ŴaLevi 2
2
Mipasku ya ufwa ndi ya vipasi vyakudanga
1“Kweni we yose wakuza ndi mpasku wa ufwa kwachipereka ku Ambuya, mpasku wake ukaŵanga wa ufwa wamampha; wakadanga mafuta paku wo, ndi kuŵikapo vyachema, 2Ndi kuza nawo ku ŵana ŵaku Aroni ŵazukuru wo. Ndipo iyo wakatongapo ufwa wamampha wakuzaza janja, ndi mafuta ndi vyachema vyake vyose. Mzukuru wakawochanga pa jochero kuŵa chigaŵa chake cha chikumbusku chake cha mpasku wapa moto, fungu lakukondweska Ambuya. 3Ndipo chigaŵa cho chikajangako cha mpasku wa ufwa chikaŵanga chaku Aroni ndi ŵana ŵake. Cho nchigaŵa chakupaturika chakuruska cha mipasku yapa moto ku Ambuya.
4“Muchiza ndi mpasku wa ufwa wakuwocheka mu chitofo kuŵa mpasku, ukaŵanga makeke ghambura mtupu ghakupaka ku mafuta. 5Ndipo asani upereka mpasku wa ufwa wakukazinga pa zinga, ukaŵanga wa ufwa wamampha wambura mtupu wakusazgako mafuta. 6Wakawumenyanga tumanatumana ndi kudapo mafuta pachanya, ndi mpasku wa ufwa. 7Ndipo asani mpasku wako ndi mpasku wa ufwa wakubikika pa zinga, utenere kuŵa ufwa wakuti ng'ibu ndi mafuta. 8Ndipo ukatoliyanga mpasku wa ufwa wo wasazgikako vinthu ivi ku Ambuya; ndipo penipo waperekeka ku mzukuru, iyo wakazanga nawo ku jochero. 9Ndipo mzukuru wakatongako ku mpasku wa ufwa phande lake la chikumbusku ndi wakaliwochanga pa jochero, mpasku wapa moto, wa fungu lakukondweska Ambuya. 10Ndipo mpasku wa ufwa wo wajako ukaŵanga waku Aroni ndi wa ŵana ŵake; ili ndi phande lakupaturika ukongwa la mpasku wapa moto ku Ambuya.
11“Paulevi mpasku wakuchitika ndi mtupu wo mukatoliyanga ku Ambuya; pakuti mukawochangamtupu cha nanga ndi uchi nawo cha kuŵa mpasku wapa moto ku Ambuya. 12Mpasku wa vipasi vyakudanga, mukaperekanga ku Ambuya; kweni kuti vikaperekekanga pa jochero cha, kuŵa fungu lakukondweska. 13Mpasku winu wose wa ufwa mukawunoweskanga ndi mche; mche wa phanganu linu ndi Chiuta winu, kuti murekenge cha kuŵikamo mu mpasku winu wa ufwa, mukaperekanga mche mu vyakupereka vyose.
14“Asani mupereka mpasku wa mbeu zinu zakudanga ku Ambuya, mukaperekanga mbeu zakupanda zifya za masoyo gha sono zakumizgika ndi moto. 15Ndipo mukaŵikangapo mafuta ndi kulalikapo vya chema pachanya pake; ndi mpasku wa ufwa. 16Ndipo mzukuru wakawochanga kuŵa phande la mbeu yakuponda, ndi mafuta ndi vyachema vyose kuŵa chikumbusku cha kupereka mpasku wapa moto ku Ambuya.”
Currently Selected:
ŴaLevi 2: TongaMw
Highlight
Share
Copy
Want to have your highlights saved across all your devices? Sign up or sign in
Bible Society of Malawi
