Lukas 14

Yesus kase sembu orang di hari Sabat

1Satu kali pas hari Sabat, hari yang orang agama Yahudi tara bole bakarja, Yesus pigi makang di orang aliran Farisi pe pemimpin satu pe ruma. Aliran Farisi itu yang pegang kuat agama Yahudi pe aturan sampe dorang jadi fanatik. Di situ, samua orang perhatikan turus pa Yesus untuk cari-cari Dia pe sala. 2Kage-kage, ada orang saki satu yang datang pa Yesus, dia pe panyake itu biking sampe dia pe tangan deng kaki bangka-bangka. 3Turus Yesus tanya pa guru-guru agama Yahudi yang ahli lima kitab Musa deng orang-orang dari aliran Farisi itu, “Kalu iko torang pe aturan agama, bole kase sembu orang di hari Sabat ka tarada?”

4Tapi dorang samua itu cuma badiam. Kong Yesus pegang orang itu, turus kase sembu pa dia. Abis itu, Yesus suru orang itu pigi. 5#Mat. 12:11 Kong Yesus bilang pa dorang, “Kalu ngoni pe ana atau ngoni pe sapi jatu di parigi pas hari Sabat, pasti ngoni mo bantu kase kaluar, to?”

6Pe dengar Yesus bilang bagitu, tarada satu orang yang barani balas Yesus pe bicara itu.

Jang suka cari hormat

7Waktu Yesus sementara makang di orang Farisi itu pe ruma, Yesus perhatikan pa tamu-tamu yang suka dudu di tampa yang terhormat. Karna itu, Dia mangajar pa dorang pake umpama bagini, 8#Ams. 25:6-7 “Kalu ngoni dapa undang di pesta kawing, jang ngoni suka dudu di tampa yang terhormat. Karna mangkali tuang pesta itu ada undang orang laeng yang lebe penting dari ngoni. 9Kong jang sampe tuang pesta itu akan datang deng bilang bagini, ‘Maaf e, tampa ini so ada orang punya.’ Kong ngoni deng rasa malu musti bapinda dudu di balakang. 10Jadi, kalu ngoni dapa undang di orang pe acara, lebe bae ngoni dudu di balakang. Sapa tau tuang pesta itu datang kong bilang pa ngoni bagini, ‘Mari, dudu di muka.’ Deng bagitu, ngoni mo dapa hormat di muka samua tamu yang ada, yang makang sama-sama deng ngoni. 11#Mat. 23:12; Luk. 18:14 Barang, sapa saja yang baangka diri, Tuhan Allah mo biking dia jadi orang yang tara arti apa-apa. Tapi sapa yang anggap dia pe diri sama deng orang yang tara arti apa-apa, Tuhan Allah mo angka pa dia jadi orang yang penting.”

12Abis itu, Yesus bilang lagi pa orang yang undang pa Dia, “Laengkali kalu bapa biking acara makang-makang, siang atau malam ka, jang bapa undang bapa pe tamang-tamang atau bapa pe sudara-sudara atau bapa pe birman-birman yang kaya. Karna nanti dorang mo balas undang pa bapa, deng bagitu apa yang bapa kase pa dorang, dorang mo balas kase lagi pa bapa. 13Tapi kalu bapa biking acara makang-makang, undang orang-orang miskin, orang-orang cacat, orang-orang lumpu deng orang-orang buta. 14Kalu bapa biking bagitu, Tuhan Allah yang akan biking bapa sanang, karna dorang itu tarada apa-apa yang dorang bisa kase pa bapa. Nanti Tuhan Allah akan balas bapa pe bae di hari kiamat, waktu Tuhan Allah kase hidup ulang pa orang-orang yang butul pa Tuhan Allah pe muka.”

Umpama tentang pesta basar di sorga

(Mat. 22:1-10)

15Waktu Yesus bilang bagitu, satu orang yang dudu makang sama-sama di situ, bilang pa Dia bagini, “Pe sanang skali orang yang nanti mo sama-sama makang di tampa Tuhan Allah Berkuasa sebagai Raja.”

