Chituwa 4

Mosese waronde nthazi zaku chitiya vyakuziziswa

1Sono Mosese wangwamuka, “Kweni ehe, kuti ŵamuvwana nane cha chingana nkhunditegherezga, pakuti ŵamunena kuti, ‘Ambuya kuti angukuwoneke cha.’ ” 2Ambuya anguti kwaku iyo, “Nchine cho che mu janja lako?” Iyo wanguti, “Ndodo.” 3Ndipo anguti, “Uyipong'e pasi.” Viyo wanguyipong'a pasi, ndipo yingusanduka njoka; ndipo Mosese wanguyithaŵa. 4Kweni Ambuya anguti kwaku Mosese, “Tambaruwa janja lako uyiko ku muchiya,” viyo wangutambaruwa janja lake ndi wanguyiko, ndipo yingusanduka ndodo mu janja lake. 5“Kuti ŵavwane kuti ndine Ambuya, Chiuta wa auskeu, Chiuta waku Abrahamu, Chiuta waku Yisaki, ndi Chiuta waku Yakobe, wakuwoneke iwe.” 6Ndipo so, Ambuya anguti kwaku iyo, “Ŵika janja lako mu chifuŵa chako.” Ndipo wanguŵika janja lake mu chifuŵa; ndipo penipo wangurituzgamo, awonani janja lake lenga ndi makhate, lingutuŵa nge ndi nyankhuŵinda. 7Sono Chiuta wanguti, “Werezge janja lako mu chifuŵa chako.” Viyo wanguliwezge mu chifuŵa janja lake; ndipo wanguti walituzga, awonani, linguweremo kuyana ndi liŵavu lake lose. 8“Asani kuti ŵamuvwana nawe cha,” wanguti Chiuta, “pamwenga kureka kutegherezga ku chisimikizgu chakudanga, akhumba ŵamuvwana ndi chisimikizgu cha pavuli. 9Asani ŵamuvwana cha chingana ndi mu visimikizgu ivi viŵi, nanga nkhuphwere mazu ghako, ukato maji gha mu msinji Nile ukaghadire pasi pa yumu; ndipo maji gho wangunegha mu Nile ghangusanduka ndopa pasi pa yumu.”

10Kweni Mosese wanguti ku Ambuya, “Owe Ambuya, ine kuti nde salala cha pakukamba kwamba kale; pamwenga po mwambiya kukamba kwaku ine, muŵanda winu; kweni kukamba chizitu-zitu ndi lilime nalo ndizitu.” 11Sono Ambuya anguti kwaku iyo, “Njani yo wakuchita mlomo wa munthu? Njani watumuchita kuŵa wambuwu pamwenga mgota, pamwenga kulereska, pamwenga uchiburumutiya? Kuti ndine Ambuya cha? 12Viyo sono rutanga, ndipo ine ndikaŵanga ndi mlomo wako, ndi kukusambizga vyenivyo wamukamba.” 13Kweni iyo wanguti, “Owe Ambuya, ndipempha, tumani munthu munyake.” 14Sono Ambuya angumukalipiya Mosese ndi anguti, “Kumbi waliko cha Aroni mwana munyako, muLevi? Ndiziŵa kuti wangakamba umampha; ndipo awona watuza kuzachikumana nawe, ndipo wachikuwona wakakondwanga mu mtima. 15Iwe ukambenge nayo ndipo ukaŵikanga mazu gho mu mlomo wake; ndipo ine ndikaŵanga ndi mlomo wako ndi mlomo wake, ndipo ndikakusambizganinga chenicho mwamuchita. 16Iyo wamukukukambiya ku ŵanthu, ndipo wakaŵanga mlomo wako, ndipo iwe ukaŵanga nge ndi Chiuta kwaku iyo. 17Ndipo ukatolenga ndodo iyi mu janja lako, yeniyo wamuchitiya visimikazgu.”

18Mosese wanguwere kwaku Yetero musibweni wake, ndi wanguti kwaku iyo, “Ndipempha undizomerezge kuwere ku ŵabali ŵangu mu Egipiti kwachiwona vinu ŵachalipo ŵamoyo.” Ndipo Yetero wanguti kwaku Mosese, “Ruta mu chimangu.” 19Ndipo Ambuya anguti kwaku Mosese mu Midiani, “Were ku Egipiti; pakuti ŵa ŵanthu wose ŵakhumbanga kukubaya ŵakufwa.” 20Viyo Mosese wanguto muwoli wake ndi ŵana ŵanthurumi ndi wanguŵajarika pa mbunda, ndi wanguwere ku charu cha Egipiti. Ndipo Mosese wangupinga nthonga yaku Chiuta mu janja lake.

21Ndipo Ambuya anguti kwaku Mosese, “Utakuti wawere ku Egipiti ukawone kuti wachita vya minthondwi vyose paurongo paku Farao vyenivyo ndaŵeka mu nthazi yako; kweni ndamunonopeska mtima wake, viyo wamuzomerezga cha kuti ŵaYisraele ŵakarutenge. 22Ndipo iwe wamukamba kwaku Farao, ‘Viyo ndimo anene Ambuya, Yisraele ndi mwana wangu waumwali, 23ndipo ndititi kwaku iwe, “Umuzomerezge mwana wangu warutenge alinga wakanditataliyenge.” Asani ukakananga kuti warutenge, ehe, ndikabayanga mwana wako munthurumi waumwali.’ ”

24Pa malo ghakugonapo mu nthowa Ambuya angukumana nayo ndipo apenjanga kumubaya. 25Sono Zipora wanguto mwa ndi wanguchinja khungu lakusongo la mwana wake munthurumi ndipo wanguko marundi ghaku Mosese ndi khungu lo, ndi wanguti, “Kwakuneneska we wanthengwa wa ndopa kwaku ine!” 26Viyo Ambuya angumureka. Viyo iyo wanguti, “Iwe we wanthengwa wa ndopa,” chifukwa cha muchinju.

Mosese wakumana ndi Aroni

27Ambuya anguti kwaku Aroni, “Ruta ku bozwa kwachikumana ndi Mosese.” Viyo wanguruta, ndipo ŵangukumana pa phiri laku Chiuta ndi wangumufyofyontha. 28Ndipo Mosese wangumunene mazu ghose gha Ambuya ghenigho angumutuma ndi visimikizgu vyo angumulanguliya kwachichita. 29Sono Mosese ndi Aroni wanguruta ndi ŵanguungang'a pamoza ŵaraŵara wose ŵa ŵaYisraele. 30Ndipo Aroni wangukamba mazu ghose Ambuya angukambiya Mosese, ndi wanguchita visimikizgu pa maso pa ŵanthu. 31Ndipo ŵanthu ŵanguvwana, ndipo penipo ŵanguvwa kuti Ambuya anguchezga ndi ŵaYisraele ndi kuti wawona suzgu yawo, ŵangukotama mitu yawo ndi ŵangusopa.

Currently Selected:

Chituwa 4: TongaMw

Highlight

Copy