Marko 9

1Ndipo wanguti kwaku wo, “Nadidi ndikuneniyani, Alipo ŵanyake ŵaku wo ŵatuma panu wo kuti ŵakesanga nyifwa cha, mpaka po ŵawona ufumu waku Chiuta uchiza ndi nthazi.”

Kusanduka kwaku Yesu

(Mateyu 17.1-13; Luka 9.28-36)

2Ndipo pavuli pa mazuŵa ghankhonde ndi limoza Yesu wangupatuwapo Petro, Yakobe ndi Yohane, ndipo wanguŵatole paku ŵija mu ghiri litali; ndipo wangusanduka paurongo pawo. 3Ndipo minjirira yake yaŵanga yakung'anima, yakutowa ukongwa; uli ndimo mtozgi-saru panupasi kuti wangaziŵa kuyitozga viyo cha. 4Ndipo kunguŵawoneke Eliya pamoza ndi Mosese; ndipo ŵarongoronga ndi Yesu. 5Ndipo pakwamuka Petro watiti kwaku Yesu, “Rabi, nkhwamampha kuŵa panu ifwe: tiyeni tichite mahema ghatatu, kwaku imwe limoza, kwaku Mosese limoza, ndi kwaku Eliya limoza.” 6Chifukwa kuti waziŵanga cha cho wangamuka; pakuti wenga wamantha ukongwa. 7Ndipo mtambo unguŵavimba: ndipo lingutuwa mu mtambo liyowozi, “Mwenuyu ndi Mwana wangu wakwanjiwa: muvweni iyo.” 8Ndipo kwamabuchibuchi ŵachilereska kwakuzunguliya, kuti ŵanguwona so munyake cha, kweni Yesu pe pamoza ndi iwo ŵija.

9Ndipo wachisika ku phiri lo, wanguŵalanguliya kuti ŵangachineniyapo yumoza cha paku vyo ŵanguwona, mpaka penipo Mwana wa munthu wayuka ku ŵakufwa. 10Viyo ŵangughasunga gho mazu, kweni ŵakufumbana mwaku ŵija, “Nkhune kuyuka ko ku ŵakufwa?” 11Ndipo ŵamfumbanga, ŵakuti, “Chifukwa chine ŵalembi ŵatiti Eliya watenere kuza danga?” 12Wakwamuka wanguŵanene, “Eliya wadangenge nadi kuza, mwakuti wanozge vinthu vyose; kweni na uli po kwalembeka ghapa Mwana wa munthu, kuti wavwiyepo vinandi, ndikuyuyulika? 13Kweni ndikuneniyani, kuti Eliya nayo waza, ndipo wamuchitiya chose cho wangukhumba, uli ndimo kwalembeke paku iyo.”

Yesu wachizga muhurwa wakufuntha

(Mateyu 17.14-21; Luka 9.37-43a)

14Ndipo ŵati ŵaza ku ŵasambizi ŵanguwona mzinda ukuru kuzunguliya iwo, ndi ŵalembi ŵakufumbana nawo. 15Ndipo sosonukweni mzinda wose wo pakumuwona ungurwita ukongwa, ndipo ŵangumuchimbiriya ndi kumutauzga. 16Ndipo wanguŵafumba, “Mufumbananji nawo?” 17Ndipo yumoza waku mzinda wo wangwamuka, “Msambizgi, ndingutole kwinu mwana wangu uyu wakuŵa ndi demone wambuwu; 18ndipo kose kweniko wamtole, utumtesuwa: ndipo wamokoka phovu ndi kukukuta minyu, ndipo ngwakonda: ndipo ndingufumba ŵasambizi ŵinu kuti ŵamtuzge; kweni kuti ŵenga ŵanthazi cha.” 19Ndipo wakuŵamuka wanguti, “A mphapu yambura chivwanu, mpaka zuŵanji nkhajanga namwe? Mpaka zuŵanji nkhakunthiyangapo namwe? Mtoleni kwaku ine.” 20Ndipo ŵangumtole kwaku iyo: ndipo wachimuwona, demone yo sosonukweni wangumparuwa ukongwa; wanguwa pasi, wakukunkhuruka ndi wakumokoka phovu. 21Ndipo wangufumba awiske, “Kutuwa zuŵanji waŵa ndi nthenda iyi?” Wanguti iyo, “Kutuwa ku wana. 22Ndipo panandi wampong'a ku moto ndi mu maji, kuti wabayike: kweni asani muziŵa kuchita kanthu, mutifwiye lisungu, tovyeni.” 23Ndipo Yesu wangumnene, “Asani iwe uziŵa! Vyose vyamachitika ku wakuvwana.” 24Sosonukweni wiske wa mwana yo, wakubongo wanguti, “Ndivwana; wovyani uwura chivwanu wangu.” 25Ndipo Yesu wachiwona kuti mzinda uchimbiriya pamoza, wanguchenya mzimu wo wawiyu, wakunena nawo, “Mzimu wambura kurongoro ndi wamgota we, ndikulanguliya, tuwamo mwake, ungaserengamo so cha.” 26Viyo wabongo ndi kumuparuwa ukongwa, ungutuwa: ndipo mwana yo wanguwa nge ngwakufwa; mwakuti ŵanandi ŵatinge, “Wafwa.” 27Kweni Yesu wanguriko janja, wangumsoska, ndipo wanguyuka. 28Ndipo wati wafikamu nyumba ŵasambizi ŵake ŵangumfumba pa ubende, “Chifukwa chine ifwe tatodeka kuwutuzga?” 29Ndipo wanguŵanene, “Mtundu uwu kuti uziŵa kutuwa ndi kanthu kanyake cha, kweni ndi kuromba pe.”