16Kong Yesus bilang pa dia pake umpama satu bagini, “Ada satu orang yang biking pesta basar, kong undang orang banya. 17Waktu samua so siap, dia suru dia pe orang karja pigi kase tau pa orang-orang yang dia so undang, bagini, ‘Kamari suda, samua so siap!’ 18Tapi samua orang yang dapa undang tara bisa datang deng macam-macam alasan. Yang pertama pe alasan bagini, ‘Kita baru bili kobong jadi kita musti ka sana lia kobong itu. Jadi maaf e.’ 19Yang laeng lagi baalasan bagini, ‘Ya, kita baru abis bili sapi lima pasang. Jadi kita musti kase coba karja kita pe sapi-sapi itu. Jadi kita minta maaf e.’ 20Turus yang laeng lagi baalasan bagini, ‘Kita baru abis kawing, jadi tara bisa datang.’

21Turus, orang karja itu bale kase tau samua itu pa dia pe tuang. Kong tuang ruma itu nae dara, turus suru pa dia pe orang karja bagini, ‘Kalu bagitu, capat suda ngana pigi di kota pe jalang-jalang basar sampe di lorong-lorong. Ngana undang deng bawa orang miskin, orang cacat, orang buta deng orang lumpu.’ 22Abis dengar parenta itu, orang karja itu pigi biking sama deng yang dia pe tuang suru. Waktu pulang, dia bilang pa dia pe tuang, ‘Bapa, samua yang bapa parenta, kita so biking. Tapi masi ada tampa dudu yang kosong.’

23Kong tuang itu bilang pa orang karja itu, ‘Kalu bagitu, ngana pigi lagi di jalang-jalang, deng di lorong-lorong di luar kota. Ngana paksa pa orang-orang yang ada di situ datang kamari supaya kita pe ruma ini ponong.’ 24Jadi dengar bae-bae yang Kita bilang ini, samua orang yang so tolak Kita pe undangan itu, tara ada satu orang yang akan makang di Kita pe pesta ini.”

Yesus kase tau bagimana mo jadi Dia pe pengikut

(Mat. 10:37-38)

25Abis itu, banya skali orang yang bajalang iko pa Yesus. Yesus babale pa dorang kong bilang bagini, 26#Mat. 10:37-38 “Orang yang iko pa Kita, dia musti sayang skali pa Kita lebe dari dia pe sayang pa dia pe mama, papa, bini, ana, ade, kaka, deng dia pe diri sandiri lagi. Jadi kalu dia tara sayang pa Kita sama deng bagitu, dia tara bisa iko pa Kita. 27#Mat. 16:24; Mrk. 8:34; Luk. 9:23 Sapa yang tara pikul dia pe salib, itu berarti dia tara siap menderita sampe mati deng iko pa Kita, dia itu tara pantas jadi Kita pe pengikut.

28Conto bagini: kalu ada di antara ngoni yang mo biking ruma, pasti dia mo bahitung dulu, barapa ruma itu pe biaya. Deng bagitu dia bisa dapa tau, dia pe doi cukup ka tarada untuk kase selesai ruma yang dia mo biking. 29Kalu dia tara bahitung kamuka, kong dia so biking fandasi, nanti dia tara mampo kase selesai ruma itu, kong orang-orang lia itu, dorang akan kase tatawa pa dia. 30Dorang akan bilang, ‘Dia mulai biking ruma itu tapi dia tara mampo kase selesai.’

31Atau, ada conto laeng lagi bagini: ada raja satu yang dia pe tentara spulu ribu kong mo baku prang deng raja laeng yang dia pe tentara dua pulu ribu. Raja itu pasti bapikir bae-bae dulu, sebelum maju serang. 32Kalu dia tau dia pe tentara-tentara tara mampo, pasti dia mo kirim dia pe utusan untuk minta dame waktu dia pe musu-musu masi jao. 33Bagitu lagi deng ngoni. Kalu ngoni mau jadi Kita pe pengikut, ngoni bapikir bae-bae dulu, ngoni mampo mo kase tinggal samua yang ngoni punya ka tarada. Kalu ngoni tara mampo itu, ngoni tara bisa iko pa Kita.”

Orang percaya musti bawa pengaru yang bae, sama deng garam

(Mat. 5:13; Mrk. 9:50)

34 # Mat. 5:13; Mrk. 9:50 Yesus bilang umpama satu lagi bagini, “Garam itu bagus, ada dia pe guna. Tapi kalu garam itu so jadi tawar, so tara mungkin lagi mo barasa garam. 35Kalu so bagitu, so tarada dia pe guna lagi. Biar lagi mo pake di kobong untuk kase subur tana deng untuk biking pupuk, so tara bisa. Jadi kalu so bagitu, lebe bae buang suda. Dengar itu bae-bae kong simpang di hati!”

Currently Selected:

Lukas 14: PB MMU

Highlight

Copy