Marko 10

Yesu wasambizga ndi za chipata cha nthengwa

(Mateyu 19.1-12; Luka 16.18)

1Ndipo wangutuwako kuwa wanguza mu mphaka zaku Yuda ndi sirgha liya Yordane: ndipo yinguwungana so kwaku iyo mzinda; ndipo, uli ndimo kanguŵiya karusu kake, waŵasambizganga.

2Ndipo ŵangumuziya ŵaFarisi, ŵamfumbanga, “Vinu nkhwamampha munthu kupata muwoli wake, uku kwenga kumwesa.” 3Kweni iyo wakwamuka wanguŵafumba, “Mosese wangukula-nguliyani chine?” 4Iwo ŵangunena, “Mosese wanguzomerezga kulemba kalata wa chifwatuwa, ndi kumupata.” 5Yesu wanguŵanene, “Pa chifwa cha unononu wa mtima winu wangulembe imwe dangu lenilo. 6Kweni chituliyi ku chiyambo cha ulengi, ‘Chiuta wanguŵalanga munthurumi ndi munthukazi!’ 7‘Chifukwa chenichi munthurumi walekenge awiske ndi anyina, ndi wakwati-skanenge ndi muwoli wake; 8ndipo wo ŵaŵi ŵaŵenge munthu yumoza.’ Viyo kuti mbaŵi so cha, kweni munthu yumoza. 9Viyo chenicho Chiuta wamanga pamoza, munthu wareke kupatuwa.” 10Ndipo mu nyumba ŵasambizi ŵangumfumba so paku chenichi. 11Ndipo ŵanguŵanene, “Yose yo wangapata muwoli wake, ndi kuto munyake, wareŵa paku iyo; 12ndipo asani iyo wapata mrumi wake, ndi watorana ndi munyake, nayo so wachita ureŵi.”

Yesu watumbika twana

(Mateyu 19.13-15; Luka 18.15-17)

13Ndipo ŵangumtole twana, kuti watukwaske: kweni ŵasambizi wo ŵanguŵachenya. 14Kweni Yesu wachiwona wangutundiya, ndipo wanguŵanene, “Tulekeni twana kuza kwaku ine: mungatukanizganga cha: chifukwa ufumu waku Chiuta ngwa twaviyo. 15Ndikuneneskiyani, yose yo wangaronde ufumu waku Chiuta nge nkhana cha, kuti wangasere mwaku wo cha.” 16Ndipo wangutupakata, ndi wangututumbika ndi kuŵika paku to manja ghake.

Jaha lisambasi

(Mateyu 19.16-30; Luka 18.18-30)

17Ndipo wachituliya iyo ku nthowa, wanguchimbiriyako yumoza, ndipo wakumlambiya wangumfumba, “Msambizgi wamampha, nkhachitanga chine kuti ndihare umoyo wamuyaya.” 18Kweni Yesu wangumnene, “Chifukwa chine utindizumbuwa wamampha? Palive wamampha kweni yumoza, ndiyo Chiuta. 19Marangu utighaziŵa: ‘Ungabaya, ungareŵa, ungaba, ungasimikizga kwautesi, ungapusika, tumbika ausu ndi anyoko.’ ” 20Kweni iyo wangumnene, “Msambizgi, vyose ivi ndikusunga kutuwa ku umpupuka wangu.” 21Ndipo Yesu, pakumlereska, wangumwanja, wangunena nayo, “Chinthu chimoza usoŵa; kanga, kasaske chose cho wenacho, paska ku ŵakavu, ndipo ukaŵanga nayo mbiku kuchanya: ndipo zanga, ndirondo!” 22Kweni iyo wangubwanthuska chisku pa mazu yagha ndipo wanguruta wachisungu: chifukwa wenga nawo usambasi unandi.

23Ndipo Yesu wati walereska kwakuzunguliya, wanguŵanene ŵasambizi ŵake, “Nkhwaunononu mbwenu ku ŵasambasi kusere mu ufumu waku Chiuta.” 24Kweni ŵasambizi wo ŵazizwanga pa mazu ghake. Yesu wangwamuka, wanguŵanene so, “Mwaŵana, nkhwaunononu mbwenu ku ŵakugomekezga mu mausambasi kusere mu ufumu waku Chiuta! 25Nkhuyuyu kuti gamila waporote mu jiso la zingani kwakuruska msambasi kusere mu ufumu waku Chiuta.” 26Kweni iwo ŵangurwita ukongwa, ŵangumufumba, “Iku njani wazina kutaskika?” 27Yesu, pakuŵalereska, wanguti, “Kuchiri ku ŵanthu nkhwambura machitika, kweni kwaku Chiuta cha: chifukwa vyose vyamachitika kuchiri kwaku Chiuta.” 28Ndipo Petro wangwamba kumnene, “Onani, ifwe tasiya vyose, ndipo tarondo imwe.” 29Yesu wanguŵanene, “Ndikuneneskiyani, palive yumoza yo wasiya nyumba, pamwe ŵabali, pamwe ŵazichi, pamwe nyina, pamwe wiske, pamwe ŵana, pamwe minda, pa chifwa chaku ine ndi pa chifwa cha evangeli, 30yo warekenge kuronde vya machumi pe chumi sono munyengo yeniyi, zinyumba, ndi ŵabali, ŵazichi, ŵanyina, ŵana, ndi minda, pamoza ndi masuzgu, ndi kuti mu mgonezi wo utuza umoyo wamuyaya. 31Kweni ŵanandi ŵakudanga ŵaŵenge ŵakumariya, ndi ŵakumariya ŵakudanga.”