Yesu wakamba so ndi nyifwa yake

(Mateyu 17.22-23; Luka 9.43b-45)

30Wangutuwa kweniko, ŵanguporota mu Galile; ndipo kuti wakhumbanga cha kuti yumoza waziŵe. 31Chifukwa wasambizganga ŵasambizi ŵake, kuŵanene, “Kuti Mwana wa munthu waperekekenge mu manja gha ŵanthu, ndipo ŵambayenge; ndipo wati wabayika, pavuli pa mazuŵa ghatatu wakayukanga.” 32Kweni iwo kuti ŵanguwamo kakambidu ko cha, ndipo wopanga kumfumba.

Mura ndiyani?

(Mateyu 18.1-5; Luka 9.46-48)

33Wanguza ku Kapernaumu: ndipo pakuŵa mu nyumba wanguŵafumba, “Mwasuskanananganji mu nthowa?” 34Kweni ŵanguchetama iwo: chifukwa munthowa ŵasuskananga kuti mura ndi yani. 35Ndipo wachija pasi, wangudana chumi ndi ŵaŵi, watiti kwaku wo, “Asani yumoza wakhumba kuŵa wachimoza, waŵe wakumariya limu waku wose, ndi mteŵeti waku wose.” 36Ndipo wanguto kana, wangukamika mukati mwawo; ndipo pakukapakata wanguŵanene, 37“Yose yo wangaronde kamoza ka twana twaviyo mu zina langu, waronde ine; yo wangaronde ine, kuti waronde ine cha, kweni wakundituma yo.”

We yose yo kuti wamikana nafwe cha we kwaku ifwe

(Luka 9.49-50)

38Yohane wanguti kwaku iyo, “Msambizgi, tinguwona yumoza kutuzgiya ŵademone mu zina linu; ndipo tingumkanizga, chifukwa kuti warondonga ifwe cha.” 39Yesu wangunena, “Mungamkanizganga cha: chifukwa palive munthu yo wachitiya vyanthazi mu zina langu, pavuli waziŵenge so ruŵi kurongorole uheni paku ine. 40Chifukwa yose yo kuti wamikana nafwe cha, we kuchiri kwaku ifwe. 41Chifukwa yose yo wangamweska imwe nkhombo ya maji mu zina lakuti mwe ŵaku Kristu, ndikuneneskiyani kuti watayenge mphotu yake cha.

Kweseka ku kwananga

(Mateyu 18.6-9; Luka 17.1-2)

42“Ndipo yose yo wangaguŵiska kamoza ka tumana to twakuvwana mwaku ine, mphanyi nkwamampha kwaku iyo kuti chimphe chimangike mu khose lake, ndi wapong'eke mu nyanja. 43Ndipo asani janja lako lingakuguŵiska, lidumuweko; nkhwamampha kusere iwe wakupunduka mu umoyo, kwakuruska wakuŵa nagho manja ghaŵi; kuruta ku Gehena ku moto wo wambura mazimwika. [44Kweni fusi yawo kuti yitufwa cha, ndi moto kuti uzimwa cha.] 45Ndipo asani rundi lako lingakuguŵiska, lidumuweko; nkhwamampha kusere iwe wakuganthiya mu umoyo, kwakuruska wakuŵa ndi marundi ghaŵi, kupong'eka mu Gehena. [46Kweniko fusi yawo kuti yitufwa cha, ndi moto kuti uzimwa cha.] 47Ndipo asani jiso lako lingakuguŵiska likorowo; nkhwamampha kusere iwe wa jiso limoza mu ufumu waku Chiuta, kwakuruska, kuŵa ndi maso ghaŵi, kupong'eka mu Gehena; 48kweniko fusi yawo kuti yitufwa cha, ndi moto kuti uzimwa cha. 49Chifukwa yose wakacherekekanga ndi moto. 50Mche ngwamampha: kweni asani mche wo wasukuruka, muwunoweskenge ndi chine? Muŵe ndi mche mwaku mwaŵeni, ndipo mujariyane mu chimangu.”

Currently Selected:

Marko 9: TongaMw

Highlight

Copy