngoni balajar dari pohong ara. Kalu dia pe cabang-cabang kacil so mulai baijo deng mulai batunas, ngoni tau itu tanda musim panas so dekat. 29Bagitu lagi kalu ngoni lia hari-hari sengsara yang Kita bilang itu so mulai jadi, ngoni jadi tau, so tara lama lagi Anak Manusia mo datang ulang. 30Dengar bae-bae yang Kita bilang pa ngoni ini, orang-orang yang hidup skarang ini ada yang masi hidup sampe samua itu jadi. 31Langit deng bumi mo abis, tapi Kita pe kata-kata akan tetap ada sampe slama-lamanya.”

Orang percaya musti salalu siap untuk Yesus mo datang ulang

(Mat. 24:36-44)

32 # Mat. 24:36 Turus Yesus bilang lagi pa Dia pe murit-murit, “Tarada satu orang yang tau tempo apa Anak Manusia yang dari sorga mo datang ulang. Malaekat-malaekat di sorga tara tau, Anak Manusia sandiri me tara tau, cuma Bapa di sorga saja yang tau. 33Jadi ngoni musti ati-ati deng bajaga-jaga! Barang, ngoni tara tau tempo apa itu mo jadi. 34#Mat. 25:14; Luk. 12:36-38 Waktu Anak Manusia yang dari sorga mo datang ulang, Kita kase conto sama deng tuang ruma satu yang kase tinggal dia pe ruma karna mo pigi di tampa yang jao. Sebelum dia pigi, dia kase tanggung jawab pa dia pe orang-orang karja la urus dia pe ruma, deng dia kase bagi pa dorang tugas masing-masing. Dia me suru pa penjaga la bajaga-jaga turus. 35Dia musti bajaga-jaga suda, karna dia tara tau tempo apa tuang ruma itu mo datang. Mangkali dia mo datang sore ka, tenga malam ka, amper siang ka atau pagi-pagi. Bagitu me deng ngoni. Ngoni musti bajaga-jaga turus, 36jang sampe Kita datang kong dapa lia ngoni tara basiap. 37Apa yang Kita pasáng pa ngoni, Kita pasáng lagi pa samua orang: bajaga-jaga suda!”

Currently Selected:

Markus 13: PB MMU

Highlight

Copy