Yohane 13

Yesu wasuka marundi gha ŵasambizi ŵake

1Lenga lindaze dghera la Phaska, wanguziŵa Yesu kuti laza ora lake lakutuwa mu charu chino, kuruta ku Dada; po wanguti waŵanja ŵapa mtima wake ŵamu charu, wanguŵanjiya limu mpaka ku umari. 2Ndipo wachoneska diabolo yo wati waŵikamo kali mu mtima waku Yuda mKeriote, mwana waku Simoni, kuti wampachiye. 3Yesu, wanguziŵa kuti Dada wapaska vyose mu manja mwake. Wanguziŵa kuti watuwa kwaku Chiuta, ndi kwaku Chiuta warutenge. 4Wangusoka pa gome ndi wangukhumuwa minjirira yake; ndipo wanguti wato chakuleske, wangujichinyiya. 5Pavuli wangupunguliya maji mu mbale, sono wangwamba kusambiska marundi gha ŵasambizi, ndi kughaleska ndi chileskeru cho wangujichinyiya nacho. 6Watuza kwaku Simoni Petro, wamnene, “Ambuya, kumbi imwe musambiska marundi ghangu?” 7Yesu wangwamuka ndi wamnene, “Cho ndichita, kuti ungaziŵa iwe sono cha; kweni ukaziŵanga pavuli.” 8Petro wamnene, “Kuti mukasambiskanga marundi ghangu cha muyaya.” Wangumwamuka Yesu, “Asani ndireka kukusambiska, kuti we ndi chigaŵa pamoza nane cha.” 9Wamnene Simoni Petro, “Ambuya, marundi ghangu pe cha, kweni manja nagho ndi mutu.” 10Wamnene Yesu, “Wakusamba kuti wakavuka kubira liŵavu lose cha, kweni kusamba marundi pe mbwenu ngwakuphotoka kosekose: imwe mwe ŵakuphotoka, kweni mose cha.” 11Chifukwa wamziŵanga yo wampachiyenge; chifukwa chenicho wanguti, “Kuti mwe ŵakuphotoka mose cha.”

12Viyo penipo wangusambiska marundi ghawo, wati wavwara minjirira yake, ndi kuja so pasi, wanguŵafumba, “Kumbi muzuŵa cho ndakuchitiyani? 13Imwe mutinditamula, Msambizgi, ndi Ambuya: ndipo muneneska; chifukwa nde waviyo. 14Viyo asani ine, Ambuya ndi Msambizgi, ndasambiska marundi ghinu, namwe mutenere kusambiskana marundi. 15Chifukwa ndakupaskani chandiru, alinga kuti nge ndimo ine ndachitiya imwe, namwe so muchitenge. 16Nadidi ndikuneneskiyani, Muŵanda kuti ndi mraku ku Mbuyake cha; chingana ndi nthumi kuti njiraku ku wakuyituma cha. 17Asani muziŵa vyenivi, mwe ŵamwaŵi asani mutivichita. 18Kuti ndinena imwe mose cha; ine ndiziŵa wo ndatondo: kweni kuti lifiskike lembo lo, ‘Wakurgha chiŵande pamoza nane wasoske paku ine chitende chake.’ 19Ndikukambiyani ichi sono chenga chindaŵepo, alinga kuti, penipo chikaŵangapo, muvwane kuti ine ndine iyo. 20Nadidi ndikuneneskiyani, wakuronde mweniyo yose nditumenge, waronde ine; ndipo wakuronde ine, waronde Wakundituma.”

Yesu wakambiya limu ndi kukomboreka kwake

(Mateyu 26.20-25; Marko 14.17-21; Luka 22.21-23)

21Wati wakamba vyenivi Yesu, wangwenjezgeka mu mzimu, ndipo wangusimikizga, wanguti, “Nadidi, ndikuneneskiyani, kuti yumoza wamwaku imwe wandipachiyenge.” 22Ŵasambizi ŵangulereskana, pakukangang'a wakambanga yani. 23Yumoza wa ŵasambizi wakiyegeme pa chifuŵa chaku Yesu, yo Yesu wangwanja. 24Simoni Petro wangukonozga kwaku iyo, wamnene, “Utinene yo wakamba.” 25Viyo mweniyo wachiyegeme pa chifuŵa chaku Yesu, wangumnene, “Ambuya ndi yani?” 26Yesu wangwamuka, “Ndi mweniyo ine ndimubwengiyenge chinkhombe, ndi kumpaska.” Ndipo wati wachibwenga chinkhombe, wanguchipaska kwaku Yuda, mwana waku Simoni mKeriote. 27Ndipo pavuli pa chinkhombe cho Satana wangusere mwaku iyo. Yesu wamnene, “Cho uchita chitanga ruŵi.” 28Kweni pengavi yumoza wakuyegeme pa gome wanguziŵa chifukwa chakumnene ichi. 29Chifukwa ŵanyake ŵarungurukanga kuti, po Yuda wenga wakusunga chikwama, Yesu wamuneniyanga kuti, “Gulanga vyo tikavukiya ku dghera”; pamwenga, kuti wapaskeko kanthu ku ŵakavu. 30Viyo Yuda wati waronde chinkhombe, ruŵi wangutuliya kubwaro; ndipo kunguŵa usiku.

Dangu lifya

31Wati watuwa Yuda, Yesu wanguti, “Sono wakankhuskika Mwana wa munthu, ndipo Chiuta wakankhuskika mwaku iyo; 32ndipo asani Chiuta wakankhuskika mwaku iyo wamkankhuskiyenge mwaku iyo yija. 33Mwatwana mwe, kanyengo kamanavi ndeche namwe pamoza. Mundilembenge; ndipo nge ndimo ndiguŵanene ŵaYuda, viyo sono nako ndinene imwe, ‘Kweniko ine nditiya kuti muziŵa kuzako imwe cha’ 34dangu lifya ndikupaskani, kuti mwanjane; nge ndimo ine ndakwanjiyani, imwe so mwanjane. 35Mwaku ichi ŵanthu wose ŵaziŵenge kuti mwe ŵasambizi ŵangu, asani mwe ndi chanju yumoza ku munyake.”

Yesu wakamba ndi kumkana kwaku Petro

(Mateyu 26.31-35; Marko 14.27-31; Luka 22.31-34)

36Simoni Petro wamnene, “Ambuya mutanunkhu?” Yesu wangwamuka, “Ko ndita, kuti uziŵa kundirondo sono cha; kweni wamkundirondo pavuli.” 37Petro wamnene, “Ambuya, chifukwa chine ndingatondeka kukurondoni sono? Ndiŵikiyenge pasi umoyo wangu chifukwa chinu.” 38Watamuka Yesu, “Kumbi uŵikiyenge pasi umoyo wako pa chifwa chaku ine? Nadidi ndikuneneske, kuti wakokoŵerekenge cha tambala, mpaka iwe wandikana katatu.

Currently Selected:

Yohane 13: TongaMw

Highlight

Copy