Chituwa 3

Kudanika kwaku Mosese

1Sono Mosese waliskanga mberere za sibweni ŵake, Yetero, mzukuru wa Midiani; ndipo wangurongozge viŵetu vyake kuchiri ku zambwe kwa bozwa, ndi wanguza ku Horebe, phiri laku Chiuta. 2Ndipo mungelo wa Ambuya wangumwoneke iyo mu mulipu wa moto kutuwa mu chivwati; wangulereska, ndipo ehe, chivwati chakolenga, kweni kuti chingufya cha. 3Ndipo Mosese wanguti, “ndipatukiyeko ndiwone chinthu chikuru ichi, chifukwa chine chivwati chilivi kufya.” 4Penipo Ambuya anguwona kuti wapatukiyako kwachichiwona, Chiuta wangudanirizga kwaku iyo kutuliya mu chivwati, “Mosese, Mosese!” Ndipo iyo wanguti, “Ndine nde pano.” 5Sono wanguti, “Ungazanga pafupi; zuwa skapato zako ku marundi ghako, pakuti malo gho wamapo ndi malo ghakupaturika.” 6Ndipo wanguti, “Ndine Chiuta wa ausu, Chiuta waku Abrahamu, Chiuta waku Yisaki, ndi Chiuta waku Yakobe.” Ndipo Mosese wangubisa chisku chake, pakuti wanguthenthema kulereska paku Chiuta.

7Sono Ambuya anguti, “Ndawona suzgu ya ŵanthu ŵangu ŵeniwo ŵemu Egipiti, ndipo ndavwa nkhuta yawo chifukwa cha nduna za nchitu. 8Ndiziŵa maurwirwi ghawo, ndipo ndasika kuŵapozomoska ku ŵaEgipiti. Ndikaŵatuzganga mu charu chiya kuya nawo ku charu chamampha ndi chisani, charu cha mukaka unandi ndi uchi unandi. Cho ndi charu cha ŵaKanani, ŵaHiti, ŵaAmori, ŵaPerizi, ŵaHivi, ndi ŵaYebusi. 9Ndipo sono, ehe, nkhuta ya ŵaYisraele yafika kwangu ndipo ndawona suzgu yeniyo ŵaEgipiti ŵati ŵasuzga nayo. 10Zanga ndikakutumanga kwaku Farao kuti ukatuzge ŵanthu ŵangu, ŵana ŵaku Yisraele, mu charu cha Egipiti.” 11Kweni Mosese wanguti kwaku Chiuta, “Ndine yani ine kuti ndingaya kwaku Farao ndi kuŵatuzga ŵana ŵaku Yisraele mu charu cha Egipiti?” 12Iyo wanguti, “Kweni ndikaŵanga pamoza nawe; ndipo ichi chikaŵanga chisimikizgu kwaku iwe, kurongo kuti ndine ndakutuma: utakuti watuzga ŵaYisraele mu Egipiti wazamutataliya Chiuta pa phiri lenili.”

13Sono Mosese wanguti kwaku Chiuta, “Asani ndaruta ku ŵaYisraele ndikuŵanene kuti, ‘Chiuta wa auskemwe wandituma ine kwaku imwe,’ ndipo ŵachindifumba kuti, ‘Zina lake njani?’ Ndamukuti uli kwaku wo?” 14Chiuta wanguti kwaku Mosese, “NDINE MWENIYO NDINE.” Ndipo wanguti, “Ukakambe ichi ku ŵaYisraele, ‘NDINE, wandituma kwaku imwe.’ ” 15Chiuta wangunena nayo so Mosese, “Viyo ndimo ukanene ku ŵaYisraele, ‘Ambuya Chiuta wa auskemwe Chiuta waku Abrahamu, Chiuta waku Yisaki, ndi Chiuta waku Yakobe, wandituma kwaku imwe’; ili ndi zina langu muyaya, ndipo viyo ndimo ndikakumbukikiyanga mu migonezi yose. 16Ruta, ukaŵawunjike pamoza ŵaraŵara ŵa ŵaYisraele, ndipo ukaŵanene kuti, ‘Ambuya, Chiuta wa auskwemwe Chiuta waku Abrahamu, waku Yisaki, ndi waku Yakobe, wandiwoneke ine, wakati, “Ndakuwonani, ndi vyo vyachitikiya imwe mu Egipiti; 17sono ndipangana kuti ndikakutuzganingimo mu suzgu yamu Egipiti, kuya namwe ku charu cha ŵaKanani, ŵaHiti, ŵaAmori, ŵaPerizi, ŵaHivi ndi ŵaYebusi, charu chakuzara mukaka ndi uchi.” ’ 18Ŵamutegherezga ku mazu ghako; ndipo iwe ndi ŵaraŵara ŵa ŵaYisraele mwamuruta ku karonga wa Egipiti; mwamukuti kwaku iyo, ‘Ambuya, Chiuta wa ŵaHebere wakumana nafwe; ndipo sono, titukupempha, utizomerezge kuruta lwendo la mazuŵa ghatatu kuya ku bozwa, alinga tikachite chisopo ku Ambuya Chiuta widu.’ 19Ndiziŵa kuti karonga wa Egipiti wakumuzomerezgani kuruta cha, kweni asani wangachichizgika ndi janja la nthazi ndipo. 20Viyo ndikatambaruwanga janja langu ndi kukoso Egipiti ndi vya minthondwi vyose vyenivyo ndikachitanga mukati mwake, pavuli paku vyo wakamuzomerezganinga kuruta. 21Ndipo ndikapaskanga khamu lo wezi mu maso gha ŵaEgipiti; ndipo muchiruta, kuti mukarutanga ŵakavu cha, 22kweni munthukazi we yose, wakapemphanga mzengezgani wake, ndi mweniyo ngwakutandara mu nyumba yake, vyuma vya siliva ndi vya golide, ndi vyakuvwara, ndipo mukavivwarikanga ŵana ŵinu ŵanthurumi ndi ŵana ŵinu ŵanthukazi; viyo ndimo muŵaskowiyenge ŵaEgipiti.”

Currently Selected:

Chituwa 3: TongaMw

Highlight

Copy