Lukas 13

Yesus kase tau supaya orang-orang bertobat

1Waktu itu, ada babarapa orang yang kase tau pa Yesus tentang orang-orang Galilea yang gubernur Pilatus bunu. Dorang itu dapa bunu waktu dorang sementara kase binatang korban persembahan di Ruma Ibada Pusat. 2Yesus bilang pa orang yang bakase tau itu, “Ngoni kira orang-orang itu dapa bunu macam bagitu di situ karna dong pe dosa lebe banya dari orang-orang Galilea laeng? 3Tarada! Tapi Kita bilang pa ngoni e: kalu ngoni tara bertobat dari ngoni pe dosa-dosa, ngoni samua me akan mati sama deng dorang. 4Deng ada lagi delapan blas orang yang mati tatindis deng menara yang rubu di dekat Siloam di kota Yerusalem. Ngoni kira dorang itu lagi mati karna biking dosa lebe banya dari orang-orang laeng yang ada di kota Yerusalem? 5Tarada! Tapi Kita bilang lagi pa ngoni, kalu ngoni tara bertobat, ngoni samua me akan mati sama deng dorang.”

Umpama tentang pohong ara yang tara babua

6Abis itu, Yesus bilang umpama satu bagini, “Ada orang satu yang punya pohong ara di dia pe kobong anggur. Satu kali, dia ka sana cari pohong itu pe bua. Tapi satu bua me dia tara dapa. 7Kong dia bilang pa orang yang jaga kobong itu, ‘Lia, so tiga taong kita bula-bale cari pohong ara ini pe bua, tapi kita tara perna dapa. Potong suda pohong ini! Untuk apa dia hidup di atas tana ini kalu dia tara babua!’

8Tapi orang yang jaga kobong itu bilang bagini, ‘Jang dulu bapa. Kase biar dulu satu taong lagi. Nanti kita pacol kase kuliling baru kita taru pupuk. 9Sapa tau taong muka dia babua. Kalu tarada, torang potong suda.’ ”

Yesus kase sembu pa parampuang satu yang bongko di hari Sabat

10Satu kali Yesus mangajar di ruma ibada agama Yahudi. Waktu Yesus mangajar itu pas hari Sabat, hari yang orang agama Yahudi tara bole bakarja. 11Di situ, ada parampuang satu yang saki so delapan blas taong karna setang kuasai pa dia sampe dia bongko, so tara bole badiri lurus. 12Waktu Yesus lia parampuang itu, Dia pangge kong bilang bagini, “Ibu, ibu so sembu dari ibu pe panyake.” 13Abis bilang bagitu, Yesus taru Dia pe tangan pa parampuang itu, langsung dia so bole badiri lurus. Kong parampuang itu puji deng hormat pa Tuhan Allah.

14 # Kel. 20:9-10; Ul. 5:13-14 Pe lia itu, kapala ruma ibada agama Yahudi itu mara, barang Yesus so kase sembu orang di hari Sabat. Karna itu, dia bilang pa orang banya di situ, “Ada anam hari torang pake untuk bakarja. Kalu ngoni mau sembu, datang di hari-hari itu. Jangan di hari Sabat.”

15Kong Tuhan Yesus bilang pa orang itu, “Ee, ngoni orang-orang munafik! Biar itu hari Sabat lagi, ngoni jaga lapas ngoni pe sapi deng keledai dari kandang, kong pigi kase minum. Itu me karja to? 16Ibu ini Abraham pe turunan sama deng ngoni. Dia so delapan blas taong Iblis kuasai. Jadi, tara sala suda kalu Kita kase lapas pa dia dari Iblis pe kuasa, biar ini hari Sabat.”

17Pe dengar Yesus pe bicara bagitu, samua orang yang jaga malawang pa Yesus jadi malu. Tapi orang banya, dorang sanang skali karna samua yang hebat yang Yesus biking itu.

Tuhan Allah pe umat lebe tatamba banya

(Mat. 13:31-32; Mrk. 4:30-32)

18Yesus bilang lagi, “Tuhan Allah Berkuasa sebagai Raja mulai dari sadiki orang, kong lebe hari lebe tamba banya. Kita mo banding itu deng apa? Itu sama deng umpama ini: 19ada biji tanaman#13:19: Di teks asli bahasa Yunani, sinapeos, itu tanaman yang pe biji kacil skali, kong kalu batumbu dia pe tinggi bole sampe tiga meter. yang orang ambe kong tanam di kobong. Biar biji tanaman itu yang paling kacil, tapi kalu so batumbu, dia jadi pohong. Kong burung-burung di udara datang basarang pa dia pe cabang-cabang.”

