ŴaRoma 6

Kufwa ku uheni kweni kuŵa ndi umoyo mwaku Kristu

1Viyo tikatingenji? Kumbi tijaririyenge mu ulakwi, alinga kuti wezi wo ufurwe? 2Kungaŵanga viyo cha! Taŵenifwe tingufwa ku ulakwi, tijaririyenge ŵamoyo so uli mwenimo? 3Pamwenga mureka kuziŵa kuti tose taŵenifwe tingubatizikiya mwaku Kristu Yesu, tingubatizikiya mu nyifwa yake? 4Viyo tinguŵikikiya pamoza nayo mu chibatizo mu nyifwa: alinga kuti, uli ndimo Kristu wanguyuskikiyako ku nyifwa ndi unkhankhu wa Awiske, viyo ifwe nafwe tendiyenge mu ufya wa umoyo.

5Chifukwa asani tarungikana nayo pamoza mu chikozgu cha nyifwa yake, kwakuneneska tirungikenge pamoza nayo mu chiyuka chake nacho viyo; 6pakuziŵa chenichi, kuti unthu widu wakali ungupayikikiya pamoza nayo, alinga kuti liŵavu lo la ulakwi liwayulike, viyo kuti tireke ifwe kuŵa so ŵaŵanda ku ulakwi; 7pakuti yo wafwa warunjiskika ku ulakwi. 8Kweni asani tingufwiya pamoza ndi Kristu, tivwana kuti tiŵiyenge so ŵamoyo nayo, 9taŵakuziŵa kuti Kristu, pakuyuskika ku ŵakufwa, kuti ngwamafwika so cha, kuti nyifwa yimtufuliya so cha. 10Chifukwa nyifwa yo wangufwa, wangufwiya kamoza pe mbwenu kuchiri ku ulakwi: kweni umoyo wo wajariya, waujariya kuchiri kwaku Chiuta. 11Viyo namwe mujipime ŵakufwa kuchiri ku ulakwi, kweni ŵamoyo kuchiri kwaku Chiuta mwaku Kristu Yesu.

12Viyo ulakwi ureke kuwusa mu liŵavu linu lachifweni, kuti muvwiye maulakalaka ghake. 13Ndipo viŵaru vinu mungavipereka cha ku ulakwi nge ndi vitataliru vya uwura-urunji; kweni mujipereke kwaku Chiuta, nge mbamoyo ku ŵakufwa, ndi viŵaru vinu nge ndi vitataliru vya urunji kwaku Chiuta. 14Chifukwa kuti ulakwi utufuliyenge paku imwe cha: chifukwa kuti mwe pasi pa chilangulu cha, kweni pasi pa wezi.

Kuŵa ŵaŵanda ŵa urunji

15Na uli kumbi tilakwenge, pakuti kuti te pasi pa chilangulu cha, kweni pasi pa wezi? Kungaŵanga viyo cha! 16Asi muziŵa kuti kwaku mweniyo mujiperekako nge mbaŵanda kwachimvwiya, mwe ŵaŵanda kwaku yo mumvwiya, pamwenga ŵa mvwiyu ku urunji? 17Kweni wawongeke Chiuta, kuti chingana mwaŵanga ŵaŵanda ŵa ulakwi, ndikweni munguvwiya mu mtima kasambizgidu ko kakuperekeka kwaku imwe; 18ndipo pakufwatulika ku ulakwi, munguŵa ŵaŵanda ku urunji. 19Ndikamba nge ndi munthu pa chifukwa cha udomboto wa liŵavu linu; chifukwa uli ndimo mungupereke viŵaru vinu nge mbaŵanda ku ukazuzi ndi ku uchikana-marangu kuya ku uchikana-marangu, viyo sono viperekeni viŵaru vinu nge mbaŵanda ku urunji kuya ku kupaturika.

20Chifukwa penipo mwenga ŵaŵanda ŵa ulakwi, mwenga ŵanangwa kuchiri ku urunji. 21Viyo mwenga ndi chipasi chakutinji kali mwaku vyenivyo sono mulenga soni navyo? Chifukwa umari waku viya ndi nyifwa. 22Kweni sono mwati mwafwatulika ku ulakwi, ndi so mwati mwaŵa ŵaŵanda kwaku Chiuta, mwe nacho chipasi chinu kuya ku kupaturika, ndi umari wa umoyo wamuyaya. 23Chifukwa mphotu ya ulakwi ndi nyifwa; kweni chawezi chaku Chiuta mbumoyo wamuyaya mwaku Kristu Yesu Ambuyafwe.

Currently Selected:

ŴaRoma 6: TongaMw

Highlight

Copy