Kachitatu yaka wakamba ndi za nyifwa yake

(Mateyu 20.17-19; Luka 18.31-34)

32Ndipo ŵenga mu nthowa kuruta ku Yerusalemu; ndipo Yesu wangudanjiyapo: ndipo ŵazizwanga; ndipo ŵakurondo wopanga. Ndipo wakutole so chumi ndi ŵaŵi wangwamba kuŵanene vyo vyamuziyanga, 33wakuti, “Onani, tikwere ku Yerusalemu, ndipo Mwana wa munthu wamkomboleke ku ŵazukuru ŵara ndi ŵalembi; ndipo ŵamweruzgiyenge ku nyifwa ndi ŵamperekenge mu Mitundu: 34ndipo ŵakamuweranga, ŵakamfunyiyanga mata, ŵakamkwechuwanga, ndi kumubaya, ndipo pavuli pa mazuŵa ghatatu wakayukanga.”

Fumbu la anyina aku Yakobe ndi Yohane

(Mateyu 20.20-28)

35Ndipo ŵanguza kwaku iyo Yakobe ndi Yohane, ŵana ŵaku Zebediya, wakuti, “Msambizgi, tikhumba kuti chose cho tikuŵeyeriyeninge, mutichitiye.” 36Ndipo iyo wangunena nawo, “Mukhumba kuti ndikuchitiyeninji?” 37Ndipo iwo ŵangumnene, “Tipaskeni kuti tije, yumoza ku marghe kwinu, ndi yumoza ku maze, mu unkhankhu winu.” 38Yesu wanguti kwaku wo, “Kuti muziŵa cha cho mupempha. Kumbi mwe ŵanthazi kumwapo nkhombo#10.38 nkhombo: nkhombo yapa ying'anamuwa masuzgu gho Yesu Kristu wanguseremu. yo ine ndingamwa? Pamwenga kubatizika ndi chibatizo cho ine ndibatizikiya?” 39Ndipo iwo ŵangumnene, “Te ŵanthazi.” Yesu wanguti kwaku wo, “Nkhombo yo nditumwa ine, mumwenge; ndipo ndi chibatizo chenicho ine ndibatizikiya, mubatizikenge. 40Kweni kuja ku marghe ghangu pamwenga ku maze kuti nkhwangu cha kupaska, kweni kwaku ŵeniwo kwaŵarongosoleke.” 41Ndipo ŵanguti ŵavwa wo chumi, ŵangwamba kutundiriya paku Yakobe ndi Yohane. 42Kweni Yesu wangwadana wangwanene, “Muziŵa kuti wo ŵapimika kuwusa mitundu, ŵatiyichitiya mazaza; ndipo ŵara ŵawo ŵatiyitufuliya. 43Kweni kuti kwe viyo mwaku imwe cha: yose yo wakhumba kuŵa mura mwaku imwe, waŵe mteŵeti winu, 44ndipo yose yo wakhumba kuŵa wachimoza mwaku imwe, waŵe muŵanda waku wose. 45Chifukwa Mwana wa munthu nayo kuti wanguza kuzachiteŵeteke cha, kweni kuzachiteŵete, ndi kupereka umoyo wake thumba lapa ŵanandi.”

Yesu wachizga wachiburumutiya, Bartimeyu

(Mateyu 20.29-34; Luka 18.35-43)

46Wanguza ku Yeriko: ndipo wachituwa ku Yeriko, ndi ŵasambizi ŵake pamoza ndi mzinda ukuru, mwana waku Timeyu, Bartimeyu, mpempha wachiburumutiya wajanga mumphepete mu nthowa. 47Ndipo wachivwa kuti ndi Yesu waku Nazarete, wangwamba kubongo ndi kuti, “Yesu mwamwana waku Davidi, ndifwiyeni lisungu.” 48Ndipo ŵanandi ŵangumchenya, kuti wachetame: kweni wangubongo ukongwaku, “Mwamwana waku Davidi, ndifwiyeni lisungu!” 49Ndipo wati wama Yesu, wanguti, “Mdaneni.” Ndipo ŵangumdana wachiburumutiya yo, wakumunene, “Chintha mtima: soka, watukudana.” 50Wangutaya munjirira wake, ndipo wakuwuluka wanguza kwaku Yesu. 51Yesu wangumfumba wanguti, “Unkhumba kuti ndikuchitiyenji?” Ndipo wanguti wachiburumutiya “Msambizgi, kuti ndilereske.” 52Ndipo Yesu wangumnene, “Rutanga; chivwanu chako chakutaska.” Ndipo sosonukweni wangulereska, ndipo wamrondonga mu nthowa.

Currently Selected:

Marko 10: TongaMw

Highlight

Copy