20Abis itu, Yesus bilang lagi bagini, “Tuhan Allah Berkuasa sebagai Raja pa Dia pe umat, mulai dari sadiki orang, kong lebe hari lebe tamba banya. Itu Kita mo kase sama deng apa lagi e? Sama deng umpama ini: 21ada ragi yang parampuang satu ambe kong campur deng tarigu ampa pulu liter. Ragi itu biking sampe adonan roti itu nae jadi banya.”

Yesus sama deng pintu untuk torang maso sorga

(Mat. 7:13-14, 21-23)

22Abis itu, Yesus kase turus Dia pe perjalanan ka Yerusalem. Dia bajalang bakuliling di kota-kota deng di kampong-kampong, Dia me mangajar pa orang-orang di tampa-tampa itu. 23Ada orang satu yang batanya pa Dia, “Guru, cuma sadiki orang saja yang mo dapa slamat?”

24 # Mat. 7:13-14 Yesus bilang pa orang-orang di situ, “Ngoni berusaha suda maso iko pintu yang sempit! Barang, banya orang berusaha mo maso iko pintu itu, tapi dorang tara bisa maso. 25Karna waktu dorang datang, tuang ruma so kunci pintu. Jadi waktu itu ngoni akan babadiri di luar kong toki-toki pintu. Ngoni akan bilang, ‘Bapa, buka pintu ka!’

Dia akan jawab pa ngoni, ‘Kita tara kanal pa ngoni deng Kita tara tau ngoni dari mana.’

26 # Mat. 7:22-23 Kong ngoni akan bilang pa Dia, ‘Torang yang biasa makang deng minum sama-sama deng Bapa. Bapa lagi yang mangajar pa torang di torang pe kota pe jalang-jalang. Pasti Bapa kanal pa torang.’

27 # Mzm. 6:9 Tapi waktu itu suda Dia mo bilang pa ngoni, ‘Dengar bae-bae yang Kita bilang pa ngoni, Kita tara kanal pa ngoni deng Kita tara tau ngoni dari mana! Bapinda suda dari sini, ngoni yang jaga biking barang yang jahat!’

28 # Mat. 22:13, 25:30 #Mat. 8:11-12 Waktu itu, ngoni akan manangis deng menderita skali. Barang ngoni lia pa Abraham, Ishak deng Yakub ada sama-sama deng samua nabi di Tuhan Allah pe tampa Berkuasa sebagai Raja, baru ngoni yang tara dapa maso di situ, dapa user kaluar. 29Nanti orang-orang dari banya tampa di dunia ini, dari timur sampe barat, dari utara sampe selatan, dorang itu mo jadi Tuhan Allah pe umat, kong mo dudu makang di dalam Tuhan Allah pe tampa Berkuasa sebagai Raja. 30#Mat. 19:30, 20:16; Mrk. 10:31 Perhatikan bae-bae, di situ banya orang penting di dunia ini, nanti jadi orang yang tara penting, kong orang yang tara penting di dunia ini, nanti jadi orang penting.”

Yesus sedi, barang orang-orang di Yerusalem tara mau badengar pa Dia

(Mat. 23:37-39)

31Waktu Yesus masi bicara, babarapa orang Yahudi dari aliran Farisi datang pa Dia. Dorang bilang, “Bapa, pigi suda di tampa laeng, barang raja Herodes mo bunu pa Bapa.”

32Yesus bilang pa dorang, “Ngoni pigi pa raja Herodes yang licik itu kong bilang bagini, ‘Hari ini deng beso Kita user setang deng kase sembu orang saki. Turus hari ketiga, Kita pe karja so mo abis.’ 33Tapi biar bagitu me, hari ini, beso deng lusa, Kita musti bajalang turus pigi di Yerusalem. Karna Tuhan Allah pe Nabi musti mati di kota Yerusalem, tara bisa di kota laeng.

34Kasiang ngoni orang-orang Yerusalem! Ngoni yang bunu pa nabi-nabi yang jaga kase turus Tuhan Allah pe pasáng, deng ngoni me lempar deng batu sampe mati pa orang-orang yang Tuhan Allah utus pa ngoni. So ulang-ulang kali Kita ingin kumpul pa ngoni supaya dekat deng Kita, sama deng ayam mai yang tutu dia pe ana-ana deng dia pe sayap, tapi ngoni tara mau. 35#Mzm. 118:26 Karna itu, Tuhan Allah akan bajao dari ngoni pe kota, kong kota itu akan jadi sunyi. Dengar bae-bae e, ngoni so tara akan lia lagi pa Kita. Tapi nanti waktu Kita datang ulang, ngoni akan lia lagi pa Kita kong bilang bagini, ‘Puji pa Dia yang Tuhan Allah so utus datang kamari.’ ”

Currently Selected:

Lukas 13: PB MMU

Highlight

Copy