Marko 2

Yesu wachizga munthu wavinjenji

(Mateyu 9.1-8; Luka 5.17-26)

1Ndipo wachisere so mu Kapernaumu pavuli pa mazuŵa ghanyake, wanguvwika kuti we mu nyumba. 2Ndipo ŵanguwungana ŵanandi, viyo kuti mwengavi so malo chingana mpha khomu; ndipo warongoronga nawo mazu gho. 3Ndipo ŵanguza, ŵakumtole wavinjenje, wakutembezeka ndi ŵanayi. 4Ndipo po kuti ŵanguziŵa cha kundere kwaku iyo kufupi, chifukwa cha mzinda wo, ŵangweuwa bagha po wenga; ndipo ŵanguliphwatuwa, ndi ŵangusiska chita cho wangurapo wavinjenji yo. 5Ndipo Yesu, wachiwona chivwanu chawo, watiti ku wavinjenje yo, “Wamwana, vyarekeka vilakwa vyako.” 6Kweni mwenga ŵanyake ŵalembi mwenimo, wo ŵangurunguruka mu mitima yawo, 7“Chifukwa chine warongoro viyo mwenuyo? Watuka: ngwanthazi yani kureke vilakwa, kweni Chiuta pe?” 8Ndipo sosonukweni Yesu, wakuziŵa mu mzimu wake kuti ŵarungurukanga viyo mwaku ŵija, watiti kwaku wo, “Chifukwa chine murunguruka vyenivyo mu mitima yinu? 9Chiyuyu ninchi, kumnene wavinjenje yo, ‘Vyarekeka vilakwa vyako’, pamwenga kumnene, ‘Yuka nyamuwa chita chako, ndi wendenge’? 10Kweni kuti muziŵe kuti Mwana wa munthu we nawo mtufu panupasi kwachireke vilakwa” (watiti ku wavinjenje yo), 11“Kwaku iwe ndititi, yuka, nyamuwa chita chako, rutanga ku nyumba yako.” 12Ndipo wanguyuka, ndi sosonukweni wangunyamuwa chita, wangutuwa paurongo paku wose; viyo kuti wose ŵanguzizwa ndipo ŵamukankhuskanga Chiuta, ŵakuti, “Kali kose kuti tachiona chaviyo cha.”

Yesu wadana Levi

(Mateyu 9.9-13; Luka 5.27-32)

13Ndipo wanguruta so mu mphepete mu nyanja; ndi mzinda wose unguwungana kwake, ndipo waŵasambizganga. 14Ndipo wachirutiriyapo wanguwona Levi, mwana waku Alifeyu, pasi je pa malo gha msonkho, ndipo watiti kwaku iyo, “Rondo ine!” Ndipo wangusoka, wangumrondo.

15Ndipo wati waja iyo pa kurgha mu nyumba yake, ŵanandi ŵamsonkhu ndi ŵakulakwa ŵajarizgananga pamoza ndi Yesu ndi ŵasambizi ŵake: pakuti kwenga ŵanandi, wo ŵangumrondo. 16Ndipo ŵalembi ŵa ŵaFarisi wachiwona kuti warghanga pamoza ndi ŵakulakwa ndi ŵamsonkhu, ŵangunene ŵasambizi ŵake, “Chifukwa chine waturgha ndi watumwa pamoza ndi ŵamsonkhu ndi ŵakulakwa?” 17Ndipo wachivwa Yesu wanguŵanene, “Wo ŵe umampha kuti ŵapenja ng'anga cha, kweni ŵarwali ndiwo; kuti ndinguza kwazidana ŵarunji cha, kweni ŵakulakwa.”

Fumbu ndi kufunga

(Mateyu 9.14-17; Luka 5.33-39)

18Ŵasambizi ŵaku Yohane ndi ŵa ŵaFarisi ŵafunganga: ndipo ŵanthu ŵanguza, ŵangumufumba, “Chifukwa chine ŵasambizi ŵaku Yohane ndi wasambizi ŵa ŵaFarisi ŵafunga, kweni ŵasambizi ŵinu kuti ŵafunga cha?” 19Ndipo Yesu wangunena nawo, “Kumbi wangaziŵa uli kufunga ŵana ŵa nkholi, ŵeche pamoza nawo mweni-nthengwa? Nyengo yose yo mweni-nthengwa we pamoza nawo, kuti ŵaziŵa kufunga cha. 20Kweni ghakazanga mazuŵa, penipo mweni-nthengwa wakatuzgikangako kwaku wo, penipo ndipo ŵafungenge mu zuŵa liya. 21Palive yumoza wagambika pa raya lakale chigamba cha saru yifya: iku chigamba cho chifya chirundumukenge ku lakale, ndipo kuparuka ko kuŵenge kuheniku. 22Ndipo palive yumoza wapunguliya vinyo mufya mu vikuli vyakale: iku vinyo yo waphwatuwenge vikuli viyo, vinyo wadikenge, ndi vikuli viphwatukenge! Kweni vinyo mufya ŵapunguliya mu vikuli vifya.”

Fumbu ndi za Sabata

(Mateyu 12.1-8; Luka 6.1-5)

23Zuŵa limoza pa sabata wadumuwanga mukati mu minda; ndipo ŵasambizi ŵake ŵachenda ŵangwamba kudemphuwa masoyo. 24Ndipo ŵaFarisi ŵanguti kwaku iyo, “Awona, chifukwa chine ŵachita pa Sabata cho nchambura kuyamo?” 25Ndipo wanguti kwaku wo, “Asi mwaŵerenga kale cho wanguchita Davidi, po wangukavuka ndi wanguvwa nja, iyo ndi wo ŵapamoza nayo, 26mo wanguserere mu nyumba yaku Chiuta, po Abiatara wenga mzukuru mura, ndipo wangurgha viŵande vyakujarika, vyenivyo kuti kunguyiyamu kurgha cha, kweni ku ŵazukuru pe, ndipo so wangupaska kwaku wo ŵapamoza nayo?” 27Ndipo wanguti kwaku wo, “Sabata linguŵiya pa chifwa cha munthu, kuti, munthu pa chifwa cha Sabata cha: 28viyo Mwana wa munthu ndi mweneko wa Sabata nalo.”

Currently Selected:

Marko 2: TongaMw

Highlight

Copy